Ang usa nga nagtener sa mga tawong giakusahan tungod sa paglapas sa balaod; usa ka guwardiya sa bilanggoan. Duha ka Gregong pulong diha sa Kasulatan ang gihubad ingong magbalantay sa bilanggoan: ang ba·sa·ni·stesʹ, nga nagkahulogang “tigsakit,” ug ang de·smo·phyʹlax, usa ka kombinasyon sa de·smosʹ (gapos, talikala sa tiil) ug phyʹlax (guwardiya).

Ang mga magbalantay sa bilanggoan sagad grabeng magsakit sa mga binilanggo, busa sila gitawag ug ba·sa·ni·stesʹ. Pananglitan, ang mga utangan usahay ibalhog sa bilanggoan tungod kay wala makabayad sa ilang giutang. Didto ang magbalantay sa bilanggoan lagmit maglapdos ug magsakit kanila, ug sumala sa giingon ni Jesus, sila dili buhian hangtod nga sila ‘makabayad sa kataposang sensilyo nga kubos kaayo ug bili.’ (Mat 5:​25, 26) Mao usab kini ang punto sa sambingay ni Jesus bahin sa dili-maluluy-ong ulipon. Sa dihang nasayran sa agalon ang gibuhat sa iyang ingrato nga ulipon, siya “mitugyan kaniya ngadto sa mga magbalantay sa bilanggoan [ba·sa·ni·staisʹ], hangtod nga mabayran niya ang tanang utang.”​—Mat 18:​34, 35; itandi ang Pin 14:​11, diin ang “kasakit” gihubad gikan sa ba·sa·ni·smouʹ.

Kon makapuga ang mga binilanggo, ang mga magbalantay sa bilanggoan mao ang makaagom sa silot nga ipahamtang ngadto sa mga pugante, sumala sa Romanhong kostumbre. Busa, sa dihang si Pedro gipagawas sa manulonda gikan sa bilanggoan, atong mabasa nga “giusisa [ni Herodes] ang mga guwardiya ug nagsugo nga sila dad-on aron silotan.”​—Buh 12:19.

Sa Filipos, si Pablo ug Silas gitaral atubangan sa mga mahistrado sibil nga nagsugo nga sila garotehon, ug “human nila mabunali sila sa makadaghan, ilang gibalhog sila sa bilanggoan, nga nagsugo sa magbalantay sa bilanggoan [de·smo·phyʹla·ki] nga bantayan sila pag-ayo. Tungod kay iyang nadawat ang maong sugo, iyang gibalhog sila sa sulod nga bahin sa bilanggoan ug gipahuot ang ilang mga tiil diha sa mga sepohan.” (Buh 16:22-24) Unya sa pagkatungang gabii, usa ka dakong linog ang nagbukas sa tanang pultahan sa bilanggoan. Tungod niini ang magbalantay sa bilanggoan naghunahuna nga ang mga binilanggo nakapuga, ug kay nasayod sa grabeng silot nga ipahamtang kaniya kon tinuod nga sila nakapuga, siya diriyot nang magpakamatay sa dihang si Pablo nagpahibalo kaniya nga silang tanan atua ra didto. Kini nga mga panghitabo, lakip sa mga gitudlo ni Pablo, nakaaghat sa magbalantay sa bilanggoan sa pagpasundayag ug pagtuo, ug siya ug ang iyang panimalay nahimong bawtismadong mga magtutuo.​—Buh 16:25-36.