Usa ka ngalan nga makita sa Genesis 10:13 ug 1 Cronicas 1:11 nga lakip sa mga kaliwat ni Ham pinaagi kang Mizraim. Sanglit ang Hebreohanong ngalan maoy plural, daghang eskolar nagtuo nga ang usa ka tribo nga nagkuha sa ngalan niini gikan sa usa sa mga anak nga lalaki ni Mizraim mao ang gipasabot. (Apan, tan-awa ang MIZRAIM.) Ang mga Lehabim gituohan sa kadaghanan nga maoy mga Libyanhon ug sa labing menos lagmit naglangkob sa usa sa mga tribo nga nanimuyo sa Libya sa karaang kapanahonan. Bisan tuod kini lisod pamatud-an, tingali sila mao ra ang mga Lu·vimʹ nga gihisgotan sa ubang dapit sa Hebreohanong teksto, sama sa 2 Cronicas 12:​3, diin ang American Standard Version mabasa nga “Lubim” ug sa ubang mga hubad mabasa nga “mga Libyanhon.”​—Mo; NW; RS.