Ang ngalan sa ubay-ubayng mga tawo ug sa usa ka gingharian.

[1-9: lagmit gikan sa lintunganayng pulong nga nagkahulogang “pagpuga”]

1. Usa ka anak nga natawo kang Nahor, ang igsoong lalaki ni Abraham, pinaagi sa iyang puyopuyo nga si Reuma. Ang bata dayag nga usa ka lalaki, sanglit ang ngalan sa usa ka gingharian ug sa mga molupyo niini naggikan niining tawhana.​—Gen 22:​23, 24; 2Sa 10:​6, 8.

2. Asawa sa Manasesnon nga si Makir.​—1Cr 7:14-16.

3. Usa sa mga puyopuyo ni Caleb (ang anak nga lalaki ni Hesron) kinsa nanganak sa ubay-ubayng mga anak ni Caleb.​—1Cr 2:​18, 48, 49.

4. Ang asawa ni Jeiel nga “amahan ni Gabaon.”​—1Cr 8:29; 9:35.

5. Usa sa mga asawa ni David ug ang anak nga babaye ni Talmai nga hari sa Gesur. Siya mao ang inahan ni Absalom.​—2Sa 3:​2, 3; 1Cr 3:​1, 2.

6. Amahan o katigulangan ni Hanan, usa ka gamhanang tawo sa kasundalohan ni David.​—1Cr 11:​26, 43.

7. Amahan o katigulangan ni Sepatias, usa ka prinsipe sa Israel nga tinudlong pangulo sa mga Simeonhon sa pag-organisar ni David sa pag-alagad alang sa hari.​—1Cr 27:​1, 16, 22.

8. Amahan ni Akis, hari sa Gat, nga kaniya midangop ang mga ulipon ni Simei sa unang bahin sa paghari ni Solomon. (1Ha 2:39) Kini nga Maaca lagmit mao ra usab si Maok sa 1 Samuel 27:2.​—Tan-awa ang MAOK.

9. Ang apo nga babaye ni Absalom, kinsa mao ang minahal kaayong asawa ni Haring Rehoboam sa Juda ug ang inahan ni Haring Abias (Abiam). (2Cr 11:20-22; 1Ha 15:​1, 2, 9, 10) Giisip siya ingong “mahal nga ginang” sa gingharian, ingong inahan nga rayna, hangtod nga ang iyang apong lalaki nga si Haring Asa, sa pagpasig-uli sa matuod nga pagsimba, nagtangtang kaniya “tungod kay siya naghimo ug usa ka makalilisang nga idolo alang sa sagradong poste,” o kang Asera. (1Ha 15:9-13; 2Cr 15:16) Siya gitawag ug Micaias sa 2 Cronicas 13:2.

10. Ang usa ka gamayng gingharian nga naglungtad sa A sa Palestina sa dihang misulong ang Israel, gitawag usab ug Maacat. Kining dapita dayag nga lakip sa teritoryo sa tribo ni Manases, apan ang rekord nagpakita nga ang mga Israelinhon wala magpapahawa sa mga molupyo nianang yutaa, sa ingon ‘sila nagpadayon pagpuyo taliwala sa Israel.’ (Deu 3:14; Jos 13:13) Sagad nga gilangkit sa silingang gingharian sa Gesur, ang Maaca mopatim-awng nahimutang sa A niana nga gingharian ug lagmit mao ang utlanan sa rehiyon sa Basan. (Jos 12:5) Kasagarang gituohan nga kini nahimutang sa dapit gikan sa habagatang mga bakilid sa Bukid sa Hermon hangtod sa Dal-as sa Hula ug gikan sa Suba sa Jordan pasidlakan ngadto sa kilid sa Desyerto sa Sirya, o, mao ang amihanang bahin sa presenteng adlaw nga distrito sa Golan.

Ang Maaca maoy usa ka Aramaeanhon (Siryanhon) nga gingharian, ang katawhan niini lagmit naggikan sa anak nga lalaki ni Nahor nga may parehong ngalan. (Gen 22:24; 1Cr 19:6) Sa dihang ang mga Ammonhanon nakiggubat kang Haring David, ilang gibayran ang hari sa Maaca, ug ang uban pa aron tabangan sila. Ang diyutayng kasundalohan nga gitagana sa Maaca, kon itandi sa gidaghanon sa ubang mga kaalyado, tingali nagpaila sa kagamay sa gingharian sa mga Maacatnon. (2Sa 10:6-8) Ang kadaogan ni Joab batok sa mga Ammonhanon ug sa ilang kaalyadong mga Siryanhon gisundan ug dugang kadaogan ni Haring David batok sa mga Siryanhon. (2Sa 10:13-19) Pinasukad sa mas ulahing mga asoy, lagmit nga ang gingharian sa Maaca sa kataposan nailalom sa gingharian sa Damasco.