Mga panghitabo nga makapahibulong o makapatingala; mga epekto sa pisikal nga kalibotan nga molabaw sa tanang nasayran nga mga gahom sa tawo o sa kinaiyahan ug busa gipasidungog sa labaw-kinaiyanhong puwersa. Sa Hebreohanong Kasulatan ang pulong nga moh·phethʹ, nga usahay gihubad nga “milagro,” nagpasabot usab ug “tilimad-on,” “katingalahan,” ug “timaan.” (Deu 28:46; 1Cr 16:​12, ftn sa Rbi8) Kini sagad nga gigamit kauban sa Hebreohanong pulong nga ʼohth, nga nagkahulogang “ilhanan.” (Deu 4:34) Sa Gregong Kasulatan ang pulong nga dyʹna·mis, “gahom,” gihubad nga “gamhanang mga buhat,” “katakos,” “milagro.”​—Mat 25:15; Luc 6:19; 1Co 12:​10, AT, KJ, NW, RS.

Ang usa ka milagro, nga katingalahan sa mata sa nakakita, maoy butang nga saylo sa iyang katakos sa paghimo o lisod masabtan sa bug-os. Kini usab maoy usa ka gamhanang buhat, nga nagkinahanglan ug mas dakong gahom o kahibalo kay sa iyang nabatonan. Apan gikan sa panglantaw sa usa nga maoy tinubdan sa maong gahom, kini dili usa ka milagro. Siya nakasabot niini ug may katakos sa pagbuhat niini. Busa, ang daghang buhat nga gihimo sa Diyos maoy katingalahan sa mga tawo nga nakakita niana apan maoy pagpasundayag lamang sa iyang gahom. Kon ang usa ka tawo nagtuo sa usa ka bathala, ilabina sa Diyos sa paglalang, siya dili gayod makalimod sa gahom sa Diyos sa pagpalampos sa mga butang nga makalilisang sa mga mata sa mga tawo.​—Rom 1:20; tan-awa ang GAHOM, GAMHANANG MGA BUHAT.

Ang mga milagro nahiuyon ba sa balaod sa kinaiyahan?

Pinaagi sa pagtuon ug pagpaniid, ang mga tigdukiduki nakamatikod sa nagkadaiyang popareho nga mga palakaw sa mga butang sa uniberso ug nakaila sa mga balaod nga nagagahom sa maong pagkapopareho diha sa mga katingad-anan sa kinaiyahan. Ang usa niana mao ang ‘balaod sa grabidad.’ Ang mga siyentipiko miadmitir sa pagkakomplikado ug sa pagkakasaligan niining mga balaora, ug ang pagtawag niini nga “mga balaod” nagpasabot sa paglungtad sa Usa nga nagpatuman sa maong mga balaod. Ang mga maduhaduhaon nag-isip sa usa ka milagro ingong paglapas sa mga balaod nga ilang gidawat nga kinaiyanhon, dili-mausab, dili-mapugngan; busa, matod nila, ang usa ka milagro dili gayod mahitabo. Maayong ibutang sa hunahuna nga ang ilang tinamdan mao nga kon kini dili nato masabtan ug mapatin-aw sumala sa atong pagkaila niini nga mga balaod, kini dili mahitabo.

Apan, ang may katakos nga mga siyentipiko nahimong mas mainampingon bahin sa pagsulti nga imposible ang usa ka butang. Si Propesor John R. Brobeck sa Unibersidad sa Pennsylvania nag-ingon: “Ang usa ka siyentipiko dili na makahimo sa pagsulti sa tinud-anay nga imposible ang usa ka butang. Siya makaingon lamang nga kini dili mapamatud-an. Apan siya tingali makaingon nga ang maong butang imposibleng ipatin-aw sumala sa atong presenteng kahibalo. Ang siyensiya dili makaingon nga ang tanang kinaiyahan sa materya ug ang tanang matang sa enerhiya nahibaloan na karon. . . . [Alang sa usa ka milagro] ang usa ka butang nga kinahanglang idugang mao ang usa ka tinubdan sa enerhiya nga wala nato mahibaloi sa atong biolohikal ug pisyolohikal nga mga siyensiya. Sa atong Kasulatan kini nga tinubdan sa enerhiya gipaila ingong ang gahom sa Diyos.” (Time, Hulyo 4, 1955) Sukad nga nahimo kini nga pahayag, ang dugang siyentipikanhong kaugmaran mas nagpasiugda pa niini.

