[Hilit [nga mao, tago] nga Dapit].

Usa ka dapit nga gituohang mao ang modernong Mukhmas diha sa usa ka bungtod nga mga 600 m (2,000 p) ibabaw sa lebel sa dagat ug mga 11 km (7 mi) sa AAS sa Jerusalem. Kini nahimutang sa A sa Wadi Suweinit (Nahal Mikhmas), nga giisip nga mao ang “lugot nga agianan sa Mikmas.” (1Sa 13:23) Giduyogan sa ubang mga lugot gikan sa HK ug sa AK, ang Wadi Suweinit nakaabot gikan sa bukirong rehiyon sa Epraim hangtod sa Walog sa Jordan.

Sa walay duhaduha agig pagpangandam aron mahigawas ang Israel gikan sa pagkontrolar sa mga Filistehanon, si Haring Saul mipili ug 3,000 ka sundalo. Gikan niini, 2,000 ang nagkampo uban kaniya didto sa Mikmas ug sa bukirong rehiyon sa Bethel, ug ang uban mikuyog sa iyang anak nga lalaki nga si Jonatan didto sa Gibea. Sa ulahi, sa haduol nga Geba (“Gibea,” Vg), gipukan ni Jonatan ang “garison” sa mga Filistehanon. Agig panimalos ang mga Filistehanon nagtigom ug usa ka dakong panon sa kasundalohan, lakip na ang mga karo ug mga mangangabayo, ug dayag nga nagpugos kang Saul sa pagsibog gikan sa Mikmas ngadto sa Gilgal.  Kay gipit-os pag-ayo sa mga Filistehanon, daghang Israelinhon ang mitago sulod sa mga langob ug sa mga lungag; ang uban midangop sa S sa Jordan. Kini nga pagkatibulaag sa mga manggugubat nga Israelinhon atubangan sa hulga sa mga Filistehanon mao ang gigamit ni Saul sa ulahi ingong katarongan sa dili niya paghulat nga masinugtanon kang Samuel aron sa paghalad. Human badlonga ni Samuel tungod sa iyang mapangahasong buhat, si Saul, uban sa iyang gamay na lang nga puwersa nga mga 600 ka sundalo, miadto kang Jonatan sa Geba. (1Sa 13:1-16) Sumala sa 1 Samuel 14:​2, si Saul lagmit nagbalhin sa iyang kampo ngadto sa Migron duol sa Gibea.

Gipangunahan ni Jonatan ang Pagparot sa mga Filistehanon. Tungod kay tulo ka pundok sa Filistehanong mga manunulong ang mogula gikan sa ilang kampo sa Mikmas ug usa ka pundok sa mga Filistehanon ang mosulong ngadto sa “lugot nga agianan sa Mikmas,” si Jonatan mihukom nga taposon kini nga hulga. (1Sa 13:16-23) Aron mahimo kini, siya mitabok sa lugot nga agianan, nga (kon kini ang Wadi Suweinit) maoy usa ka lawom nga lugot nga may titip kaayong mga pangpang dapit sa S sa Geba (Jabaʽ). Adunay duha ka bantaawng mga bungtod nga may titip nga dagkong mga bato sa mga kiliran niini diha sa dapit diin ang Wadi Suweinit kurbada kaayo. Lagmit kini mao ang ‘samag-ngipon nga dagkong mga bato,’ ang Bozez ug Sene, nga ang samag-ngipon nga mga kilid niini tingali nalingin na tungod sa mga pagkakankan sulod sa mga 30 ka siglo. (1Sa 14:1-7) Imposible gayod alang sa usa ka estranyo nga makalusot sa makalibog nga agianang mga bungdo, gagmayng mga bungtod, ug hait nga mga bato diha sa lugot. Apan si Jonatan, nga nagdako sa teritoryo sa Benjamin, lagmit suheto kaayo niini. Samtang ang kampo sa iyang amahan didto sa Mikmas ug ang iyaha didto sa Geba, walay duhaduha nga si Jonatan may daghang kahigayonan nga masinati ang maong dapit.

Si Jonatan ug ang iyang tigdala sa armadura mipaingon sa Mikmas ug nagpakita sa pundok sa mga Filistehanon. Sa dihang nakita sila, ang mga Filistehanon misinggit: “Tungas kamo diri kanamo, ug pailhon namo kamo sa usa ka butang!” Human niana, si Jonatan, nga gisundan sa iyang tigdala sa armadura, mikatkat sa titip nga agianan paingon sa pundok sa mga Filistehanon. Silang duha nakapatay ug mga 20 ka Filistehanon sulod sa luna nga ang gitas-on maoy mga katunga sa madaro sa usa ka parisan sa mga torong baka sa usa ka adlaw.​—1Sa 14:​8, 11-14, ftn sa Rbi8.

Usa ka linog nga gikan sa Diyos, nga ang epekto nabatyagan sa mga magbalantay ni Saul, nagpaguliyang sa kampo sa mga Filistehanon. Sa dihang si Saul ug ang iyang mga tawo miabot sa maong dapit, daghan nang Filistehanon nga nagkaguliyang ang nagpinatyanay ug ang uban nangalagiw na. Ang kasundalohan ni Saul nga niadtong tungora lagmit nasangkapan sa mga hinagiban sa mga Filistehanon nga ilang nakaplagan sa maong dapit, migukod sa nangalagiwng mga kaaway. Giduyogan sa mga Israelinhon nga nanago ug niadtong midapig kanhi sa mga Filistehanon, “ilang gipamatay ang mga Filistehanon gikan sa Mikmas hangtod sa Aijalon.”​—1Sa 14:15-23, 31.

Sumala sa 1 Samuel 13:​5, ang kasundalohang Filistehanon sa Mikmas naglakip sa 30,000 ka karo nga iggugubat. Kining maong gidaghanon daghan ra kaayo kay sa nagamit sa ubay-ubayng ubang mga pagpakiggubat (itandi ang Huk 4:13; 2Cr 12:​2, 3; 14:9), ug lisod handurawon kon sa unsang paagi ang ingon kadaghang karo nga iggugubat nagamit diha sa maong bukirong dapit. Tungod niini ang gidaghanong 30,000 giisip sa kadaghanan ingong sayop sa magkokopya. Ang Syriac nga Peshitta ug ang Lagardian nga edisyon sa Gregong Septuagint naghubad niini nga 3,000, ug ang daghang hubad sa Bibliya misunod niini nga hubad. (AT, JB, Mo) Apan, gisugyot pa gani ang mas ubos nga gidaghanon.

Kasiglohan sa ulahi, ang tagna ni Isaias naghisgot sa Mikmas ingong ang dapit diin ang mananaog nga Asiryanhon ‘magbutang sa iyang mga gamit.’ (Isa 10:​24, 28) Human mamalik ang mga Israelinhon gikan sa ilang pagkadestiyero sa Babilonya niadtong 537 W.K.P., ang Mikmas lagmit gipuy-an pag-usab sa mga Benjaminhon.​—Esd 2:​1, 2, 27; Neh 7:31; 11:31.