Usa ka sudlanan nga pormag panaksan sa sulod, nga diha niini ang lugas, yerbang-paalimyon, olibo, o ubang mga substansiya lubkon ginamit ang usa ka alho.

Ang mga dibuho sa Ehiptohanong lubnganan naghulagway sa mga lusong nga daghan ug sulod. Lagmit kini maoy mga lusong nga kahoy ug lagmit nga ang mga alho maoy gama sa metal. May dibuho sa usa ka lubnganan nga nagpakita sa duha ka lalaki nga naglubok diha sa usa ka lusong, nga nag-ulhosay sa paglubok pinaagi sa ilang metal nga mga alho (nga pormag puspos ang duha ka tumoy), nga ilang gigunitan ang tunga pinaagi sa duha ka kamot. Ang dibuho nagpakita nga human malubok pag-ayo ang igong gidaghanon sa lugas nga diha sa lusong, kini ayagon sa laing sudlanan ug ang dili pa kaayo pino ibalik ngadto sa lusong aron padayong lubkon.

Didto sa kamingawan ang mga Israelinhon nag-andam sa mana alang sa pagkaon pinaagi sa paggaling niini ginamit ang mga galingan nga demano o sa paglubok niini diha sa usa ka lusong (Heb., medho·khahʹ).​—Num 11:7, 8.

Ang kinamaayohang lana sa olibo mabatonan pinaagi sa paglubok sa mga olibo diha sa usa ka lusong ginamit ang usa ka alho. Kini magpatunghag lana gikan lamang sa unod sa olibo, samtang ang pug-anan magdugmok usab sa mga liso niini. Ang  lunsay, linubok nga lana sa olibo mao ang gikinahanglan aron mapasiga ang mga tangkawan didto sa tolda nga tagboanan. Ang linubok nga lana gigamit usab maylabot sa “makanunayong halad-nga-sinunog” ug dayag nga gigamit alang sa balaang igdidihog nga lana. Ang pinong pagkalubok nga insenso mao ang gigamit diha sa sangtuwaryo.​—Ex 27:20, 21; 29:40, 42; 30:23-25, 35, 36.

Sanglit ang lusong adunay lubyok sa sulod, kini haom nga gigamit sa Bibliya sa paghubit sa usa ka espesipikong porma sa yuta. Pananglitan, sumala sa Maghuhukom 15:18, 19, ang Diyos nagtaganag ilimnong tubig kang Samson pinaagi sa pagpikas sa “pormag-lusong nga lungag” (Heb., makh·teshʹ) didto sa Lehi. Lain pa, ang usa ka seksiyon sa Jerusalem, ang “Maktes” o “Dapit sa Lusong” (Heb., Makh·teshʹ, nga nagkahulogang “lusong”), lagmit nga ginganlan sa ingon tungod sa samag-dulang nga lubyok o hulpa sa maong luna sa siyudad.​—Sof 1:​11, ftn sa Rbi8.

Aron mahimong harina ang lugas diha sa lusong kini lubkon pag-ayo. Busa, ang Kasulatan naggamit niini nga paglubok sa masambingayong paagi, nga nag-ingon: “Bisan pag dugmokon nimo ang buangbuang pinaagi sa alho sa lusong [Heb., bam·makh·teshʹ], lakip sa linubok nga mga lugas, ang iyang kabuang dili mobiya kaniya.”​—Pr 27:22.