Sa karaang kapanahonan ang mga magbalantay-sa-ganghaan, nga gitawag usab ug mga magbalantay sa pultahan, nag-alagad sa lainlaing mga dapit, sama sa mga ganghaan sa siyudad, mga ganghaan sa templo, maingon man usab sa mga ganghaan o mga pultahan sa mga balay. Ang mga magbalantay-sa-ganghaan sa siyudad gitudlo aron sa pagtino nga sirado ang mga ganghaan panahon sa kagabhion, ug sila nag-alagad ingong mga tigbantay sa ganghaan. Ang ubang mga tigbantay lagmit itudlo ingong mga magbalantay sa ibabaw sa ganghaan o sa usa ka torre diin ilang malantaw pag-ayo ug ikapahibalo kadtong nagsingabot sa siyudad. Sila motabang sa magbalantay-sa-ganghaan. (2Sa 18:​24, 26) Kini maoy usa ka responsable kaayong katungdanan, sanglit ang seguridad sa siyudad nagdepende gayod sa magbalantay-sa-ganghaan ug siya maoy tulay sa komunikasyon tali niadtong anaa sa gawas sa siyudad ug niadtong anaa sa sulod. (2Ha 7:​10, 11) Ang mga magbalantay sa pultahan ni Haring Ahasuero, nga ang duha kanila naglaraw sa pagpatay kaniya, gitawag usab nga mga opisyal.​—Est 2:21-23; 6:2.

Diha sa Templo. Sa hapit na siyang mamatay, si Haring David nag-organisar pag-ayo sa mga Levihanon ug sa mga mamumuhat sa templo, lakip sa mga magbalantay-sa-ganghaan, nga nianang tungora may gidaghanon nga 4,000. Sa ilang mga dibisyon sila motungha aron sa pagtrabaho sulod sa pito ka adlaw sa matag higayon. Sila maoy responsable sa pagbantay sa balay ni Jehova ug sa pagtino nga ang mga pultahan buksan ug sirad-an sa tukmang mga panahon. (1Cr 9:23-27; 23:1-6) Gawas pa sa katungdanan sa pagkamagbalantay, ang uban nag-atiman sa mga amot nga gidala sa mga tawo aron magamit sa templo. (2Ha 12:9; 22:4) Sa ulahing panahon, sa dihang si Jehoiada nga hataas nga saserdote nagdihog kang Jehoas ingong hari, ang linaing mga guwardiya gitudlo diha sa mga ganghaan sa templo aron panalipdan ang batan-ong si Jehoas gikan sa mangingilog sa trono nga si Rayna Atalia. (2Ha 11:4-8) Sa dihang gilaglag ni Haring Josias ang idolatrosong pagsimba, ang mga magbalantay sa pultahan mitabang sa pagkuha gikan sa templo sa mga galamiton nga gigamit sa pagsimba kang Baal. Dayon gisunog kini sa gawas sa siyudad.​—2Ha 23:4.

 Sa dihang si Jesu-Kristo dinhi pa sa yuta, ang mga saserdote ug mga Levihanon gitudlo ingong mga magbalantay sa pultahan ug mga tigbantay sa templo nga gitukod pag-usab ni Herodes. Sila gisugo nga kinahanglang magmaalisto, tungod kay ang magtatan-aw o opisyal sa Patukoranan sa Templo mohimog mga paglibot, nga moabot sa wala damhang takna, ug kinahanglan nga ang tigbantay magtukaw diha sa iyang puwesto aron dili hisakpan nga wala diay magbantay. Dihay lain nga opisyal nga gipiyalan sa pagripa alang sa mga buluhaton sa templo. Kon siya moabot ug manuktok sa pultahan, kinahanglang pabiling nagmata ang guwardiya aron siya mabuksan. Siya usab mahimong makasakop sa guwardiya nga nahikatulog. Bahin niining pagpabiling nagmata, ang Mishnah (Middot 1:2) nag-ingon: “Ang opisyal sa Patukoranan sa Templo kasagarang molibot sa matag pagbantay dala ang dinagkotan nga mga sulo, ug kon adunay bantay nga dili motindog ug moingon kaniya, ‘Oh opisyal sa Patukoranan sa Templo, ang kalinaw maanaa kanimo!’ ug mahibaloan nga siya diay nahikatulog, siya magbunal kaniya pinaagi sa iyang sungkod, ug siya adunay katungod sa pagsunog sa iyang besti.”​—Gihubad ni H. Danby; tan-awa usab ang Pin 16:15.

Kini nga mga magbalantay-sa-ganghaan ug mga guwardiya gibutang sa ilang mga puwesto aron dili makawatan ang templo ug aron dili makasulod ang tanang mahugaw nga mga tawo ug ang tanan nga walay labot didto.

Diha sa mga Balay. Sa mga adlaw sa mga apostoles, ang pipila ka balay adunay mga magbalantay sa pultahan. Sa balay ni Maria nga inahan ni Juan Marcos, usa ka sulugoong babaye nga ginganlag Roda ang mitubag sa pagpanuktok ni Pedro sa dihang siya nahibalik gikan sa bilanggoan human siya buhii sa usa ka manulonda. (Buh 12:12-14) Ang batan-ong babaye nga nag-alagad ingong magbalantay sa pultahan sa balay sa hataas nga saserdote misukna kang Pedro kon siya usa ba sa mga tinun-an ni Kristo.​—Ju 18:17.

Mga Magbalantay sa Hayop. Ang mga magbalantay sa hayop sa kapanahonan sa Bibliya kasagarang magbantay sa ilang mga panon sa karnero diha sa usa ka toril panahon sa kagabhion. Kini nga mga toril maoy mugbo nga mga paril nga bato nga may usa ka ganghaan. Ang mga panon sa hayop sa usa ka tawo o usahay sa ubay-ubayng mga tawo isulod diha sa toril panahon sa kagabhion nga adunay usa ka magbalantay sa pultahan nga magabantay ug magapanalipod kanila. Dayag nga gigamit ni Jesus kining naandan nga buhat ingong sambingay sa iyang paghisgot bahin sa magbalantay sa pultahan sa dihang siya nagtawag sa iyang kaugalingon dili lamang ingong ang magbalantay sa mga karnero sa Diyos kondili usab ingong ang pultahan nga niana mosulod ang mga karnero.​—Ju 10:1-9.

Mga Kristohanon. Gipasiugda ni Jesus nga ang mga Kristohanon kinahanglang kanunay nga magmaalisto ug magmabinantayon bahin sa iyang pag-abot ingong tigpahamtang ug silot ni Jehova. Gipakasama niya ang Kristohanon sa usa ka magbalantay sa pultahan nga gisugo sa iyang agalon nga magpadayon sa pagbantay ug magpaabot sa iyang pagbalik gikan sa iyang pagpanaw sa halayo.​—Mar 13:33-37; tan-awa ang GANGHAAN; BANTAY, GUWARDIYA.