Ang pisikal nga gambalay sa usa ka tawo o sa usa ka hayop. Ang Hebreohanong pulong nga gewi·yahʹ nagtumong sa usa ka lawas, buhi man kini (Gen 47:18) o patay. (1Sa 31:10; Sal 110:6) Ang Hebreohanong neve·lahʹ naggikan sa lintunganayng berbo nga na·velʹ (“malaya”; Sal 1:3) ug gihubad ingong “patayng lawas.” (Lev 5:2; Deu 14:8; Isa 26:19) Ang ba·sarʹ, nga Hebreohanong pulong alang sa unod, mahimong maghawas sa tibuok lawas. (Itandi ang Sal 16:9; tan-awa ang UNOD.) Ang Gregong pulong alang sa “lawas” sagad maoy soʹma (Mat 5:29), apan ang khros, nga sa literal maoy “panit,” gihubad nga “lawas” diha sa Buhat 19:12. Ang Gregong pulong nga ptoʹma, nga naggikan sa lintunganayng berbo nga piʹpto (lusno), nagtumong sa nalusno nga lawas o “patayng lawas.” (Mat 14:12) Ang nagkalainlaing matang sa pisikal nga mga lawas gilangkoban sa nagkalainlaing matang sa unod, uban sa puwersa sa kinabuhi.​—1Co 15:39; San 2:26; Gen 7:22; tan-awa ang KALAG.

Espirituhanong mga Lawas. Samtang adunay pisikal nga mga lawas, nga makita ug mabatyagan, adunay espirituhanong mga lawas usab, nga dili makita sa tawhanong mga mata ug bug-os dili mabatyagan sa tawo. (1Co 15:44) Ang mga lawas sa espiritung mga persona (ang Diyos, si Kristo, ang mga manulonda) maoy mahimayaon. “Wala pa gayoy tawo nga nakakita sa Diyos.” (1Ju 4:12) Ang tawo dili makakita sa Diyos ug mabuhi. (Ex 33:20) Sa dihang si apostol Pablo sa daklit lamang nakakita sa pagpadayag ni Jesu-Kristo human sa pagkabanhaw ni Jesus, siya natumba sa yuta ug nabuta tungod sa kahayag, usa ka milagro ang gikinahanglan aron mapasig-uli ang iyang panan-aw. (Buh 9:3-5, 17, 18; 26:​13, 14) Sa ingon  usab, ang mga manulonda mas gamhanan kay sa mga tawo. (2Pe 2:11) Sila maoy mga mahimayaon, masanag ug nagpakita sa ingon niana nga paagi sa ilang pisikal nga mga pagpadayag. (Mat 28:2-4; Luc 2:9) Kining espiritung mga anak sa Diyos may panan-aw nga arang makakita ug makasugakod sa pagsud-ong sa kadan-ag sa Labing Gamhanang Diyos.​—Luc 1:19.

Tungod kay kita dili makakita sa Diyos pinaagi sa atong pisikal nga mga mata, siya migamit ug mga ekspresyon nga naghubit kaniya diha sa tawhanong mga kinaiyahan aron sa pagtabang kanato nga makasabot ug makapabili sa mga butang labot kaniya. Ang Bibliya naghisgot kaniya ingong adunay mga mata (Sal 34:15; Heb 4:13); mga bukton (Job 40:9; Ju 12:38); mga tiil (Sal 18:9; Zac 14:4); kasingkasing (Gen 8:21; Pr 27:11); mga kamot (Ex 3:20; Rom 10:21); mga tudlo (Ex 31:18; Luc 11:20); ilong, mga buho sa ilong (Eze 8:17; Ex 15:8); ug mga dalunggan (1Sa 8:21; Sal 10:17). Dili angayng hunahunaon nga siya sa literal nagbaton niini nga mga sangkap sama sa atong nabatonan. Si apostol Juan, kinsa adunay paglaom sa kinabuhi sa langit, miingon ngadto sa kaubang mga manununod sa langitnong kinabuhi: “Mga hinigugma, kita karon mga anak sa Diyos, apan wala pa ikapadayag kon mahimong unsa unya kita. Kita nahibalo nga sa dihang siya igapadayag na kita mahisama kaniya, tungod kay siya atong makita ingon gayod sa iyang pagkamao.” (1Ju 3:2) Kini mahimong usa ka lawas nga nahiuyon sa “mahimayaong lawas” ni Jesu-Kristo (Flp 3:21), kinsa mao “ang larawan sa dili-makita nga Diyos,” “ang aninag sa iyang himaya ug ang tukma nga larawan sa iyang pagkamao.” (Col 1:15; Heb 1:3) Busa, sila makabaton ug lawas nga dili-madunot, walay-kamatayon, nga lahi sa mga manulonda sa katibuk-an ug sa katawhan, nga may-kamatayon.​—1Co 15:53; 1Ti 1:17; 6:16; Mar 1:​23, 24; Heb 2:14.

