Usa ka dapit nga kasilongan, sama sa landong sa usa ka dako kaayong bato (Isa 32:2), panganod (Isa 25:5), balongbalong (Isa 4:6), kahoy (Aw 2:3; Eze 17:23; Os 4:13), o sa lain pang matang sa tanom (Jon 4:​5, 6). Kini magsilbing proteksiyon gikan sa kainit sa adlaw. Busa, ang usa mahulagwayong giingon nga nailalom sa “landong” nianang nagsilbi o gilaomang mohatag ug proteksiyon, salipdanan, seguridad, o dangpanan. Busa, maylabot sa mga langyaw nga iyang gipasaka sa iyang balay, si Lot miingon sa mga tawo sa Sodoma: “Ayaw lamang unsaa kining mga lalaki, tungod kay mao kana nga sila mianhi ilalom sa landong sa akong bubong.” (Gen 19:8) Ug si Jehova, pinaagi sa iyang manalagna nga si Isaias, nagpahayag ug kaalaotan niadtong mipasilong “sa landong sa Ehipto,” nga mao, midangop sa Ehipto alang sa proteksiyon. (Isa 30:1-3; tan-awa usab ang Lam 4:20; Eze 31:​6, 12, 17.) Si Jehova linaing gihubit ingong nagtaganag mapanalipdanong landong alang sa iyang katawhan (Sal 91:1; 121:5; Isa 25:4) o naghatag kanila ug samag-landong nga proteksiyon ilalom sa iyang “kamot” o sa iyang “mga pako.” (Sal 17:8; 36:7; 57:1; 63:7; Isa 49:2; 51:16) Sa laing bahin, ang “mabagang kangiob” o mabagang landong gilangkit sa kadulom, kapeligrohan, bisan sa lubnganan​—“ang yuta sa kangitngitan.”​—Job 10:​21, 22; 24:17; 38:17; Sal 23:4.

Ang pagkausab sa gidak-on sa landong o anino ug sa kataposan mahanaw samtang moaginod ang adlaw gigamit ingong simile (pagtandi) sa pagkamubo o pagkadaklit sa kinabuhi sa tawo. (1Cr 29:15; Job 8:9; 14:​1, 2; Sal 102:11; 144:4; Ecc 6:12; 8:13) Ang mga adlaw sa usa ka indibiduwal nga mahimong “sama sa usa ka landong nga nagalingay” nagpasabot nga ang iyang kamatayon haduol na. (Sal 102:11; 109:23) Bisan tuod ang mga landong nga gipahinabo sa adlaw kanunayng nagakausab ang gidak-on ug direksiyon samtang nagatuyok ang yuta, si Jehova walay kausaban. Ingon sa gisulat sa tinun-an nga si Santiago: “Kaniya walay pagkausab sa pagbalhin sa landong.”​—San 1:17.

Ang landong o anino dili mao ang aktuwal nga butang. Bisan pa niana mohatag kini ug ideya sa katibuk-an nga porma o disenyo sa aktuwal nga butang nga gigikanan niini. Labot niini gipatin-aw ni Pablo nga ang Balaod, lakip ang mga pista, tabernakulo, ug mga halad niini, may usa ka landong nga naghawas sa mas dagkong mga butang nga moabot. Siya misulat: “Ang katinuoran iya ni Kristo.”​—Col 2:​16, 17; Heb 8:5; 9:23-28; 10:1.

Labot sa milagrosong pagsibog sa landong o anino nga gihisgotan sa 2 Hari 20:9-11 ug Isaias 38:​8, tan-awa ang ADLAW, I.