Kini nagtumong sa maayong balita sa Gingharian sa Diyos ug sa kaluwasan pinaagi sa pagtuo kang Jesu-Kristo. Kini gitawag sa Bibliya nga “maayong balita sa gingharian” (Mat 4:23), “maayong balita sa Diyos” (Rom 15:16), “maayong balita mahitungod kang Jesu-Kristo” (Mar 1:1), “maayong balita bahin sa dili-takos nga kalulot sa Diyos” (Buh 20:24), “maayong balita sa pakigdait” (Efe 6:15), ug ang “walay kataposang maayong balita” (Pin 14:6).

Ang Gregong pulong nga gihubad nga “maayong balita” (“ebanghelyo” sa KJ ug sa pipila ka ubang mga bersiyon) mao ang eu·ag·geʹli·on. Ang “usa ka  tig-ebanghelyo” (ang Cebuano nga pulong halos maoy katumbas nga espeling sa Grego) maoy usa ka magwawali sa maayong balita.​—Buh 21:8; 2Ti 4:5.

Ang Kaundan Niini. Ang usa ka ideya sa kaundan ug kabug-osan sa maayong balita mahimong mabatonan gikan sa gihisgotan na nga mga ekspresyon. Kini naglakip sa tanang kamatuoran nga labot niana namulong si Jesus ug misulat ang mga tinun-an. Bisan tuod ang mga tawo sa kakaraanan naglaom sa Diyos ug nagbaton ug pagtuo pinaagi sa kahibalo bahin Kaniya, ang katuyoan ug dili-takos nga kalulot sa Diyos unang “tin-awng gipakita pinaagi sa pagpadayag sa atong Manluluwas, si Kristo Jesus, kinsa naghanaw sa kamatayon apan naghatag ug kahayag nganha sa kinabuhi ug sa pagkadili-madunoton pinaagi sa maayong balita.”​—2Ti 1:9, 10.

Kasiglohan una pa niana gipahayag sa Diyos ang maayong balita ngadto kang Abraham, sa ingon gipaila ang galamiton nga pinaagi niana buot niyang itagana ang maayong balita. Siya miingon: “Pinaagi kanimo ang tanang nasod mapanalanginan.” (Gal 3:8) Sa ulahi, pinaagi sa manalagnang si Isaias, si Jehova namulong bahin sa pagwali sa maayong balita. Si Jesu-Kristo mibasa gikan niini nga tagna didto sa sinagoga sa Nasaret, ug human niana miingon: “Karong adlawa kining kasulatan nga bag-o lang ninyo nga nadungog natuman.” (Luc 4:16-21) Gihubit sa tagna ni Isaias ang katuyoan ug resulta sa pagwali sa maayong balita, ilabina sukad sa pag-abot sa Mesiyas.​—Isa 61:1-3.

Ang Kaugmaran Niini. Sa pagkatawo ni Jesus ang manulonda nagpahibalo sa mga magbalantay sa karnero: “Ayaw kahadlok, kay, tan-awa! ako nagapahayag kaninyo ug maayong balita sa dakong kalipay nga mabatonan sa tanang tawo.” (Luc 2:10) Giandam ni Juan nga Tigbawtismo ang dalan alang sa pagwali ni Jesus sa maayong balita, nga nag-ingon ngadto sa mga Hudiyo: “Paghinulsol kamo, kay ang gingharian sa mga langit haduol na.” (Mat 3:1, 2) Si Jesus miingon bahin sa pagwali ni Juan: “Sukad sa mga adlaw ni Juan nga Bawtista hangtod karon ang gingharian sa mga langit mao ang tumong nga ginapakigbisogan sa mga tawo, ug ginasakmit kini niadtong nagapakigbisog.”​—Mat 11:12.

Sa panahon sa yutan-ong ministeryo ni Jesus, siya nagwali sa maayong balita ngadto lamang sa mga Hudiyo ug mga kinabig, nga nag-ingon: “Ako wala ipadala ngadto kang bisan kinsa gawas lamang ngadto sa nawalang mga karnero sa balay sa Israel.” (Mat 15:24) Sa dihang gipadala ang 12 ka apostoles, siya nagsugo kanila: “Ayaw pag-adto sa dalan sa mga nasod, ug ayaw pagsulod sa usa ka siyudad sa mga Samarianhon; apan, hinunoa, adto kanunay sa nawalang mga karnero sa balay sa Israel.” (Mat 10:5, 6) Sa usa ka higayon gisangyawan niya ang usa ka babaye nga usa sa mga Samarianhon, nga kabanay sa mga Israelinhon, apan dili kini tungod kay siya miadto sa maong siyudad aron magwali. Hinunoa, ang sanong sa maong babaye ug sa uban pa maoy paborable kaayo nga tungod niana si Jesus nagpabilin uban kanila sulod sa duha ka adlaw.​—Ju 4:7-42.

