Sa Romanhong Imperyo, ang mga buhis por ulo ug mga buhis sa yuta gikolekta sa mga opisyal sa imperyo ingong bahin sa ilang opisyal nga katungdanan. Apan ang katungod sa pagpangolektag buhis sa mga butang nga gieksportar, sa mga butang nga giimportar, ug sa mga manggad nga gipasulod sa mga negosyante diha sa nasod mapalit diha sa publikong subastahanan. Busa ang katungod sa pagpangolekta sa maong mga buhis mahiadto sa mga tawo nga kinatas-ang mopuhal. Sa dihang sila mangolektag mga buhis, sila makaganansiya gikan sa mga buhis nga madawat nga mosobra sa kantidad nga ilang gipuhal. Kining mga tawhana, nga nailhan  ingong mga publican, nagtugyan sa katungod sa pagpangolektag mga buhis ngadto sa laing mga tigkolekta diha sa pipila ka bahin sa ilang teritoryo. Ug kini nga mga tigkolekta, sa baylo, nagdumala ug laing mga tawo nga maoy mohimog personal nga pagpangolektag mga buhis. Pananglitan, si Zaqueo mopatim-aw nga maoy pangulo sa mga maniningil ug buhis sa sulod ug sa palibot sa Jerico. (Luc 19:​1, 2) Ug si Mateo, kinsa gitawag ni Jesus aron mahimong apostol, maoy usa ka tawo nga aktuwal nga nangolektag mga buhis, lagmit nga siya adunay buhatan sa buhis nga diha o duol sa Capernaum.​—Mat 10:3; Mar 2:​1, 14.

Busa, sa Palestina daghang Hudiyo ang aktibong mga maniningil ug buhis. Ubos ang pagtamod kanila sa ilang mga katagilungsod, sanglit sila sobrang maningil ug mga buhis. (Mat 5:46; Luc 3:​12, 13; 19:​7, 8) Sagad nga gilikayan sa ubang mga Hudiyo ang kinabubut-ong pagpakig-uban sa mga maniningil ug buhis ug giisip sila nga kauban sa mga tawong nailhan nga mga makasasala, lakip sa mga pampam. (Mat 9:11; 11:19; 21:32; Mar 2:15; Luc 5:30; 7:34) Nayugot usab sila sa mga maniningil ug buhis tungod kay sila nag-alagad sa langyawng gahom, ang Roma, ug suod nga nakig-uban sa “mahugaw” nga mga Hentil. Busa, ang pagtagad sa usa ka “igsoon” nga dili-mahinulsolong mamumuhat ug daotan ingong sama sa usa ka “maniningil ug buhis” nagkahulogan nga dili makig-uban kaniya nga kinabubut-on.​—Mat 18:15-17.

Si Kristo Jesus wala mouyon sa korapsiyon nga kaylap taliwala sa mga maniningil ug buhis. Apan, siya andam nga motabang sa espirituwal nga paagi niadtong nagpakitag tinguha sa pagpatalinghog kaniya bisan tuod siya gisaway sa pagbuhat niana. (Mat 9:9-13; Luc 15:1-7) Sa usa sa iyang mga sambingay, gipakita ni Jesus nga ang maniningil ug buhis nga mapainubsanong miila sa iyang kaugalingon nga makasasala ug naghinulsol mas matarong pa kay sa Pariseo nga mapahitas-ong naglantaw sa iyang kaugalingon ingong matarong. (Luc 18:9-14) Ug ang mapainubsanon, mahinulsolong mga maniningil ug buhis (sama kang Mateo ug Zaqueo) nahimong mga sakop sa Gingharian sa mga langit.​—Mat 21:​31, 32.