Unodnong Lawas ni Kristo. Sa dihang unang gihimo ang Panihapon sa Ginoo, si Jesus mitanyag sa tinapay nga walay lebadura ngadto sa 11 ka matinumanong mga apostoles, nga nag-ingon: “Kini nagkahulogan sa akong lawas nga igahatag alang kaninyo.” (Luc 22:19) Si apostol Pedro sa ulahi miingon: “Siya [Jesus] nagpas-an sa atong mga sala diha sa iyang kaugalingong lawas sa estaka.”​—1Pe 2:24; Heb 10:10; tan-awa ang PANIHAPON SA GINOO.

Aron si Jesus mahimong “ang kataposang Adan” (1Co 15:45) ug mahimong “katugbang nga lukat alang sa tanan [nga katawhan],” ang iyang unodnong lawas kinahanglang mahimong tinuod nga tawhanong lawas, dili inkarnasyon. (1Ti 2:​5, 6; Mat 20:28) Kini kinahanglang hingpit, kay kini kinahanglang ihalad aron itanyag kang Jehova nga Diyos ingong lukat. (1Pe 1:​18, 19; Heb 9:14) Walay dili-hingpit nga tawo ang makatagana sa gikinahanglan nga bili. (Sal 49:7-9) Tungod niini, si Jesus miingon sa iyang Amahan sa dihang gipresentar ang iyang kaugalingon alang sa bawtismo, aron sugdan ang iyang masakripisyohon nga pagkinabuhi: “Ikaw nag-andam ug lawas alang kanako.”​—Heb 10:5.

Ang pisikal nga lawas ni Jesu-Kristo wala pasagding madunot hangtod mahimong abog sama sa nahitabo sa mga lawas ni Moises ug David, mga tawong gigamit sa paglandong kang Kristo. (Deu 34:​5, 6; Buh 13:​35, 36; 2:​27, 31) Sa dihang ang iyang mga tinun-an miadto sa lubnganan sayo sa buntag sa unang adlaw sa semana, ang lawas ni Jesus wala na didto, ug ang mga bendahe na lamang nga gigamit sa pagputos sa iyang lawas ang nabilin diha sa lubnganan, ang iyang lawas sa walay duhaduha naut-ot nga wala moagig pagkadunot.​—Ju 20:2-9; Luc 24:3-6.

