ANG olibo, almendras, alkapara, palma nga datiles​—maoy pipila lamang sa halos usa ka gatos ka tanom ug mga kahoy nga gihisgotan sa Kasulatan. Ang atong pagkahibalo bahin sa mga tanom sa Bibliya motaganag hinungdanong impormasyon nga mohatag ug katin-awan bahin sa kahulogan sa pipila ka pulong sa Bibliya.

Tagda ingong pananglitan ang kahoyng olibo​—usa sa labing bililhong mga tanom sa kapanahonan sa Bibliya (tan-awa ang hulagway sa tuo). Kining maanindot nga kahoy, nga sagad lubag, baliko, ug bukohon, maoy lig-on kaayo, nga subsob mabuhi sulod sa kasiglohan. Kini gihisgotan diha sa unang bahin sa Kasulatan. Human sa Lunop, usa ka salampati ang mibalik kang Noe diha sa arka “ug, tan-awa! dihay bag-ong kinutlo nga dahon sa olibo sa sungo niini.” Kini nagpakita kang Noe nga ang katubigan mihubas na.​—Gen 8:11.

Ang salmista sa Bibliya naghisgot sa pipila ka kinaiyahan sa kahoyng olibo sa dihang siya misaad niadtong may kahadlok kang Jehova: “Ang imong mga anak mahisama sa mga turok sa mga kahoyng olibo libot sa imong lamesa.” (Sal 128:1-3) Ang pinutol nga mga turok o mga salingsing sa gulang na nga kahoyng olibo sagad maoy gigamit sa pagtanom ug bag-ong mga kahoy. Dugang pa, ang mga gamot sa gulang na nga mga kahoyng olibo mahimong manurok, sa ingon magpatunhay niini. Sama sa maong mga turok, ang mga anak maglibot sa usa ka amahan, nga makaamot sa kalipay sa pamilya.

Ang evergreen o kanunayng may dahon nga kahoyng olibo gipabilhan pag-ayo tungod sa lana niini. Ang lana sa olibo maoy pangunang bahin sa pagkaon sa mga Israelinhon ug kasagarang gigamit ingong kosmetiko ug ingong sugnod, ug kini maoy hinungdanong baligya. Kini ihaplas sa mga bun-og ug sa mga samad aron sa pagpahumok ug sa pagpahupay niini. (Luc 10:​33, 34) Kon ihiso, ang lana sa olibo makapahimuot ug makaparepresko. Busa, ang mga ansiyano sa Kristohanong kongregasyon gitambagan nga mag-ampo alang sa tawong masakiton sa espirituwal, sa mahulagwayong paagi “maghaplas kaniya ug lana sa ngalan ni Jehova”​—magpadapat sa Pulong sa Diyos aron sa paghupay, pagtul-id, ug sa paglipay kaniya.​—San 5:​13-15.