Wala gayod bug-os hisabti sa mga siyentipiko ang mga kinaiyahan sa kainit, kahayag, atomika ug nukleyar nga paglihok, elektrisidad, o sa bisan unsang mga porma sa materya bisan ubos sa normal nga mga kahimtang. Ilabina nga wala gayod nila hisabti kini nga mga kinaiyahan ubos sa dili-naandan o dili-normal nga mga kahimtang. Pananglitan, dili pa kaayo dugay nga gihimo ang mabug-osong mga imbestigasyon ubos sa mga kahimtang nga hilabihan ka bugnaw, apan niining mubo nga panahon, daghang katingad-ang mga paglihok sa mga elemento ang naobserbahan. Ang tingga, nga usa ka dili-maayong tigdala sa elektrisidad, sa dihang gituslob sa likidong helium nga gipabugnaw sa temperatura nga −271°C. (−456°F.) sa katingalahan nahimong usa ka ekselenteng tigdala sa elektrisidad ug usa ka gamhanang elektromagnetiko sa dihang gibutang duol niini ang usa ka pirasong batobalani. Diha sa maong hilabihan ka bugnaw nga temperatura ang helium mismo mopatim-awng dili mopatuo sa balaod sa grabidad pinaagi sa pagkamang paingon sa kilid sa usa ka bildong sudlanan ug ngadto sa baba niini, nga miawas mismo gikan sa sudlanan.​—Matter, Life Science Library, 1963, pp. 68, 69.

Kini nga kaplag maoy usa sa daghang nakapahingangha sa mga siyentipiko, nga daw nagdaot sa ilang unang mga ideya. Nan, sa unsang paagi makaingon ang si bisan kinsa nga ang Diyos naglapas sa iyang kaugalingong mga balaod sa paghimog gamhanang mga buhat nga daw katingalahan ug milagroso alang sa mga tawo? Sa pagkatinuod ang Maglalalang sa pisikal nga uniberso may hingpit  nga paggahom sa iyang gilalang ug makamaniobra niining mga butanga sulod sa gambalay sa mga balaod nga iyang gihimong kinaiyanhon diha niini. (Job 38) Siya makapatungha sa kahimtang nga hinungdanon sa pag-obra niining mga buhata; siya makapadali, makapahinay, makapabag-o, o makabalda sa mga reaksiyon. O ang mga manulonda, nga mas gamhanan kay sa tawo, makabuhat niana agig pagtuman sa kabubut-on ni Jehova.​—Ex 3:2; Sal 78:44-49.

Tinong wala hilabwi o lapasa sa siyentipiko ang pisikal nga mga balaod sa dihang siya mogamit ug dugang kainit o kabugnaw, o dugang oksiheno, ug uban pa, sa pagpadali o sa pagpahinay sa kemikal nga proseso. Bisan pa niana, ang mga maduhaduhaon naghagit sa mga milagro sa Bibliya, lakip ang “milagro” sa paglalang. Sa ingon, kini nga mga maghahagit nagpatuo nga sila pamilyar sa tanang kahimtang ug mga proseso nga nahitabo sukad. Sila nangusog nga ang mga palakaw sa Maglalalang dili mahimong molabaw sa ilang hiktin nga pagsabot sa mga balaod nga nagagahom sa pisikal nga mga butang.

