FEATURE

Lunop sa Adlaw ni Noe

I-PLAY

KAPIN sa 4,350 ka tuig kanhi, sumala sa makasaysayanhong rekord sa Bibliya, ang mga ganghaan sa tubig sa kalangitan nangabuksan ug ang usa ka lunop mitabon sa tibuok yuta. Ang dili-diyosnon, mapintas nga mga tawo ug ang tanan nga wala magpakabana sa pasidaan sa Diyos nalaglag. Ang matarong lamang nga si Noe ug ang iyang pamilya, walo ka tawo tanan, ang naluwas sa Lunop uban sa limitadong gidaghanon sa tagsatagsa ka matang sa hayop sakay sa usa ka dakong arka nga gihimo ubos sa pagtultol sa Diyos.—Gen 7:1-24.

Ang kamatuoran nga ang Lunop nahitabo gayod gipamatud-an sa ubay-ubayng mga magsusulat sa Bibliya. (Isa 54:9; 2Pe 3:5, 6; Heb 11:7) Apan, ang labing lig-ong pamatuod mao ang testimonya ni Jesu-Kristo, kinsa usa ka saksing-nakakita didto sa mga langit. (Itandi ang Ju 8:58.) Tataw siyang miingon: “Sa mga adlaw ni Noe, . . . ang lunop miabot ug naglaglag kanilang tanan.”—Luc 17:26, 27.

Ang asoy bahin sa Lunop dili lamang usa ka sugilanon. Gipakita ni Jesu-Kristo nga kini adunay matagnaong kahulogan. Sa iyang tagna mahitungod sa “kataposan sa sistema sa mga butang,” espesipiko niyang gihisgotan ang “mga adlaw ni Noe.” Iyang gipunting ang Lunop ingong pasidaang panig-ingnan sa usa ka mas dakong kalaglagan nga moabot panahon sa “presensiya sa Anak sa tawo.”—Mat 24:3, 37-39.

Masulod Kaha sa Arka ang Tanang Hayop?

Tinuod nga ang mga ensiklopedia naghisgot ug kapin sa usa ka milyon ka espisye sa mga hayop. Apan si Noe gisugo sa pagpreserbar lamang sa mga hawas sa matag “matang” sa mga hayop sa yuta ug sa nagalupad nga linalang. Ang pipila ka tigpanukiduki miingon nga 43 lamang ka “matang” sa mga sus-an nga hayop, 74 ka “matang” sa mga langgam, ug 10 ka “matang” sa mga reptilya ang makapatungha sa nagkadaiyang espisye niini nga mga linalang nga nailhan karong adlawa. Ang arka adunay mga 40,000 ku m (1,400,000 ku p) nga luna—nga sobra pa kaayo para sa tanan nga pasahero

Diin Mipaingon ang mga Tubig sa Lunop?

Dayag nga kini ania ra gihapon sa yuta. Karong adlawa adunay mga 1.4 ka bilyong ku km (326 ka milyong ku mi) nga tubig dinhi sa yuta. Kini nagtabon sa kapin sa 70 porsiyento sa nawong sa globo. Ang aberids nga giladmon sa kadagatan maoy 4 km (2.5 mi); ang aberids nga gihabogon sa yuta maoy 0.8 km (0.5 mi) lamang ibabaw sa lebel sa dagat. Kon ang nawong sa yuta patagon, kini matabonan sa tubig sa giladmon nga 2,400 m (8,000 p)

Mga Leyenda sa Lunop. Mga pananglitan gikan sa unom ka kontinente ug mga kapuloan sa dagat; ginatos sa maong mga leyenda ang nahibaloan

Pagpasig-uli sa mibagtik nga mammoth (usa ka matang sa elepante) nga nakaplagan sa Siberia niadtong 1901. Human sa linibo ka katuigan, ang gikaon nga mga tanom diha pa sa baba niini. Nakita sa pipila diha niini, ingon man diha sa ubang mga butang sama sa mga fossil sa dagat nga nakaplagan sa hatag-as nga mga bukid, ang makapakombinsir nga pamatuod sa usa ka kalit ug malaglagon nga tibuok-globong lunop

Pagtugkad sa Kasulatan 2