Human sa pagkabanhaw ni Jesus siya nagpakita pinaagi sa lainlaing mga lawas. Nasaypan siya ni Maria ingong ang hardinero. (Ju 20:​14, 15) Nagpakita siya pag-usab, misulod sa usa ka lawak nga trinangkahan ang mga pultahan, nagbaton ug lawas nga adunay mga agi sa samad. (Ju 20:24-29) Sa makadaghan siya nagpakita ug nailhan, dili pinaagi sa iyang dagway, kondili pinaagi sa iyang mga pulong ug mga buhat. (Luc 24:​15, 16, 30, 31, 36-45; Mat 28:16-18) Kas-a usa ka milagro nga nahitabo ubos sa iyang pagtultol ang nagbukas sa mga mata sa iyang mga tinun-an sa pagkaila kaniya. (Ju 21:4-7, 12) Si Jesus, kay nabanhaw ingong espiritu (1Pe 3:18), makahimo sa pagmateryalisar alang sa maong okasyon sama sa gibuhat sa mga manulonda sa nangaging mga panahon, sa dihang sila nagpakita ingong mga mensahero. (Gen 18:2; 19:​1, 12; Jos 5:​13, 14; Huk 13:​3, 6; Heb 13:2) Sa mga adlaw una pa ang Lunop, ang mga manulonda nga “wala magpadayon sa paghupot sa ilang orihinal nga pagkabutang apan mitalikod sa ilang nahiangay nga puloy-anang dapit” nagpakatawo ug nangasawa ug mga tawhanon. Nga kining manulondang mga anak sa Diyos maoy dili-tinuod nga mga tawo kondili nagsul-ob ug pisikal nga mga lawas, gipakita sa kamatuoran nga ang Lunop wala makalaglag niini nga mga manulonda, apan sila naghukas sa ilang pisikal nga lawas ug mibalik sa dominyo sa mga espiritu.​—Jud 6; Gen 6:4; 1Pe 3:​19, 20; 2Pe 2:4.

Simbolikong Paggamit. Si Jesu-Kristo gihisgotan ingong Ulo “sa kongregasyon, nga mao ang iyang lawas.” (Efe 1:​22, 23; Col 1:18) Kining Kristohanong lawas wala mabahinbahin sa rasa, nasod, o sa ubang paagi, sanglit kini gihawasan sa  mga Hudiyo ug sa mga katawhan sa tanang kanasoran. (Gal 3:28; Efe 2:16; 4:4) Ang tanan nabawtismohan sa balaang espiritu ngadto kang Kristo ug ngadto sa iyang kamatayon. Busa, silang tanan nabawtismohan ngadto sa usa ka lawas. (1Co 12:13) Sa ingon ang tibuok lawas mosunod sa ulo, mamatay sa matang sa kamatayon nga iyang namatyan ug mabanhaw sa matang sa pagkabanhaw nga iyang nabatonan.​—Rom 6:3-5; tan-awa ang BAWTISMO (Ang Bawtismo Ngadto Kang Kristo Jesus, Ngadto sa Iyang Kamatayon).

Si apostol Pablo migamit sa paglihok sa tawhanong lawas aron iilustrar ang paglihok sa Kristohanong kongregasyon, nga nagpakasama sa mga membro nga nabuhi sa yuta sa bisan unsang partikular nga panahon ngadto sa usa ka lawas, uban kang Kristo nga mao ang dili-makitang Ulo. (Rom 12:​4, 5; 1Co 12) Iyang gipasiugda ang kahinungdanon sa dapit nga giokupar sa matag membro, ang matag usa nagtambayayongay, ang gugma ug kahangawa sa usag usa, ug ang kalamposan sa buluhaton. Ang Diyos nagpahimutang sa matag usa diha sa iyang kaugalingong dapit sa lawas, ug pinaagi sa nagkalainlaing paglihok sa balaang espiritu ang lawas nagbuhat sa kon unsay gikinahanglan. Ang Ulo, si Jesu-Kristo, ingong tigpataliwala nga membro, nagtagana sa mga membro sa lawas sa mga butang nga ilang gikinahanglan pinaagi sa “mga lutahan niini ug sa mga ugat sa mga lutahan,” ang mga paagi ug mga kahikayan alang sa pagtagana sa espirituwal nga pagkaon ingon man usab sa komunikasyon ug koordinasyon, aron ang “lawas” mapakaon pag-ayo sa espirituwal ug ang matag bahin mahibalo sa buluhaton nga iyang pagabuhaton.​—Col 2:19; Efe 4:16.