Kini nga kahuyangan sa bahin sa mga siyentipiko giila sa usa ka Swekong propesor sa plasma physics, nga nagpatin-aw: “Walay usa nga nagduhaduha sa pagsunod sa atmospera sa yuta ngadto sa mga balaod sa mekanika ug atomikong pisika. Ang tanan managsama, mahimong malisod gayod alang kanato ang pagtino kon sa unsang paagi gipalakaw kining mga balaora maylabot sa bisan unsang kahimtang nga naglangkit sa mga katingad-anan sa atmospera.” (Worlds-Antiworlds, ni H. Alfvén, 1966, p. 5) Gipadapat sa propesor kining hunahunaa sa sinugdan sa uniberso. Gimugna sa Diyos ang pisikal nga mga balaod nga nagagahom sa yuta, adlaw, ug bulan, ug sulod sa gambalay niini ang mga tawo nakahimo ug kahibulongang mga butang. Sa pagkatinuod ang Diyos makapalihok sa mga balaod aron makapatunghag resulta nga wala dahoma sa mga tawo; dili problema alang kaniya ang pagbahin sa Pulang Dagat aron ‘ang katubigan mahimong paril’ sa matag kilid. (Ex 14:22) Bisan pag alang sa tawo ang paglakaw sa tubig maoy usa ka katingalahang abilidad, pagkasayon niini nga himoon pinaagi sa gahom sa “Usa nga nagbuklad sa mga langit sama sa usa ka pinong gasa, nga nagladlad niini sama sa usa ka tolda nga pagapuy-an.” Dugang pa, ang Diyos gihubit ingong naglalang ug nagkontrolar sa tanang butang sa mga langit, ug gikaingon nga “gumikan sa kadagaya sa dinamikong kusog, kay siya usab mabaskog sa gahom, walay usa kanila ang nawala.”​—Isa 40:​21, 22, 25, 26.

Sanglit ang pag-ila sa paglungtad sa balaod, sama sa balaod sa grabidad, nagpasabot nga adunay usa ka magbabalaod nga may ekselente ug labaw-tawhanong intelihensiya ug gahom, nganong duhaduhaan ang iyang abilidad sa pagbuhat sa kahibulongang mga butang? Nganong sulayan ang paglimite sa iyang palakaw ngadto sa labihan ka gamayng kahibalo ug kasinatian sa tawo? Ang patriarka nga si Job nagbatbat sa kangitngit ug kabuangan nga ngadto niini gipaadto sa Diyos silang nakig-indig sa ilang kaalam batok sa iyang kaalam.​—Job 12:16-25; itandi ang Rom 1:18-23.

Ang Pagsunod sa Diyos sa Iyang Moral nga Balaod. Ang Diyos sa paglalang dili usa ka Diyos sa kapritso, nga sa pagkadili-kasaligan naglapas sa iyang kaugalingong mga balaod. (Mal 3:6) Kini nga kamatuoran makita sa pagsunod sa Diyos sa iyang moral nga mga balaod, nga maoy uyon sa iyang pisikal nga mga balaod apan mas halangdon ug mas dungganon kay niini. Tungod sa hustisya siya dili makatugot sa pagkadili-matarong. “Putli kaayo ang imong mga mata aron motan-aw sa daotan; ug ikaw dili makahimo sa pagtan-aw sa kasamok,” nag-ingon ang iyang manalagna. (Hab 1:13; Ex 34:7) Iyang gipadayag ang iyang balaod sa Israel: “Kalag alang sa kalag, mata alang sa mata, ngipon alang sa ngipon, kamot alang sa kamot, tiil alang sa tiil.” (Deu 19:21) Sa dihang gitinguha niya ang pagpasaylo sa makaluluoy, mahinulsolong mga tawo tungod sa sala nga maoy hinungdan sa ilang pagkahimalatyon, ang Diyos nagkinahanglan ug legal nga pasukaranan kon buot niyang sundon ang iyang balaod. (Rom 5:12; Sal 49:6-8) Siya nagpamatuod nga estrikto sa iyang pagsunod sa balaod, hangtod sa punto sa paghalad sa iyang bugtong nga Anak ingong usa ka lukat alang sa mga sala sa katawhan. (Mat 20:28) Si apostol Pablo nagpasiugda nga, “tungod sa pagpagawas pinaagi sa lukat nga gibayad ni Kristo Jesus,” si Jehova ‘nakapasundayag sa iyang kaugalingong pagkamatarong . . . aron nga siya mahimong matarong bisan sa dihang nagpahayag nga matarong sa tawo nga may pagtuo kang Jesus.’ (Rom 3:​24, 26) Kon atong pabilhan nga ang Diyos, tungod sa pagtahod sa iyang moral nga mga balaod, wala magpugong sa paghalad sa iyang hinigugmang Anak, tinong atong ikapangatarongan nga dili gayod niya “lapason” ang iyang pisikal nga mga balaod aron sa pagtuman sa bisan unsa nga iyang gitinguha sulod sa pisikal nga kalalangan.