Human sa pagkamatay ug pagkabanhaw ni Jesus, siya nagsugo sa iyang mga tinun-an: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.” (Mat 28:19, 20) Siya usab misulti kanila nga ang ilang pagwali moabot hangtod “sa kinalay-ang dapit sa yuta.” (Buh 1:8) Apan mga tulo ug tunga ka tuig human niana gigiyahan sa balaang espiritu ang mga tinun-an nga sila magwali ngadto lamang sa mga Hudiyo ug mga Samarianhon. Dayon si Pedro gisugo sa Diyos sa pagdala sa maayong balita ngadto sa panimalay sa opisyal sa Romanhong kasundalohan nga si Cornelio. (Buh kap 10, 11; 15:7) Sukad sa maong panahon, ang maayong balita gipahayag sa tanang dapit nga mahimong maabot.

Ang Kahinungdanon Niini. Si apostol Pablo misulat uban ang kusganong pagsalig bahin sa kaluwasan nga gitagana sa Diyos pinaagi kang Jesu-Kristo. Siya miingon nga kon may bisan kinsa nga magpahayag ngadto sa mga taga-Galacia ug usa ka butang nga sukwahi sa ilang nakat-onan, usa gayod ka lahi nga pagtulon-an, “matinunglo siya.” Dayon, naghisgot sa tinubdan sa maayong balita nga iyang gipahayag, si Pablo miingon: “Wala ko kini dawata gikan sa tawo, ni ako gitudloan niini, kondili pinaagi sa pagpadayag gikan ni Jesu-Kristo.” (Gal 1:8, 11, 12) Gikinahanglan kining kusganon nga pahayag, kay bisan niadtong panahona adunay pipila nga misulay sa pagpukan sa matuod nga pagtuo pinaagi sa pagwali ug ‘lain nga maayong balita.’ (2Co 11:4; Gal 1:6, 7) Si Pablo mipasidaan bahin sa apostasya nga moabot ug miingon nga ‘ang misteryo sa kalapasan’ naglihok na; iyang gipahimangnoan ang mga Kristohanon nga hinumdoman ang katuyoan sa maayong balita ug mobarog nga malig-on ug magpabilin sa ilang paghupot sa giniyahan-sa-espiritu nga mga tradisyon nga ilang nakat-onan pinaagi sa mga apostoles.​—2Te 2:3, 7, 14, 15; tan-awa ang TRADISYON.

Ang pagkamatinumanon sa paghupot ug sa pagpadayon sa pagmantala sa maayong balita giisip ni Jesus nga mas importante pa kay sa presenteng kinabuhi mismo, ug giila ni Pablo nga ang matinumanong pagpahayag niini mahinungdanon kaayo. (Mar 8:35; 1Co 9:16; 2Ti 1:8) Ang indibiduwal  mahimong mawad-an sa iyang labing bililhong mga katigayonan, gani makaagom ug mga paglutos apan, sa baylo, makadawat ug usa ka gatos ka pilo karon, “mga balay ug mga igsoong lalaki ug mga igsoong babaye ug mga inahan ug mga anak ug kaumahan, . . . ug sa umaabot nga sistema sa mga butang sa kinabuhing walay kataposan.”​—Mar 10:29, 30.

Ang maayong balita maoy usa ka sukdanan nga pinaagi niana ang katawhan pagahukman: Ang pagdawat ug ang pagkamasinugtanon sa maayong balita moresulta sa kaluwasan; ang pagsalikway ug ang pagkadili-masinugtanon mosangpot sa kalaglagan. (1Pe 4:5, 6, 17; 2Te 1:6-8) Tungod niini, ang motibo sa usa ka indibiduwal sa pagwali sa maayong balita kinahanglang lunsay ug siya kinahanglang magawali niini nga kinasingkasing, tungod sa gugma alang niadtong nagpatalinghog. Ang mga apostoles mapabilhon kaayo sa kahinungdanon sa maayong balita nga mohatag ug kinabuhi ug nadasig pag-ayo tungod sa espiritu sa Diyos ug sa gugma nga gumikan niana ilang gipaambit dili lamang ang maayong balita kondili usab ang ilang “kaugalingong mga kalag” ngadto sa mga nagpatalinghog sa ilang pagwali. (1Te 2:8) Ang Diyos nagpahayag nga ang mga magmamantala sa maayong balita adunay katungod sa pagdawat ug materyal nga tabang gikan niadtong ilang gidad-an niini. (1Co 9:11-14) Apan si Pablo ug ang iyang suod nga mga kauban nagmahal pag-ayo sa ilang pribilehiyo ingong tigdala sa maayong balita nga tungod niana sila mainampingong naglikay sa pagbaton ug pinansiyal nga ganansiya gikan niini, o bisan sa paghatag ug impresyon nga sila angayng makadawat niana may kalabotan sa ilang pagwali. Gihubit ni apostol Pablo ang iyang panggawi maylabot niini diha sa 1 Corinto 9:15-18 ug 1 Tesalonica 2:6, 9.