Hustong Paggamit sa Lawas. Angayng pabilhan sa usa ka Kristohanon ang lawas nga gihatag sa Diyos kaniya ug angayng higugmaon ang iyang kaugalingon pinaagig hustong pag-atiman sa iyang lawas aron siya makahimo sa pagtanyag niini diha sa dalawaton, sagrado nga pag-alagad sa Diyos. (Rom 12:1) Kini nagkinahanglan sa pagkamakataronganon ug sa pag-atiman sa lawas pinaagig pagkaon ug sa uban pang mga kinahanglanon, ingon man sa paghupot niini nga mahinlo sa pisikal, apan ang ubang matang sa pag-atiman mas labaw pang mahinungdanon. Kini naglangkit sa espirituwalidad, sa pagpangita sa Gingharian sa Diyos ug sa iyang pagkamatarong, ug sa pagpasundayag sa katul-id sa moral. (Mat 6:​25, 31-33; Col 2:20-23; 3:5) Si apostol Pablo nagtambag: “Ang lawasnong pagbansay may diyutayng kapuslanan; apan ang diyosnong pagkamahinalaron mapuslanon sa tanang butang, kay naghupot kini ug saad sa kinabuhi karon ug sa umaabot.”​—1Ti 4:8.

Ang usa ka dinihogang membro sa Kristohanong kongregasyon, ang lawas ni Kristo, nga nakahimog pakighilawas nagkuha sa usa ka membro ni Kristo ug naghimo niini nga membro sa usa ka pampam. Ang bisan kinsa nga Kristohanon nga nakahimog pakighilawas nagdalag kahugawan sa moral ug usab “nagapakasala batok sa iyang kaugalingong [unodnong] lawas.” Siya nagpameligro sa iyang kaugalingon nga matangtang gikan sa lawas ni Kristo, ang templo nga organisasyon, ug nagladlad sa iyang kaugalingon sa kapeligrohan sa makaluod nga mga sakit. (1Co 6:​13, 15-20; Pr 7:1-27) Siya mahimong ‘itugyan sa kongregasyon ngadto kang Satanas alang sa kalaglagan sa unod.’​—1Co 5:5.

Ang usa ka membro sa lawas ni Kristo, ingon man ang ubang dedikadong mga tawo nga nakig-uban niining inanak-sa-espiritung mga membro sa lawas, kinahanglang maglikay dili lamang sa literal nga pakighilawas kondili sa espirituwal nga pakighilawas usab. Ang Kasulatan nagtawag sa usa nga nakighigala sa kalibotan ingong usa ka “mananapaw.” (San 4:4) Si Jesus miingon sa iyang mga tinun-an: “Sila dili bahin sa kalibotan, ingon nga ako dili bahin sa kalibotan.” (Ju 17:16) Busa, si Jesus mainampingon nga kadtong naglangkob sa mga membro sa iyang lawas maoy mahinlo sa moral ug sa espirituwal. (Efe 5:​26, 27) Sila gihisgotan nga ‘nagligo na sa ilang mga lawas pinaagi sa mahinlong tubig.’ (Heb 10:22) Sama sa giingon ni apostol Pablo, nga naghisgot bahin sa mga bana: “Sa ingon niini ang mga bana angay nga maghigugma sa ilang mga asawa sama sa ilang kaugalingong mga lawas. Siya nga nahigugma sa iyang asawa nahigugma sa iyang kaugalingon, kay wala gayoy tawo nga nagdumot sa iyang kaugalingong unod; kondili nagapakaon ug nagapangga niini, ingon sa ginahimo usab ni Kristo sa kongregasyon, tungod kay kita mga sangkap sa iyang lawas. ‘Tungod niini ang lalaki mobiya sa iyang amahan ug sa iyang inahan ug siya moipon sa iyang asawa, ug ang duha mahimong usa ka unod.’ Dako kini nga sagradong tinago. Karon ako nagasulti labot kang Kristo ug sa kongregasyon.”​—Efe 5:28-32.

Tan-awa ang mga bahin sa lawas ubos sa tagsatagsa ka ngalan niini.