Sukwahi ba sa Kasinatian sa Tawo? Ang pag-insistir nga ang mga milagro wala mahitabo dili pamatuod nga kini wala gayod mahitabo. Ang pagkatinuod sa bisan unsang narekord nga hitabo sa kasaysayan mahimong kuwestiyonon sa usa ka tawong nagkinabuhi karong adlawa, tungod kay siya wala makasinati niini ug wala nay buhi karon nga mga saksing-nakakita aron sa pagpamatuod  niini. Apan kana dili mag-usab sa mga kamatuoran sa kasaysayan. Ang pipila mitutol sa mga asoy bahin sa mga milagro tungod kay, matod pa nila, kini sukwahi sa kasinatian sa tawo, buot ingnon, sa kasinatian sa tawo nga ilang giila nga tinuod tungod sa obserbasyon, mga basahon, ug uban pa. Kon ingon niini ang gihuptan sa mga siyentipiko, diyutay ra gayod ang mahimong panukiduki ug kaugmaran labot sa bag-ong mga butang ug mga proseso sa ilang bahin. Pananglitan, dili nila ipadayon ang panukiduki bahin sa pag-alibyo sa “dili-maayo” nga mga sakit, o sa pagpanaw sa kawanangan ngadto sa mga planeta o sa mas halayo pa nga bahin sa uniberso. Apan ilang gisusi ug usahay gidala ang katawhan ngadto sa bag-o gayod nga mga kasinatian. Ang nalampos karong adlawa makapatingala gayod sa mga tawo sa karaang kapanahonan, ug ang dakong bahin sa komon nga mga kasinatian sa modernong katawhan sa adlaw-adlaw ilang pagaisipon gayod ingong mga milagro.

Dili “Ikapatin-aw” Pinaagig Lohika. Ang pipila ka magsusupak sa asoy sa Bibliya nagtuo nga ang mga milagro sa Bibliya mahimong ikapatin-aw sa siyensiya ug sa lohikal nga paagi ingong kinaiyanhong mga panghitabo lamang ug nga ang mga magsusulat sa Bibliya nagpasidungog lamang niini nga mga panghitabo sa pagpangilabot sa Diyos. Tinuod nga ang maong mga butang sama sa mga linog gigamit. (1Sa 14:​15, 16; Mat 27:51) Apan kini mismo dili magpamatuod nga ang Diyos walay kalabotan niining mga hitaboa. Kining mga butanga dili lamang kay gamhanang mga buhat (pananglitan, ang nahisgotan na nga mga linog) kondili usab ang panahon sa pagkahitabo maoy talagsaon nga daw imposible gayod ang bisan unsang sulagmang hitabo. Ingong ilustrasyon: Ang pipila nagtuo nga ang mana nga gitagana alang sa mga Israelinhon makaplagan diha sa desyerto ingong matam-is, hagkot nga mga tagok sa mga kahoyng tamarisko ug sa mga kahoykahoy. Bisan kon tinuod pa kining maong pangangkon, ang pagtagana niini alang sa Israel sa gihapon maoy milagro tungod sa panahon sa pagtungha niini, kay kini dili makita diha sa yuta sa ikapitong adlaw sa matag semana. (Ex 16:​4, 5, 25-27) Dugang pa, bisan tuod kini udlon ug manimaho kon tagoan hangtod sa sunod nga adlaw, kini dili maunsa kon tagoan aron kan-on sa panahon sa Igpapahulay. (Ex 16:​20, 24) Ikasulti usab nga ang kahubitan niini nga mana ingong tagok gikan sa mga kahoy daw dili gayod mohaom sa kahubitan sa Bibliya labot sa mana. Ang mana sa Bibliya makaplagan diha sa yuta ug kini matunaw tungod sa init sa adlaw; kini mahimong lubkon diha sa lusong, galingon diha sa galingan, lung-agon, o lutoon sa hurnohan.​—Ex 16:19-23; Num 11:8; tan-awa ang MANA.

