[gikan sa lintunganayng pulong nga nagkahulogang “doble,” lagmit nagpasabot nga ang langob adunay doble nga agianan o duha ka lungag o sudlanan].

Ang ngalan sa usa ka yuta ug sa usa ka langob sa kasilinganan sa Hebron nga gipalit ni Abraham gikan kang Epron nga Hitihanon sa kantidad nga 400 ka siklo nga plata (mga $880). Ang langob gigamit ingong lubnganan sa asawa ni Abraham nga si Sara ug sa laing lima pa: si Abraham, Isaac, Rebeca, Jacob, ug Lea.​—Gen 23:14-19; 25:9; 49:​30, 31; 50:13.

Ang langob nga lubnganan sa gituohan sa kadaghanan nga mao ang Meʽarat HaMakhpela, nga nahimutang sa modernong Hebron ilalom sa usa ka kinoral nga moske sa mga Moslem nga gitawag ug Haram el-Khalil.

Sa Genesis 23:17 ang Hebreohanong termino nga nagpaila sa nahimutangan sa langob sa Makpela gikan sa nahimutangan sa Mamre gihubad sa lainlaing paagi ingong “sidlakan sa” (RS), “atubangan” (AS), “duol” (BE), “atbang” (JB), ug “atubangan sa Mamre” (NW). Kon husto ang naandang gituohan nga lokasyon sa Mamre (er-Ramat el-Khalil), ang hubad nga “sidlakan sa Mamre” dili tukma, sanglit  kining dapita nahimutang nga mga 3 km (2 mi) sa A sa modernong Hebron. Ang prase nga “Mamre, buot ingnon, Hebron” (Gen 23:19), mahimong magpasabot nga ang Mamre anaa sa distrito sa Hebron.