Usa ka babaye nga nanagna o nagabuhat sa buluhaton sa usa ka manalagna. Ingon sa gipakita ubos sa mga ulohang MANALAGNA ug TAGNA, ang pagpanagna sa paninugdan nagkahulogang inspiradong pagpahayag sa mga mensahe gikan sa Diyos, ang pagpadayag sa kabubut-on sa Diyos. Kini mahimong naglangkit o wala maglangkit ug prediksiyon sa umaabot nga mga panghitabo. Maingon nga adunay tinuod ug mini nga mga manalagna, ang pipila ka babayeng manalagna gigamit usab ni Jehova ug gipalihok pinaagi sa iyang espiritu samtang ang uban maoy mini nga mga babayeng manalagna, nga wala Niya uyoni.

Si Miriam mao ang unang babaye nga gitawag nga manalagna diha sa Bibliya. Dayag nga gipasa sa Diyos kaniya ang usa ka mensahe o mga mensahe, tingali pinaagi sa inspiradong pag-awit. (Ex 15:​20, 21) Busa, siya ug si Aaron giasoy nga nag-ingon kang Moises: “Dili ba usab pinaagi kanato nga [si Jehova] nakigsulti?” (Num 12:2) Pinaagi ni manalagnang Miqueas, si Jehova nag-ingon nga iyang gipadala si ‘Moises, Aaron ug Miriam’ atubangan sa mga Israelinhon sa dihang gipagula sila gikan sa Ehipto. (Miq 6:4) Bisan tuod si Miriam nakabaton sa pribilehiyo ingong instrumento sa Diyos sa pagpakigkomunikar, ang maong relasyon atubangan sa Diyos maoy ubos kay nianang nabatonan sa iyang igsoong si Moises. Sa dihang siya napakyas sa pagpabilin sa iyang hustong dapit, siya nakaagom ug grabeng silot gikan sa Diyos.​—Num 12:1-15.

Sa yugto sa mga Maghuhukom, si Debora ang nagsilbing tinubdan sa impormasyon gikan kang Jehova, nga nagpahibalo sa iyang mga paghukom bahin sa pipila ka butang ug nagpaabot sa iyang instruksiyon, sama sa iyang mga sugo ngadto kang Barak. (Huk 4:4-7, 14-16) Busa, sulod sa usa ka yugto sa pagkaluya ug sa pag-apostata sa nasod, siya mahulagwayong nag-alagad ingon nga “inahan sa Israel.” (Huk 5:6-8) Si Hulda nga manalagna nag-alagad sa samang paagi, sa adlaw ni Haring Josias, nga nagpahibalo sa paghukom sa Diyos ngadto sa nasod ug sa hari niini.​—2Ha 22:14-20; 2Cr 34:22-28.

 Si Isaias naghisgot sa iyang asawa ingong “manalagnang babaye.” (Isa 8:3) Bisan tuod ang pipila ka komentarista nag-ingon nga siya nahimong manalagna tungod lamang kay siya naminyo sa usa ka manalagna, kini nga pangagpas wala paluyohi sa Kasulatan. Mopatim-aw nga siya nakadawat gayod ug usa ka buluhaton sa pagpanagna gikan kang Jehova, sama sa nadawat sa nag-unang mga babayeng manalagna.

Si Nehemias wala makauyon sa babayeng manalagna nga si Noadias, kinsa, duyog sa “uban pa sa mga manalagna,” misulay sa paghadlok kang Nehemias ug sa ingon mibabag sa pagtukod pag-usab sa mga paril sa Jerusalem. (Neh 6:14) Bisan tuod siya misupak sa kabubut-on sa Diyos, kini wala magpasabot nga siya dili tinuod nga manalagna una pa niadtong higayona.

Si Jehova namulong kang Ezequiel labot sa Israelinhong mga babaye nga “nag-alagad ingong mga manalagna gikan sa ilang kaugalingong kasingkasing.” Kini nagpasabot nga kini nga mga babayeng manalagna wala sugoa sa Diyos apan maoy mini, naghimo lamang sa ilang kaugalingon nga mga manalagna. (Eze 13:17-19) Pinaagi sa ilang malit-agon ug malinglahon nga mga buhat ug propaganda sila ‘nangayam ug mga kalag,’ mihukom sa matarong ug mikonsentir sa daotan, apan si Jehova magaluwas sa iyang katawhan gikan sa ilang kamot.​—Eze 13:20-23.

Sa panahon sa pagkatawo ni Jesus, samtang ang mga Hudiyo mao pa ang gipakigsaaran nga katawhan ni Jehova, ang tigulang nga si Ana nag-alagad ingong babayeng manalagna. Siya “wala gayod mopalta sa templo, nga nagahatag ug sagradong pag-alagad adlaw ug gabii uban ang mga pagpuasa ug mga pangamuyo.” Pinaagi sa ‘pagsulti bahin sa bata [si Jesus] ngadto kanilang tanan nga nagahulat sa kaluwasan sa Jerusalem,’ siya nag-alagad ingong manalagna diha sa pangunang diwa sa ‘pagpahayag’ sa gipadayag nga katuyoan sa Diyos.​—Luc 2:36-38.

Ang pagpanagna maoy lakip sa milagrosong mga gasa sa espiritu nga gituga ngadto sa bag-ong natukod nga Kristohanong kongregasyon. Ang pipila ka Kristohanong mga babaye, sama sa upat ka ulay nga mga anak nga babaye ni Felipe, nanagna ilalom sa pagbuot sa balaang espiritu sa Diyos. (Buh 21:9; 1Co 12:​4, 10) Kini maoy katumanan sa Joel 2:​28, 29, nga nagtagna nga “ang inyong mga anak nga lalaki ug ang inyong mga anak nga babaye managna.” (Buh 2:14-18) Apan, ang maong gasa wala magpahigawas sa usa ka babaye gikan sa pagpasakop sa pagkaulo sa iyang bana o sa pagkaulo sa mga lalaki sulod sa Kristohanong kongregasyon; ingong simbolo sa iyang pagpasakop siya kinahanglang magpandong sa ulo sa dihang managna (1Co 11:3-6) ug wala siya tugoti nga mahimong magtutudlo sulod sa kongregasyon.​—1Ti 2:11-15; 1Co 14:31-35.

Ang usa ka babayeng sama kang Jezebel diha sa kongregasyon sa Tiatira miangkon nga adunay mga gahom sa pagpanagna apan misubay sa dalan sa karaang mini nga mga babayeng manalagna ug gihukman ni Kristo Jesus diha sa iyang mensahe ngadto kang Juan sa Pinadayag 2:20-23. Siya sayop nga naghimo sa iyang kaugalingon ingong usa ka magtutudlo ug nagpahisalaag sa mga membro sa kongregasyon ngadto sa sayop nga mga buhat.