SA DIHANG gihatag ni Jehova sa Israel ang yuta nga iyang gisaad kang Abraham, ang mga nasod nga daotan sa moral maoy nag-okupar niana. Prangka nga gitaho sa Bibliya nga gimando sa Diyos nga laglagon ang maong daotang mga nasod, ug iyang gitudlo ang mga Israelinhon ingong mga tigpahamtang ug silot. (Deu 7:2) Gisaway kini sa daghang kritiko. Ang uban mapainubsanong miila nga dili gayod angayan ang dili-hingpit nga mga tawo nga mobarog ingong mga maghuhukom sa Diyos. (Itandi ang Eze 18:29.) Ilang gitinguha nga masabtan ang mga pamaagi sa Diyos. Unsay ilang nakat-onan?

Tin-awng gipasundayag niini nga rekord nga ang tanang katawhan manubag sa Maglalalang sa katawhan, si Jehova nga Diyos, sila may pagtuo man kaniya o wala. Gipakita niini nga ang Diyos mapailobon apan wala usab magpakabuta sa kasaypanan. (Gen 15:16) Tin-awng gipakita niini nga gitugyan ni Jehova sa mga ginikanan ang responsibilidad alang sa ilang mga anak; wala niya ipahigawas ang mga ginikanan niini nga responsibilidad ug sa ingon nagtugot kanilang mobati nga ang ilang mga buhat nag-apektar lamang sa ilang kaugalingon. (Deu 30:19; Jos 10:40) Gipakita usab niini nga ang tanang motalikod sa ilang daotang dalan ug mosimba kang Jehova makalingkawas sa kalaglagan.​—Jos 6:25; 9:3–​10:11.

Tin-awng gipaila sa Bibliya ang daotang mga buhat nga gibuhat sa mga molupyo sa Canaan. Ang Halley’s Bible Handbook (1964, p. 161) mihinapos: “Ang mga arkeologo nga nagkalot sa mga kagun-oban sa mga siyudad sa Canaan nahibulong kon nganong sila wala dayon laglaga sa Diyos.” Ang leksiyon tin-aw: Dili tugotan ni Jehova nga magpadayon sa walay kataposan ang pagkadaotan.