[gikan sa lintunganayng pulong nga nagkahulogang “naluya; nasakit”].

1. Usa sa mga anak nga babaye ni Zelopehad sa tribo ni Manases. Gipangayo ni Mala ug sa iyang mga igsoon nga babaye ang panulondon sa ilang amahan, sanglit ang ilang amahan walay anak nga lalaki apan lima ka anak nga babaye lamang. Nagpakisayod si Moises kang Jehova, nga nagsugo nga angayng makadawat niini ang mga anak nga babaye ni Zelopehad. (Num 26:28-33; 27:1-11) Ang sunod nga sugo ni Jehova pinaagi kang Moises nag-ingon kang Mala ug sa ubang mga anak nga babaye ni Zelopehad nga magminyo lamang sulod sa tribo ni Manases, aron dili mahiadto ang panulondon sa laing tribo. Tuod man, si Mala ug ang iyang mga igsoong babaye “nahimong mga asawa sa mga anak nga lalaki sa mga igsoong lalaki sa ilang amahan.” (Num 36:1-6, 10-12) Kining hudisyal nga hukom nahimong usa ka sumbanan labot sa pagkamanununod sa usa ka panulondon. (Num 36:7-9) Sila sa ulahi miatubang kang Eleasar nga saserdote ug kang Josue, nga nagsulti sa sugo ni Jehova, ug gihatagan sila ug “usa ka panulondon sa taliwala sa mga igsoong lalaki sa ilang amahan.”​—Jos 17:​3, 4.

2. Usa ka kaliwat ni Manases kansang inahan mao si Hamoleket. Wala hisgoti kon kini siya usa ba ka anak nga lalaki o babaye.​—1Cr 7:​17, 18.