Pagkakasaligan sa Testimonya. Ang Kristohanong relihiyon nalanggikit sa milagro sa pagkabanhaw ni Jesu-Kristo. (1Co 15:16-19) Ang pamatuod nga kini nahitabo dili mahuyang kondili kusganon​—dihay kapin sa 500 ka saksing-nakakita aron magpamatuod nga kini nahitabo gayod.​—1Co 15:3-8; Buh 2:32.

Ang motibo sa mga tawo nga midawat nga tinuod ang milagro sa pagkabanhaw ni Jesus kinahanglang tagdon usab. Daghang tawo ang nakasinatig paglutos ug kamatayon tungod sa ilang mga gituohan​—relihiyoso, politikal, ug uban pa. Apan ang mga Kristohanon nga nag-antos tungod niana wala makabenepisyo sa materyal o sa politika. Inay nga makabaton ug gahom, bahandi, ug pagkainila, sagad nga nawad-an sila sa tanan niining mga butanga. Ilang gisangyaw ang pagkabanhaw ni Jesus apan wala mogamit sa bisan unsang matang sa kapintasan aron sa pagpalambo sa ilang mga gituohan o aron sa pagpanalipod sa ilang kaugalingon. Ug ang tawong mobasa sa ilang mga argumento makasabot nga sila maoy makataronganong mga tawo, dili mga panatiko. Sila mahigugmaong naningkamot sa pagtabang sa ilang mga isigkatawo.

Mga Kinaiyahan sa mga Milagro sa Bibliya. Ang pipila ka talagsaong kinaiyahan sa mga milagro sa Bibliya mao ang pagkadayag niini diha sa publiko, ang pagkayano niini, ang katuyoan ug ang motibo niini. Ang pipila gihimo diha sa pribado o atubangan sa gagmayng mga grupo (1Ha 17:19-24; Mar 1:29-31; Buh 9:39-41), apan sagad kini maoy sa publiko, atubangan sa linibo o gani sa minilyong tumatan-aw. (Ex 14:21-31; 19:16-19) Ang mga milagro ni Jesus gihimo sa dayag ug sa publiko​—walay pagkasekreto niini; ug iyang giayo ang tanan nga miduol kaniya, nga wala magpasangil sa kakulang ug pagtuo sa pipila.​—Mat 8:16; 9:35; 12:15.

Ang pagkayano makita sa milagrosong mga pagpang-ayo ug pagkontrolar sa mga elemento. (Mar 4:39; 5:25-29; 10:46-52) Sukwahi sa mahikong mga abilidad nga gibuhat nga may linaing mga kasangkapan, plataporma, suga, ug rituwal, ang mga milagro sa Bibliya sagad gibuhat nga walay publikong pasundayag, nga subsob ingong sanong sa wala damhang panagkita, usa ka hangyo, ug nga anaa sa publikong dalan o sa wala andama nga dapit.​—1Ha 13:3-6; Luc 7:11-15; Buh 28:3-6.

