NAGPUYO sa ilang hinatag-sa-Diyos nga yuta, ang nasod sa Israel gilibotan sa mga nasod nga nagsimba sa bakak nga mga diyos. Ang mga Israelinhon migula gikan sa Ehipto, diin ang mga hayop ginasimba. Sa sidlakan ug sa habagatan-sidlakan kanila nahimutang ang Ammon, Moab, ug Edom​—layong mga paryente sa mga Israelinhon apan mga magsisimba sa idolo. Ang daghag-diyos nga mga Filistehanon nag-okupar sa patag daplin sa baybayon dapit sa kasadpan. Sa amihanan sa Israel ubay sa kabaybayonan anaa ang mga Fenicianhon, kansang relihiyosong mga buhat naglakip sa sodomiya, bestialidad, ug paghalad sa bata. Ug makita sa relihiyon sa mga Siryanhon ang hubo nga mga larawan sa mga diyosa nga nagpasiugda sa ilang seksuwalidad. Aron magpadayong dalawaton kang Jehova, ang Israel kinahanglan nga magpabiling bulag gikan sa mga nasod nga naglibot kanila.

Ingong panalipod sa Israel, gihatag ni Jehova kanila ang Moisesnong Balaod, nga nahimong usa ka ‘paril nga nag-ulang’ aron magpabilin silang nahimulag sa naglibot nga mga nasod. (Efe 2:14) Kinahanglang dili sila makig-alyansa sa maong mga nasod, dili makigminyo kanila, ni mosundog sa ilang relihiyosong mga buhat. (2Cr 16:7; 2Ha 17:13-15) Basta sundon sa Israel kini nga mga balaod, sila magpabiling usa ka katawhang balaan.

Hinunoa, ang mga indibiduwal gikan sa naglibot nga mga nasod wala babagi sa pagsimba sa matuod nga Diyos. Mahimo nilang biyaan ang ilang idolatrosong mga paagi ug mahimong mga magsisimba ni Jehova. “Ang Diyos dili mapihigon.” (Buh 10:34) Bisan tuod iyang gitipigang bulag ang Israel, gihikay ni Jehova nga matuman ang iyang katuyoan sa pagpanalangin sa katawhan sa tanang kanasoran sa kaulahian.​—Gen 22:18.