[Kang (Iya ni) Merari].

Usa sa tulo ka pangunang mga banay sa mga Levihanon, nga naggikan sa anak nga lalaki ni Levi nga si Merari pinaagi kang Mali ug Musi. (Ex 6:​16, 19; Num 3:20; 26:​57, 58) Ang unang pagsenso sa mga Israelinhon didto sa kamingawan nagtala ug 6,200 ka Merarihanong mga lalaki gikan sa usa ka bulan ang kagulangon pataas, 3,200 niini nila ang nag-edad ug 30 ngadto sa 50 anyos ug misulod sa grupong tig-alagad “alang sa pag-alagad sa tolda nga tagboanan.” (Num 3:​33, 34; 4:42-45) Ang ilang pangulo niadtong higayona mao si Zuriel, ug ang ilang kampo nahimutang sa A nga kiliran sa tabernakulo. (Num 3:35) Panahon sa pagpanaw sa kamingawan, ang tulo-ka-tribo nga dibisyon ni Juda mao ang unang mobiya gikan sa gikampohan. Dayon ang mga Gersonhon ug mga Merarihanon ‘manglakaw ingon nga mga tigdala sa tabernakulo,’ nga pagasundan sa tulo-ka-tribo nga dibisyon ni Ruben ug dayon sa Kohatnong mga Levihanon. (Num 10:14-21) Ang mga Merarihanon mao ang gitugyanan sa mga kuwadrong bayanan, mga balabag, mga haligi, ug sa mga suksokanang patongan sa tabernakulo, ingon man sa “tanang galamiton niini ug sa tanang pag-alagad niini,” dugang pa sa mga haligi, mga suksokanang patongan, mga ugsok sa tolda, ug mga pisi sa tolda sa sawang. (Num 3:​36, 37) Aron madala kining bug-at nga mga butang, sila gihatagan ug upat ka karomata ug walo ka baka. Didto sa kamingawan sila ug ang mga Gersonhon maoy “ubos sa pagdumala” sa anak nga lalaki ni Aaron nga si Itamar.​—Num 7:6-8.

Sa pagbahin sa Yutang Saad ubos ni Josue, 12 ka siyudad ang gihatag ngadto sa mga Merarihanon, upat gikan sa matag usa sa mga teritoryo sa tribo ni Ruben, Gad, ug Zabulon. Usa niini, ang Ramot sa Gilead (diha sa teritoryo sa Gad), maoy usa ka “siyudad nga dalangpanan.”​—Jos 21:​7, 34-40; 1Cr 6:​63, 77-81.

Sa adlaw ni David 220 ka Merarihanon, uban kang Asaias ingong ilang pangulo, ang mitabang sa ubang mga Levihanon sa pagdala sa arka sa pakigsaad ngadto sa Jerusalem gikan sa balay ni Obed-edom. (1Cr 15:1-6, 25) Human nga ang Arka aduna nay dapit nga kapahilunaan, ang pipila sa mga Merarihanon “gihatagan ni David ug mga katungdanan sa pagdumala sa pag-awit diha sa balay ni Jehova.” (1Cr 6:​31, 44-47) Ang ubang mga Merarihanon gitudlo ingong mga magbalantay-sa-ganghaan.​—1Cr 26:​1, 10, 19.

Panahon sa programa sa repormasyon sa Judeanhon nga si Haring Ezequias, ang pipila ka Merarihanon maoy kauban sa mga Levihanon nga naghinlo sa templo. (2Cr 29:​12, 15) Sa ulahi, sa ikapitong siglo W.K.P., ang Merarihanon nga si Jahat ug Abdias gitudlo ni Haring Josias ingong magtatan-aw sa mga tig-ayo sa templo.​—2Cr 34:​12, 13.

Ang mga Merarihanon maoy lakip sa mga Levihanon nga namalik gikan sa pagkadestiyero sa Babilonya niadtong 537 W.K.P. (1Cr 9:14) Sa ulahi (niadtong 468 W.K.P.), ang mga Merarihanon maoy lakip sa mga Levihanon nga mikuyog kang Esdras gikan sa Babilonya paingon sa Jerusalem.​—Esd 8:​1, 18, 19, 31, 32.