[Pakiglalis].

1. Usa ka dapit duol sa Repidim nga gikampohan sa Israel didto sa kamingawan. Didto milagrosong gitagana ni Jehova ang suplay sa tubig sa dihang gihampak ni Moises ang bato sa Horeb pinaagi sa iyang sungkod. Unya gitawag ni Moises ang dapit nga “Masah” (nagkahulogang “Pagsulay”) ug “Meriba” (nagkahulogang “Pakiglalis”). Kini nga mga ngalan nagpahinumdom sa pagpakiglalis sa Israel kang Moises ug sa ilang pagsulay sa Diyos tungod sa pagkawalay tubig.​—Ex 17:1-7.

2. Ang ngalang “Meriba” sa ulahi gingalan usab sa usa ka dapit duol sa Kades, ug ang hinungdan kon nganong kini gingalan niining dapita maoy tungod usab sa pagpakiglalis sa Israel kang Moises ug kang Jehova bahin sa pagkawalay tubig. (Num 20:1-13) Dili sama sa dapit nga duol sa Repidim, diin ang mga Israelinhon nagkampo wala pay duha ka bulan human mogawas sa Ehipto (Ex 16:1; 17:1; 19:1), kini nga Meriba wala nganli ug Masah. Usahay gipalahi kini sa Kasulatan gikan sa ubang dapit pinaagi sa paghisgot niini nga “mga tubig sa Meriba” (Sal 106:32) o “mga tubig sa Meriba sa Kades.” (Num 27:14; Deu 32:51) Apan, sa Salmo 81:7 ang paghisgot kang Jehova nga nagsulay sa Israel pinaagi sa “mga tubig sa Meriba” mahimong nagpasabot sa panghitabo didto sa Meriba duol sa Repidim.​—Itandi ang Deu 33:8.

Si Moises ug Aaron napakyas sa pagbalaan kang Jehova maylabot sa milagrosong tagana sa tubig didto sa Meriba sa dapit sa Kades. Busa sila nawad-an sa pribilehiyo nga makasulod sa Yutang Saad. Kining hitaboa daw nahitabo sa ika-40 nga tuig sa paglatagaw sa Israel didto sa kamingawan.​—Num 20:​1, 9-13, 22-28; 33:​38, 39.