Ang laway nga ipagula gikan sa baba sa usa ka tawo. Ang pagluwa nganha sa usa ka tawo o diha sa iyang nawong maoy usa ka buhat sa grabeng pagtamay, pagdumot, o kasuko, nga nagpakaulaw sa biktima. (Num 12:14) Si Job, tungod sa iyang kasakitan, nahimong tumong sa maong pagpasundayag sa pagdumot. (Job 17:6; 30:10) Ingong publikong pagpakaulaw sa usa ka lalaki sa Israel nga midumili sa paghimog kaminyoon sa bayaw nga lalaki ilalom sa Moisesnong Balaod, ang gisalikway nga babayeng balo maghubo sa sandalyas sa maong lalaki gikan sa iyang tiil ug magluwa sa iyang nawong atubangan sa mga ansiyano sa iyang siyudad.​—Deu 25:7-10.

Si Jesu-Kristo giluwaan sa dihang siya miatubang sa Sanhedrin (Mat 26:59-68; Mar 14:65) ug giluwaan sa Romanong mga sundalo human sa paghusay ni Pilato kaniya. (Mat 27:27-30; Mar 15:19) Gitagna nang daan ni Jesus nga iyang maagoman ang maong matamayong pagtratar (Mar 10:32-34; Luc 18:​31, 32), ug kini nagtuman sa matagnaong mga pulong: “Wala nako itago ang akong nawong gikan sa mga pakaulaw ug sa pagluwa.”​—Isa 50:6.

Sa kasukwahi, sa tulo ka okasyon diha sa rekord sa Bibliya, si Jesu-Kristo migamit sa iyang laway sa dihang milagrosong nag-ayo sa mga tawo. (Mar 7:31-37; 8:22-26; Ju 9:1-7) Sanglit ang nahimo ni Jesus maoy milagroso ug ang mga milagro ni Jesus gihimo ubos sa gahom sa espiritu sa Diyos, ang paggamit ni Kristo sa iyang kaugalingong laway niini nga mga kahimtang maoy dili usa ka epektibong paggamit lamang sa usa ka butang nga sa kinaiyanhon makaayo.