1. Usa sa pangulong mga saserdote nga mikuyog kang Zorobabel gikan sa Babilonya paingon sa Jerusalem niadtong 537 W.K.P. (Neh 12:1-7) Ang usa ka balay o banay sa mga saserdote nga kaliwat sa amahan sa misunod nga kaliwatan ginganlan ug “Meraiot,” ug lagmit nga si Meremot mao ang nagpundar niini. (Neh 12:15) Susama ang pagkasulat sa maong mga ngalan diha sa Hebreohanong mga karakter.

2. Anak nga lalaki ni Uriyas ug usa ka inila nga saserdote sa mga adlaw ni Esdras ug Nehemias. Sa dihang si Esdras ug ang usa ka Hudiyong nahibilin miabot sa Jerusalem gikan sa Babilonya niadtong 468 W.K.P., si Meremot maoy lakip sa mga saserdote nga sa ilang mga kamot “gitimbang ang plata ug ang bulawan ug ang mga galamiton sa balay” ni Jehova. (Esd 8:31-34) Si Meremot maoy usa ka kaliwat ni Hakoz, nga ang pipila sa iyang mga kaliwat dili makasubay sa ilang kagikan. (Esd 2:​61, 62) Apan dayag nga ang maong dibisyon sa banay diin siya nahisakop makasubay sa linya sa kagikan niini, sanglit si Meremot nakigbahin man sa mga kalihokan sa mga saserdote. Siya nakigbahin usab sa pagbuhat sa buluhatong pagpang-ayo sa paril sa Jerusalem ilalom sa pagdumala ni Nehemias.​—Neh 3:​3, 4, 21.

3. Usa ka saserdote, o ang katigulangan sa usa niadtong nagpamatuod pinaagig timbre sa “kasaligang kontrata” sa adlaw ni Nehemias.​—Neh 9:38–​10:5.

4. Usa ka Israelinhon nga lakip sa “mga anak ni Bani” kinsa nangasawa ug langyawng mga asawa apan nagpapahawa kanila “uban sa mga anak” sa adlaw ni Esdras.​—Esd 10:​25, 34, 36, 44.