Ilalom sa kagamhanan sa Babilonya, ang mga mahistrado sa polisiya maoy sibil nga mga opisyal sa sakop nga mga distrito nga may kahibalo sa balaod ug naghupot ug limitadong hudisyal nga awtoridad. Lakip sila sa mga opisyal nga gitigom aron moyukbo sa larawang bulawan ni Nabucodonosor.​—Dan 3:​2, 3.

Sa mga kolonya sa Roma, ang pagdumala sa kagamhanan gihuptan sa sibil nga mga mahistrado, nga gitawag ug stra·te·goiʹ diha sa Gregong mga siyudad. Mahimong adunay 3, 4, sagad 5, o bisan gani 10 o 12 ang naglangkob sa hunta sa mga mahistrado. Ang ilang mga katungdanan mao ang pagmentinar sa kahusay, pagdumala sa panalapi, paghusay ug paghukom sa mga malinapason sa balaod, ug sa pagsugo sa pagpahamtang sa silot. Usahay ang ilang mga ngalan ug mga titulo makita diha sa mga sensilyo nga giluwatan sa usa ka siyudad. Ang mga kostable, o mga lictor, giasayn ngadto kanila aron sa pagpatuman sa ilang mga sugo.​—Tan-awa ang KOSTABLE.

Ang sibil nga mga mahistrado sa Romanhong kolonya sa Filipos (Buh 16:12) nagbutang kang Pablo ug Silas sa sepohan nga wala una maghusay kanila. Pagkasunod adlaw, ang mga mahistrado nagpadalag mga kostable aron sa pagpagawas kanila. Apan si Pablo, aron sa legal nga paagi ug sa publiko mabindikar ang maayong balita nga iyang gimantala, miinsistir nga ang mga mahistrado ang personal nga magpagawas kanila. Ang mga mahistrado, nga nahadlok sa Roma tungod sa pagbunal ug Romanong mga lungsoranon, nangaliyupo kang Pablo ug Silas ug nagpagawas kanila.​—Buh 16:19-39.