Mga Kaaway. Ang maayong balita hilabihang gisupak, ug ang tinubdan sa pagpakigbatok niini, gipaila sa apostol: “Kon, karon, ang maayong balita nga among ginapahayag sa pagkatinuod gitaptapan man, kini gitaptapan taliwala niadtong nagakalaglag, taliwala kanilang ang diyos niini nga sistema sa mga butang nagbuta sa mga hunahuna sa mga dili-magtutuo, aron nga ang kahayag sa mahimayaong maayong balita bahin kang Kristo, nga mao ang larawan sa Diyos, dili makadan-ag.” (2Co 4:​3, 4) Ang kinaunahang mga kaaway sa maayong balita mao ang relihiyosong mga pangulo sa mga Hudiyo. Apan, tungod sa ilang pagpakigbatok niini ang maayong balita nakaabot ngadto sa mga Hentil, o sa katawhan sa kanasoran, nga tungod niana kini nagbukas sa kahigayonan aron ang mga Hentil mahimong mga isigkamag-aambit sa “saad nga nahiusa kang Kristo Jesus pinaagi sa maayong balita.”​—Rom 11:25, 28; Efe 3:5, 6.

Ang mga kaaway sa maayong balita nagpahinabo sa mga Kristohanon ug grabeng pag-antos ug tungod niini ang mga apostoles kinahanglang mohimog kusganong pakigbisog sa atubangan sa mga magmamando sa pagdepensa ug sa pagtukod sa legal nga paagi sa maayong balita aron kini mokaylap nga walay kababagan.​—Flp 1:7, 16; itandi ang Mar 13:9-13; Buh 4:18-20; 5:27-29.

Ang Yutan-ong Ministeryo ni Jesus ug ang Iyang Pagbalik. Angayng matikdan nga, sa mga unom ka bulan sa wala pa si Jesus moadto kaniya aron magpabawtismo, si Juan nga Tigbawtismo nagwali: “Paghinulsol kamo, kay ang gingharian sa mga langit haduol na,” ug sa dihang si Jesus mitungha na, si Juan nagtawag kang Jesus ingong “ang Kordero sa Diyos nga magakuha sa sala sa kalibotan!” (Mat 3:1, 2; Ju 1:29) Busa iyang giliso ang pagtagad sa katawhan ngadto sa dugay nang gipaabot nga Mesiyanikong Hari.​—Buh 19:4.

Samtang si Jesus dinhi sa yuta, siya ug ang iyang mga tinun-an nagmantala: “Ang gingharian sa mga langit haduol na.” (Mat 4:17; 10:7) Si Jesus, nga gidihogan ingong Kristo, ang Hari, miingon ngadto sa mga Pariseo nga iyang mga kaaway: “Ang gingharian sa Diyos anaa sa inyong taliwala.” (Luc 17:20, 21) Kini mao ang tema, o labing hinungdanong punto, sa maayong balita sa panahon sa yutan-ong ministeryo ni Jesus. Apan, wala hisgoti nga human mamatay si Jesus ang mga tinun-an nagmantala sa Gingharian ingong “haduol na.” Hinunoa, ang maayong balita nga ilang giwali mao nga human itugyan ni Jesus ang iyang kinabuhi ingong lukat alang sa kaluwasan, siya mikayab sa langit ug nianang panahona milingkod sa tuong kamot sa Diyos. Sila nagwali usab bahin sa pagbalik ni Jesus sa ulahing panahon ug sa pag-abot sa iyang Gingharian.​—Heb 10:12, 13; 2Ti 4:1; Pin 11:15; 12:10; 22:20; itandi ang Luc 19:12, 15.

Ang mga tinun-an ni Jesus nangutana kaniya, “Unsa man unya ang ilhanan sa imong presensiya ug sa kataposan sa sistema sa mga butang?” Sa iyang tubag gitagsatagsa paghisgot ni Jesus ang pipila ka butang nga tinong moabot nianang panahona. Lakip sa ubang mga butang siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mat 24:3, 14; Mar 13:10; itandi ang Col 1:23.) Diha sa Pinadayag nga gihatag kang apostol Juan niadtong mga 96 K.P., nakita ni Juan ang usa ka “manulonda nga naglupad sa kinatung-an sa langit” kinsa adunay “walay kataposang maayong balita nga ipahayag ingong makapalipay nga balita ngadto sa nanagpuyo sa yuta, ug ngadto sa matag nasod ug tribo ug pinulongan ug katawhan, nga sa makusog nga tingog nagaingon: ‘Kahadloki ninyo ang Diyos ug ihatag kaniya ang  himaya, kay ang takna sa iyang paghukom miabot na.’” (Pin 14:6, 7) Kining inspiradong mga pahayag nagpaila nga niining “kataposang mga adlaw” mahitabo ang dili-hitupngan nga pagmantala sa maayong balita sa Gingharian.