[gikan sa lintunganayng pulong nga nagkahulogang “modaghan (modagaya)”].

Ang magulang sa duha ka anak nga babaye ni Haring Saul. (1Sa 14:49) Si Saul dayag nga nakasaad nga ipaminyo ang usa kanila ngadto sa tawo nga makapildi kang Goliat (1Sa 17:25), ug tingali mao kadto ang hinungdan nga gitanyag niya si Merab ngadto kang David. Human sa iyang pakigsangka kang Goliat, si David napamatud-ang usa ka manggialamon ug malamposong manggugubat batok sa mga Filistehanon, mao nga si Saul “nahadlok kaniya,” samtang ang katawhan sa Israel ug Juda nahigugma kaniya. (1Sa 18:​15, 16) Sa dihang gitanyag si Merab ngadto kang David ingong asawa, si Saul nagdasig kaniya nga padayong magmaisogon, apan ang diha sa iyang hunahuna, “Dili ko idapat ang akong kamot kaniya, kondili ang kamot sa mga Filistehanon maoy modapat kaniya,” nga naglaom nga si David mamatay sa pagpakiggubat. Sa pagkamapainubsanon, si David nagpanuko sa pagdawat sa tanyag nga mahimong umagad sa hari. Apan ang nahitabo, si Saul wala motuman sa iyang saad, ug si Merab wala gayod mahimong asawa ni David. Ang asoy nag-ingon nga ang manghod nga anak nga babayeng si Mikal “nahigugma kang David,” nga lagmit nagpasabot nga si Merab wala mahigugma kang David. Bisan unsa man ang kahimtang, “nahitabo nga sa panahon nga si Merab, anak nga babaye ni Saul, igahatag na unta kang David, siya gikahatag na kang Adriel nga Meholahanon aron mapangasawa.”​—1Sa 18:17-20.

Si Merab nanganak ug lima ka anak nga lalaki kang Adriel. Apan, kini nga mga anak ug ang duha pa ka ubang membro sa panimalay ni Saul gitugyan ni David ngadto sa mga Gabaonhon, kinsa nagpatay kanilang pito. Gihimo kini isip bayad sa pagsulay ni Saul sa pagpuo sa mga Gabaonhon.​—2Sa 21:1-10.

Gimatuto sa Iyang Igsoong Babaye ang mga Anak nga Lalaki ni Merab. Sumala sa Masoretikong teksto, ang 2 Samuel 21:8 naghisgot bahin sa “lima ka anak nga lalaki ni Mikal nga anak nga babaye ni Saul nga gipanganak niya kang Adriel.” Apan ang 2 Samuel 6:23 nag-ingon nga si Mikal namatay nga walay anak. Mopatim-aw nga ang pipila ka eskriba misulay sa pagsulbad niini nga panagsumpaki pinaagi sa paghulip sa ngalang Merab alang sa Mikal diha sa 2 Samuel 21:8. Daw dayag kini tungod kay ang Gregong Septuagint (Lagardian nga edisyon) ug ang duha ka Hebreohanong manuskrito mabasa nga “Merab” niini nga bersikulo. Hinunoa, ang tradisyonal nga kabatbatan sa 2 Samuel 21:8 sumala sa makita sa halos tanang ubang Hebreohanong mga manuskrito maoy ingon sa mosunod:

Si Merab nga igsoong babaye ni Mikal mao ang asawa ni Adriel ug nanganak kaniya sa lima ka anak nga lalaki nga gihisgotan. Apan sayong namatay si Merab, ug ang iyang igsoong babaye nga si Mikal, nga gisalikway ni David ug walay anak, mao ang nagmatuto o nagpadako sa lima ka anak nga lalaki. Busa, sila gihisgotan ingong mga anak ni Mikal inay nga mga anak ni Merab. Kaharmonya niini nga pagsabot sa 2 Samuel 21:​8, ang hubad sa Bibliya ni Isaac Leeser naghisgot bahin sa “lima ka anak nga lalaki ni Mikal nga anak nga babaye ni Saul, kinsa iyang gipadako alang kang Adriel,” ug ang nota o footnote niini nga teksto nag-ingon: “Si Mikal mao ang asawa ni David; apan ang mga anak iya ni Merab, ang kamagulangang anak nga babaye ni Saul, kinsa lagmit giedukar sa iyang igsoong babaye.” Ang mga Targum mabasa: “Ang lima ka anak nga lalaki ni Merab (nga gipadako ni Mikal nga anak nga babaye ni Saul) nga iyang gipanganak.” Ang ubang mga hinungdan nga wala ibutyag sa Kasulatan mahimong nakaapekto sa pagkahan-ay sa teksto.