[Pagsulay].

Usa sa mga ngalan sa dapit duol sa Repidim diin nadawat sa mga Israelinhon ang milagrosong suplay sa tubig. Ingon sa gisugo ni Jehova, si Moises ug ang pipila sa mga ansiyano sa Israel miadto sa bato sa Horeb. Didto gihampak ni Moises ang bato. Dayon ang tubig nga migula miagos ingong usa ka suba didto sa kamingawan. Unya ginganlan ni Moises kining dapita nga Masah (nagkahulogang “Pagsulay”) tungod kay ang mga Israelinhon nagbutang kang Jehova sa pagsulay pinaagi sa ilang dili matinuohong pagbagulbol, ug tungod sa ilang pagpakiglalis, iyang gitawag kini nga Meriba (nagkahulogang “Pakiglalis”).​—Ex 17:1-7; Sal 105:41.

Wala madugay una pa sa iyang kamatayon gipasidan-an ni Moises ang Israel nga dili ibutang si Jehova sa pagsulay ingon sa ilang pagbutang kaniya sa pagsulay didto sa Masah. (Deu 6:16; tan-awa usab ang Deu 9:22.) Dayon, sa pagpanalangin sa Israel, siya nagpahinumdom pag-usab niining hitaboa, nga nagpakitang kini misangpot sa pagsulay kang Levi. (Deu 33:8) Niini nga kahimtang si Levi mahimong nagtumong sa mga pangulo sa tribo, nga mao, si Moises ug Aaron.

Sa ulahi, ang salmista nagtambag sa mga Israelinhon nga dili patig-ahon ang ilang mga kasingkasing sama sa kaliwatan nga gipalatagaw didto sa kamingawan. Ang iyang paghisgot sa Meriba ug Masah dayag nga nagtumong sa pagbagulbol sa Israel tungod sa tubig didto sa Repidim, diin ang maong hitabo nagpakita sa ilang dili matinuohong dalan sulod sa tibuok 40-ka-tuig nga yugto. (Sal 95:8-11) Mopatim-aw nga kini mao ang ideya nga gipadayag sa gikutlong mga pulong sa salmista (gikan sa Gregong Septuagint) nga makaplagan sa Hebreohanon kapitulo 3: “Ayaw patig-aha ang inyong mga kasingkasing sama niadtong higayon nga gipahinabo ang hilabihang kasuko [Meriba], ingon sa adlaw sa pagsulay [Masah] didto sa kamingawan, diin ang inyong mga katigulangan misulay kanako, ug gani nakita nila ang akong mga buhat sulod sa kap-atan ka tuig [sa literal, “ug sila nakakita sa akong mga buhat sa kap-atan ka tuig”].” (Heb 3:​8, 9) Ang Salmo 95:8 ug Hebreohanon 3:8 mahimong naglakip usab sa pagbagulbol sa Israel sa ulahi tungod sa tubig sa Meriba sa dapit sa Kades.​—Num 20:1-13.