[Kinsa ang Sama Kang Jehova?].

1. Asawa ni Haring Rehoboam, anak nga babaye ni Uriel sa Gibea, ug ang inahan ni Haring Abias sa Juda. Gitawag usab siya ug “Maaca.”​—2Cr 11:​18, 20; 13:​1, 2.

2. Anak nga lalaki ni Imla ug usa ka manalagna ni Jehova ngadto sa amihanang gingharian sa Israel panahon sa paghari ni Haring Ahab. (1Ha 22:8) Samtang si Haring Jehosapat sa Juda miduaw kang Ahab, gidapit siya sa Israelinhong hari nga moduyog kaniya sa pagpakiggubat batok sa mga Siryanhon aron mapanag-iya pag-usab ang Ramot-gilead. Misugot si Jehosapat, pero mihangyo siya nga konsultahon ang pulong ni Jehova. Busa gipatawag ni Ahab ang 400 ka manalagna ug nangutana kanila: “Ako ba moadto batok sa Ramot-gilead sa gubat, o ako ba magdumili?” Sila apirmatibong mitubag nga itugyan ni Jehova ang siyudad nganha sa kamot sa hari. Apan si Jehosapat buot ug dugang pang katinoan, nga niana si Ahab nagpanuko sa pagpatawag kang Micaias, ang manalagna nga kanunayng nanagna ug daotan batok kaniya. Ang gipadalang mensahero nag-awhag kang Micaias sa pagsulti ug mga pulong ngadto kang Ahab sama sa mga pulong sa usa sa ubang mga manalagna. Sa sinugdan gibuhat kana ni Micaias, apan gipapanumpa siya ni Ahab sa pagsulti sa “kamatuoran sa ngalan ni Jehova.” Niana, si Micaias miingon: “Nakita ko gayod ang tanang Israelinhon nga nagakatibulaag sa kabukiran, sama sa mga karnero nga walay magbalantay.”​—1Ha 22:1-17; 2Cr 18:1-16.

Dayon giasoy ni Micaias ang iyang panan-awon bahin kang Jehova nga naglingkod sa Iyang langitnong trono ug nangutana sa nagkatigom nga espiritung mga linalang: “Kinsa ang motonto kang Ahab, aron siya moadto ug mapukan sa Ramot-gilead?” Usa sa mga espiritu miboluntaryo nga moadto ug mahimong “usa ka malimbongong espiritu” diha sa baba sa tanang manalagna ni Ahab. Si Jehova mitubag: “Ikaw motonto kaniya, ug, dugang pa, ikaw mogawas nga mananaog. Lakaw ug buhata ang ingon niana.” Unya giingnan ni Micaias si Ahab nga ang Diyos nagbutang ug usa ka malimbongong espiritu diha sa baba sa tanan niyang mga manalagna, “apan si Jehova misulti ug kadaotan mahitungod kanimo.” Tungod niana ang mini nga manalagnang si Zedekias mitamparos kang Micaias sa aping ug mabugalbugalong nangutana: “Diin ba miagi ang espiritu ni Jehova gikan kanako aron sa pagpakigsulti kanimo?” Maisogong mitubag si Micaias: “Tan-awa! Imong makita kon diing dalana nianang adlawa sa dihang ikaw mosulod sa kinasulorang lawak aron sa pagtago.” Human niana gisugo ni Ahab nga ibutang si Micaias sa bilanggoan, diin ang manalagna tagan-an ug kinunhorang rasyon sa tinapay ug tubig hangtod nga mobalik ang hari diha sa pakigdait. Apan si Ahab wala na gayod makabalik, tungod kay sa panahon sa pagpakiggubat didto sa Ramot-gilead, “dihay usa ka tawo nga nagbawog sa iyang busogan sa kainosente” ug wala tuyoa nga iyang naigo sa pana ang Israelinhong hari, ug sa kataposan siya namatay. Ang kataposang mga pulong ni Micaias ngadto kang Ahab mao kini: “Kon mahibalik ka man gayod diha sa pakigdait, si Jehova wala mosulti kanako.” Ang kamatayon sa hari nagpamatuod nga si Micaias usa gayod ka manalagna ni Jehova.​—1Ha 22:18-37; 2Cr 18:17-34.

3. Usa sa mga prinsipe nga gipadala ni Haring Jehosapat sa tibuok Juda ingong mga magtutudlo, kauban sa mga Levihanon ug mga saserdote. Diha kanila “ang basahon sa balaod ni Jehova”  samtang gitudloan nila ang katawhan sa tanang siyudad sa Juda.​—2Cr 17:7-9.

4. Amahan ni Akbor (Abdon) kinsa duyog sa uban gipadala ni Haring Josias aron magpakisayod kang Jehova mahitungod sa mga pulong sa bag-ong nakaplagan nga basahon sa Balaod. Siya gitawag usab ug Miqueas.​—2Ha 22:​12, 13; 2Cr 34:​20, 21.

5. “Anak nga lalaki ni Gemarias nga anak nga lalaki ni Sapan.” Didto siya sa lawak-kan-anan sa iyang amahang si Gemarias sa dihang publikong gibasa didto ni Baruk ang linukot nga basahon nga naundan sa mga pulong ni Jehova pinaagi kang Jeremias batok sa Israel, Juda, ug sa tanang kanasoran. Human madungog kini nga mensahe, gitaho ni Micaias ang iyang nadungog ngadto sa sekretaryo ni Haring Jehoiakim ug sa mga prinsipe.​—Jer 36:​2, 9-13.

6. Katigulangan sa saserdoteng si Zacarias nga kauban niadtong nagdalag mga trompeta panahon sa seremonyas sa inagurasyon sa pagkatukod pag-usab sa paril sa Jerusalem. Siya gitawag usab ug Mica.​—Neh 11:22; 12:​31, 35.

7. Usa ka saserdote nga kauban niadtong nagdalag mga trompeta kinsa mitugtog diha sa usa sa duha ka “koro sa pagpasalamat” nga miduyog sa pagmartsa panahon sa inagurasyon sa pagkatukod pag-usab sa paril sa Jerusalem sa adlaw ni Nehemias.​—Neh 12:​40, 41.