Kini nga ekspresyon makita lamang diha sa basahon sa Pinadayag ug dayag nga kini simboliko. Ang Bibliya naghatag sa kaugalingon niining pagpatin-aw ug paghubit sa simbolo pinaagi sa pag-ingon: “Mao kini ang ikaduhang  kamatayon, ang linaw nga kalayo.”​—Pin 20:14; 21:8.

Ang simbolikong kinaiyahan sa linaw nga kalayo dugang madayag gikan sa konteksto sa mga paghisgot niini diha sa basahon sa Pinadayag. Ang kamatayon giingong igatambog ngadto niining linaw nga kalayo. (Pin 19:20; 20:14) Dayag nga ang kamatayon dili masunog sa literal. Dugang pa, ang Yawa, usa ka dili-makitang espiritung linalang, igatambog ngadto sa linaw. Kay espiritu, siya dili masakitan sa literal nga kalayo.​—Pin 20:10; itandi ang Ex 3:2 ug Huk 13:20.

Sanglit ang linaw nga kalayo naghawas sa “ikaduhang kamatayon” ug sanglit ang Pinadayag 20:14 nag-ingon nga “ang kamatayon ug ang Hades” igatambog ngadto niini, dayag nga ang linaw dili mahimong maghawas sa kamatayon nga napanunod sa tawo gikan kang Adan (Rom 5:12), ni kini nagtumong sa Hades (Sheol). Busa, kini nagsimbolo gayod sa laing matang sa kamatayon, usa nga dili na mabakwi, kay ang rekord wala gayod maghisgot nga ang “linaw” nagtugyan niadtong diha niini, ingon sa gibuhat sa Adanikong kamatayon ug sa Hades (Sheol). (Pin 20:13) Tungod niana, kadtong wala mahisulat diha sa “basahon sa kinabuhi,” ang dili-mahinulsolong mga magsusupak sa pagkasoberano sa Diyos, gitambog ngadto sa linaw nga kalayo, nga nagkahulogan sa walay kataposang kalaglagan, o sa ikaduhang kamatayon.​—Pin 20:15.

Bisan tuod nga ang nahisgotang mga teksto nagpadayag sa simbolikong kinaiyahan sa linaw nga kalayo, gigamit kini sa pipila ka tawo sa pagsuportar sa pagtuo sa usa ka literal nga dapit sa kalayo ug pagsakit. Ang Pinadayag 20:10 mao ang gibasehan, tungod kay kini naghisgot sa Yawa, sa mapintas nga mananap, ug sa mini nga manalagna ingong ‘gisakit adlaw ug gabii hangtod sa kahangtoran’ diha sa linaw nga kalayo. Apan, wala kini magtumong sa aktuwal nga may panimuot nga pagsakit. Kadtong gitambog sa linaw nga kalayo makaagom sa “ikaduhang kamatayon.” (Pin 20:14) Wala nay panimuot diha sa kamatayon ug, busa, walay pagbati sa kasakit o pag-antos.​—Ecc 9:5.

Sa Kasulatan ang kalayonhong pagsakit gilangkit sa kalaglagan ug kamatayon. Pananglitan, diha sa Gregong Septuagint nga hubad sa Hebreohanong Kasulatan ang pulong alang sa pagsakit (baʹsa·nos) gigamit sa ubay-ubayng higayon maylabot sa silot nga kamatayon. (Eze 3:20; 32:​24, 30) Sa susama, mahitungod sa Dakong Babilonya, ang basahon sa Pinadayag nag-ingon, “ang mga hari sa yuta . . . manghilak ug magpamukpok sa ilang kaugalingon sa kasubo tungod kaniya, sa dihang sila motan-aw sa aso sa iyang pagkasunog, samtang magtindog sila sa halayo tungod sa ilang kahadlok sa iyang kasakit [Gr., ba·sa·ni·smouʹ].” (Pin 18:​9, 10) Maylabot sa kahulogan sa pagsakit, ang usa ka manulonda sa ulahi nagpatin-aw: “Sa ingon niini ka tulin nga pagtambog nga ang dakong siyudad sa Babilonya igatambog, ug siya dili na gayod igkita pa.” (Pin 18:21) Busa, ang kalayonhong pagsakit dinhi maoy katumbas sa kalaglagan, ug maylabot sa Dakong Babilonya, kini mao ang walay kataposang kalaglagan.​—Itandi ang Pin 17:16; 18:​8, 15-17, 19.

Tungod niini, kadtong ‘gisakit sa walay kataposan’ (gikan sa Gr. nga ba·sa·niʹzo) diha sa linaw nga kalayo makaagom sa “ikaduhang kamatayon” nga gikan niini wala nay pagkabanhaw. Ang kaamgid nga Gregong pulong nga ba·sa·ni·stesʹ gihubad nga “magbalantay sa bilanggoan” diha sa Mateo 18:34. (RS, NW, ED; itandi ang ber 30.) Busa kadtong itambog sa linaw nga kalayo matanggong, o “mabilanggo,” sa kamatayon hangtod sa kahangtoran.​—Tan-awa ang GEHENNA; PAGSAKIT.