Sa dihang gitubag ang pangutana sa mga apostoles bahin sa iyang umaabot nga presensiya ug sa kataposan sa naglungtad nga sistema sa mga butang, gilakip ni Jesu-Kristo ang usa ka sambingay o ilustrasyon bahin sa usa ka “matinumanon ug maalamong ulipon.” Ang agalon sa matinumanong ulipon nagtudlo kaniya ibabaw sa iyang mga sulugoon sa panimalay aron tagan-an sila sa ilang pagkaon. Kon makabaton sa pag-uyon inig-abot sa iyang agalon (lagmit gikan sa usa ka panaw), ang ulipon gantihan pinaagi sa pagtudlo kaniya ibabaw sa tanang kabtangan sa agalon.​—Mat 24:​3, 45-51.

Sa susamang sambingay sa Lucas 12:42-48, ang ulipon gitawag nga piniyalan, nga mao, tagdumala o mayordomo sa balay, usa nga gitudlo ibabaw sa mga sulugoon, bisan tuod siya sulugoon usab. Sa karaang mga panahon kini nga posisyon sagad nga gihuptan sa usa ka matinumanong ulipon. (Itandi ang Gen 24:2; ang kahimtang usab ni Jose sa Gen 39:1-6.) Sa ilustrasyon ni Jesus, ang piniyalan unang gitudlo sa pagdumala ug sa paghatag lamang sa taganang pagkaon sa hustong panahon ngadto sa hugpong sa mga tig-alagad o mga sulugoon sa agalon, ug sa ulahi, tungod sa iyang matinumanon ug maalamong pagtuman sa iyang pag-alagad, ang iyang buluhaton gidugangan nga maglakip sa pagdumala sa tanang gipanag-iya sa agalon. Labot sa pag-ila kon kinsa ang “agalon” (Gr., kyʹri·os, gihubad usab nga “ginoo”), gipakita na ni Jesus nga siya mao ang naghupot niana nga posisyon ibabaw sa iyang mga tinun-an, ug gani may mga higayon nga ilang gitawag siya nga agalon. (Mat 10:​24, 25; 18:21; 24:42; Ju 13:​6, 13) Ang pangutana nagpabilin bahin sa kon kinsa ang gilarawanan sa matinumanon ug maalamong ulipon, o piniyalan, ug kon unsay gihulagwayan sa iyang pagtaganag pagkaon sa mga sulugoon sa panimalay.

Ang terminong “ulipon” naa sa singular. Pero wala ni magpasabot nga ang “ulipon” naghulagway sa usa lang ka tawo nga hatagan sa maong espesyal nga pribilehiyo. Ang Kasulatan dunay mga pananglitan sa paggamit ug singular nga nombre (noun) sa pagtumong sa usa ka grupo, sama sa dihang si Jehova misulti ngadto sa nasod sa Israel ingong grupo, nga nag-ingon: “Kamo mao ang akong mga saksi [plural], . . . ang akong alagad [singular] nga akong gipili.” (Isa 43:10) Ang “antikristo” gipakita sa Bibliya ingong grupo sa mga antikristo. (1Ju 2:18; 2Ju 7) Sa susama, ang “ulipon” usa ka grupo. Kini itudlo sa panahon sa kataposan ingong galamiton sa pagtaganag espirituwal nga “pagkaon sa hustong panahon.” (Mat 24:3, 45; Luc 12:42) Sa unang siglo, si Jesus naghatag ug sumbanan kon unsaon pagtaganag espirituwal nga pagkaon sa Kristohanong kongregasyon. Sama nga giapod-apod niya sa mga tawo ang literal nga pagkaon pinaagi sa pipila lang ka tinun-an, ang espirituwal nga pagkaon itagana pinaagi sa pipila lang ka indibiduwal. (Mat 14:19; Mar 6:41; Luc 9:16) Gibansay ni Jesus ang mga apostoles para sa responsibilidad nga ihatag kanila human sa Pentekostes 33 K.P. ingong galamiton sa pag-apod-apod ug espirituwal nga pagkaon. Sa ulahi, gidugang kanila ang ubang ansiyano ug nagsilbi sila ingong nagamandong lawas nga maoy mohusay sa mga isyu ug modumala sa pagsangyaw ug pagtudlo sa maayong balita bahin sa Gingharian. (Buh 2:42; 8:14; 15:1, 2, 6-29) Human mamatay ang mga apostoles, nahitabo ang grabeng apostasya. Pero panahon sa kataposan—agig pagsunod sa gihatag niyang sumbanan sa unang siglo nga pakan-on ang daghan pinaagig pipila lang ka indibiduwal—si Jesus nagpilig gamayng grupo sa dinihogan sa espiritu nga mga lalaki aron mag-alagad ingong “matinumanon ug maalamong ulipon,” sa  pag-andam ug pag-apod-apod ug espirituwal nga pagkaon panahon sa iyang presensiya.

Ang mga sulugoon sa panimalay nagtumong sa tanang igsoon diha sa Kristohanong kongregasyon, ang mga dinihogan ug ang “ubang mga karnero,” nga gitagan-an sa espirituwal nga pagkaon. (Ju 10:16) Apil niini ang indibiduwal nga mga membro sa “matinumanon ug maalamong ulipon,” kay sila sab gitagan-an sa espirituwal nga pagkaon. Ang mga membro sa matinumanong ulipon makadawat ug mas dakong responsibilidad kon magpabilin silang matinumanon hangtod sa pag-abot sa ilang agalon. Dihang madawat na nila ang ilang langitnong ganti ug mahimong magmamando kauban sa Kristo, itudlo niya sila “ibabaw sa tanan niyang mga kabtangan.” Sila ug ang ubang membro sa 144,000 makaambit sa dako nga langitnong awtoridad sa Kristo.—Mat 24:46, 47; Luc 12:43, 44.