1. Usa sa mga anak nga lalaki ni Japet nga anak ni Noe; siya natawo human sa Lunop. (Gen 10:2; 1Cr 1:5) Kining ngalana dayag nga nagtumong sa iyang mga kaliwat ug sa yuta nga ilang gipuy-an. Ang manalagnang si Ezequiel kanunayng naghisgot sa Mesek uban sa Tubal, nga nagpailang kini sila nahimutang sa A sa Palestina. Sila gihubit ingong tigbaligyag mga ulipon ug tumbaga ngadto sa Tiro, gustog gubat, ug kaalyado o kaha sakop ni ‘Gog sa Magog’ diha sa gitagnang mapintason niyang pagpakiggubat batok “sa kabukiran sa Israel.” (Eze 27:13; 32:26; 38:​2, 3; 39:​1, 2; tan-awa ang GOG Num. 2.) Ang Mesek gihisgotan nga bulag sa Tubal diha sa Salmo 120:​5, dayag ingong paghawas sa usa ka agresibo, luog nga katawhan.

Mga usa ka libo ka tuig human sa Lunop, ang Asiryanhong mga inskripsiyon naghisgot ug usa ka katawhan nga gitawag ug Musku nga namuyo sa  usa ka dapit sa Asia Minor sa K sa Asirya. Si Emperador Tiglat-pileser I, Tukulti-Ninurta II, Ashurnasirpal II, ug Sargon sa Asirya tanan naghisgot ug mga pagpakig-away batok kanila. Ang kamatuoran nga ang Musku kanunayng gihisgotan uban sa Tabali (lagmit ang Tubal sa Bibliya) naghatag ug katarongan sa pagtuo nga ang ngalang Musku naggikan sa Mesek. Si Herodotus (III, 94) sa ulahi naghisgot sa Moschi ug sa Tibareni sa samang paagi.

Gituohan sa daghang eskolar nga ang Musku nalangkit sa mga Frigiahanon, nga lagmit nagdominar sa kinadak-ang bahin sa kasadpan ug sentral nga Asia Minor sa hapit nang matapos ang ikaduhang milenyo W.K.P. Si Haring Mita sa Muski, nga gihisgotan ni Emperador Sargon sa Asirya, gituohan sa pipila ka eskolar nga mao ra si Haring Midas sa Frigia, nga gihubit sa Gregong tradisyon nga nagmando sa samang yugto.

2. Ang Mesek makita diha sa Masoretikong teksto sa 1 Cronicas 1:17 ingong usa ka kaliwat ni Sem, apan ang samang talaan sa kagikan diha sa Genesis 10:23 mabasa nga “Mas.”