Pinasukad sa Bibliya, ang terminong “magkokopya” mapadapat sa usa ka magsusulat, o sa usa ka tawo nga mohimog mga kopya sa mga basahon, ilabina sa Kasulatan. Ang Hebreohanong pulong nga gihubad nga “magkokopya” mao ang so·pherʹ, nga nalangkit sa pag-ihap ug pagrekord. Kini adunay nagkalainlaing mga kahulogan. Kini mahimong magtumong sa usa ka eskriba (Huk 5:14) o sa usa ka sekretaryo. (Jer 36:32; Eze 9:​2, 3) Ang usa ka eskriba mahimong usa ka publikong magsusulat nga mosulat ug mga komposisyon nga idiktar kaniya sa lainlaing mga tawo, usa ka sekretaryo, usa ka magkokopya, o kaha usa ka magtutudlo sa Balaod. Apan, ang termino nga “magkokopya” maoy ilabinang haom kon ipadapat sa mga tawo nga nagkopya sa Balaod ug sa ubang mga bahin sa Balaang Kasulatan. Ang partikular nga gipaila ingong mga magkokopya mao si Sapan, ang usa ka tawong ginganlag Zadok, ug ang saserdote nga si Esdras.​—Jer 36:10; Neh 13:13; 12:​26, 36.

Ang saserdote nga si Esdras, nga miadto sa Jerusalem gikan sa Babilonya uban sa nahibiling mga Hudiyo sa ikapitong tuig sa Persianhon nga si Haring Artajerjes (468 W.K.P.), gipaila ingong “usa ka batid nga magkokopya sa balaod ni Moises” ug ingong “usa ka magkokopya sa mga pulong sa kasugoan ni Jehova ug sa iyang mga regulasyon sa Israel.” (Esd 7:​6, 7, 11) Sa iyang panahon, unang nahimong prominente ang Hudiyong mga eskriba ingong usa ka pundok sa mga magkokopya sa Kasulatan. Linibo sa mga Hudiyo ang nagpabilin sa Babilonya, ug ang uban nagkatibulaag tungod sa mga paglalin ug sa mga pagnegosyo. Ang lokal nga mga tigomanan nga nailhang mga sinagoga mitungha sa nagkalainlaing mga dapit, ug tungod niini, ang mga magkokopya kinahanglan nga mohimog sinulat-kamot nga mga kopya sa mga manuskrito sa Bibliya. Gibuhat nila kini uban ang dakong pag-amping.​—Tan-awa ang ESKRIBA.

Si Esdras, ang batid nga saserdoteng magkokopya, mao ang nagbasa sa “basahon sa balaod ni Moises” ngadto sa usa ka kongregasyon sa napasig-uling Jerusalem. Ang maayong pagpatin-aw ug pagtudlo nga gihatag ni Esdras ug sa iyang mga katabang niadtong panahona misangpot sa ‘hilabihang pagmaya’ ug tugob nga mga panalangin alang sa nagkatigom nga katawhan.​—Neh 8.

Ang salmista, kansang kasingkasing ‘napukaw sa usa ka maayong butang’ maylabot sa Mesiyanikong Hari sa Diyos, miingon: “Ang akong dila maoy dagang unta sa usa ka batid nga magkokopya.” (Sal 45:1-5) Buot niya nga ang iyang dila larino untang manulti, nga haom sa binayaw nga tema sa iyang sinulat nga inspirado sa Diyos. Busa, buot sa salmista nga ang iyang dila magamit sa batid nga pagpanulti, sama sa usa ka dagang diha sa kamot sa nabansay ug batid nga magkokopya, usa nga adunay katakos.