Kini lingin ug porma nga gama sa gahing materyales nga tingali solido o derayos ug makatuyok diha sa ehe niini. Sa karaang kapanahonan, ang mga tabla gitapot sa usag usa, gilingin, ug gibutangan ug panaplin (yantas) aron maporma ang karaang ligid. Ang ligid nga derayos gigamit diha sa mga karo, mga karomata, ug ubang mga sakyanan. (Ex 14:25; Isa 5:28; 28:27) Ang napulo ka kareton nga tumbaga nga gibuhat ni Solomon aron gamiton diha sa templo ni Jehova may ehe nga tumbaga ang matag usa ug upat ka ligid nga tumbaga nga samag ligid sa karo nga 1.5 ka maniko (67 sm; 26 pul.) ang gihabogon, nga may pusodpusod, mga rayos, ug mga yantas.​—1Ha 7:27-33.

Ang magkukulon nagporma sa mga sudlanan nga yutang-kulonon diha sa usa ka nagtuyok nga platoplato nga gitawag ug ligid sa magkukulon. (Jer 18:​3, 4) Lain pa, ang timba mahimong itunton o iisa diha sa usa ka atabay pinaagi sa pisi nga gitaod diha sa usa ka matang sa ligid o moton.​—Ecc 12:6.

Masambingayon ug Mahulagwayon nga Paggamit. Sumala sa Hebreohanon nga Masoretikong teksto, ang Proverbio 20:26 mabasa: “Ang usa ka maalamong hari magapatibulaag sa mga tawong daotan, ug paligiron niya ibabaw nila ang usa ka ligid.” Kini daw nagtumong sa buhat sa usa ka hari nga ikatandi sa paggamit ug ligid sa paggiok ug lugas. (Itandi ang Isa 28:​27, 28.) Ang maong metapora mopatim-awng nagpakita nga ang maalamong hari molihok dayon sa paglain sa mga tawong daotan gikan sa mga matarong ug sa pagsilot sa daotan. Sa ingon ang daotan masugpo diha sa iyang dominyo. (Itandi ang Pr 20:8.) Apan, pinaagi sa paghimog diyutayng kausaban, kini nga bersikulo nag-ingon nga paligiron sa maalamong hari nganha sa daotan ang “ilang kaugalingong pagkamadaoton.”

Ang dili-makontrolar nga dila maoy usa ka “kalayo” nga ‘nagpadilaab sa ligid sa kinaiyanhong kinabuhi.’ Ang enterong pagtuyok o dagan sa  kinaiyanhong kinabuhi nga nagsugod sukad sa pagkahimugso mahimong mapadilaab pinaagi sa dila, nga magpahinabo sa kinabuhi nga makasinatig sublisubling mga kadaot, nga lagmit mosangpot gani sa kaugalingong kalaglagan nga daw pinaagi sa kalayo.​—San 3:6.

Daplin sa suba sa Kebar sa yuta sa mga Caldeanhon panahon sa ikalimang tuig sa pagkadestiyero ni Haring Jehoiakin, nakita ni Ezequiel sa panan-awon si Jehova nga nagsakay sa nagkilab nga samag karong sakyanan sa kalangitan. Ang upat ka ligid niini adunay mga yantas nga puno sa mga mata, ug sulod sa matag ligid mao ang laing ligid nga pababag, nga nagpaposible niini sa pag-abante o sa pagliso sa bisan haing kiliran nga dili usbon ang anggulo sa mga ligid. Tupad sa matag ligid dihay usa ka kerubin, ang buhing linalang nga mga kerubin ug ang mga ligid dungan sa paglihok samtang kini gitultolan sa espiritu. (Eze 1:1-3, 15-21; 3:13) Sa pagkasunod tuig, si Ezequiel may samang panan-awon, nga niining panahona siya gidala, nga lagmit pinaagi sa espiritu sa pag-inspirar, ngadto sa usa ka dapit sa atubangan sa templo nga gitukod ni Solomon didto sa Jerusalem. Ang panan-awon nga iyang nakita nagpaila nga sa dili madugay ang siyudad ug ang templo pagalaglagon ingong pagpahamtang sa hudisyal nga hukom ni Jehova. (Eze 8:1-3; 10:1-19; 11:22) Mga 60 ka tuig human niadto, nakita ni Daniel sa panan-awon ang Karaan sa mga Adlaw, si Jehova, nga naglingkod sa usa ka langitnon, deligid nga trono. Ang trono ug ang mga ligid nagdilaab, nga nagpaila sa nagsingabot nga kalayonhong paghukom sa Diyos batok sa mga gahom sa kalibotan.​—Dan 7:​1, 9, 10; Sal 97:1-3.