Ang motibo sa tawong mihimog milagro maoy dili alang sa hinakog nga pagkainila sa maong tawo o sa paghimo kaniyang adunahan, kondili sa panguna maoy alang sa paghimaya sa Diyos. (Ju 11:1-4, 15, 40) Ang mga milagro maoy dili misteryosong mga buhat nga gihimo aron sa pagtagbaw lamang sa pagkamausisaon ug sa pagpahingangha. Kini nakatabang kanunay sa uban, usahay sa  pisikal nga paagi ug sa kanunay sa espirituwal nga paagi, nga nagpaliso sa mga tawo ngadto sa matuod nga pagsimba. Ingon nga “ang pagpamatuod bahin kang Jesus maoy nagdasig sa pagpanagna [“mao ang espiritu sa tagna,” ftn sa Rbi8],” mao man usab daghan sa mga milagro ang nagpunting kang Jesus ingong ang pinadala sa Diyos.​—Pin 19:10.

Ang mga milagro sa Bibliya naglangkit dili lamang sa buhing mga butang kondili sa dili-buhing mga butang usab, sama sa pagpakalma sa hangin ug dagat (Mat 8:24-27), sa pagpahunong ug sa pagpasugod sa ulan (1Ha 17:1-7; 18:41-45), ug sa paghimo sa tubig nga dugo o bino (Ex 7:19-21; Ju 2:1-11). Naglakip usab kini sa tanang matang sa pisikal nga mga pagpang-ayo, sama sa “walay pagkaayo” nga sanla (2Ha 5:1-14; Luc 17:11-19) ug ang pagkabuta sukad sa pagkahimugso. (Ju 9:1-7) Kining panagkadaiya sa mga milagro nagpakita sa pagkatinuod niini ingong gipaluyohan sa Maglalalang, kay makataronganon nga ang Maglalalang lamang ang makaimpluwensiya sa tanang natad sa tawhanong kasinatian ug ibabaw sa tanang matang sa butang.

Katuyoan Alang sa Unang Kristohanong Kongregasyon. Ang mga milagro nag-alagad sa daghang hinungdanong mga katuyoan. Labing hinungdanon, kini nakatabang sa pagpamatuod nga ang usa ka tawo nakadawat sa gahom ug pagpaluyo sa Diyos. (Ex 4:1-9) Nakab-ot sa katawhan kining hustong konklusyon labot kang Moises ug kang Jesus. (Ex 4:​30, 31; Ju 9:​17, 31-33) Pinaagi kang Moises, gisaad sa Diyos ang usa ka umaabot nga manalagna. Ang mga milagro ni Jesus nakatabang sa mga nakakita sa pag-ila kaniya ingong mao ang gisaad nga manalagna. (Deu 18:18; Ju 6:14) Sa dihang bag-o pa ang Kristiyanidad, ang mga milagro nagalihok kauban sa mensahe sa pagtabang sa mga indibiduwal nga makasabot nga gipaluyohan sa Diyos ang Kristiyanidad ug gisalikway ang unang Hudiyohanong sistema sa mga butang. (Heb 2:​3, 4) Sa ngadtongadto ang milagrosong mga gasa nga nahitabo sa unang siglo nahanaw ra. Gikinahanglan lamang kini sa dihang bata pa ang Kristohanong kongregasyon.​—1Co 13:8-11.

Sa pagbasa sa kasaysayan sa Mga Buhat sa mga Apostoles, atong makita nga ang espiritu ni Jehova milihok nga kusganon, matulin, mitukod ug mga kongregasyon, nga mipalig-on pag-ayo sa Kristiyanidad. (Buh 4:4; kap 13, 14, 16-19) Sulod sa mubong mga katuigan tali sa 33 ug 70 K.P., linibo ka magtutuo ang gitigom diha sa daghang kongregasyon gikan sa Babilonya ngadto sa Roma, ug lagmit sa mas halayo pang kasadpan. (1Pe 5:13; Rom 1:​1, 7; 15:24) Angayng hinumdoman nga diyutay lamang ang mga kopya sa Kasulatan niadtong panahona. Sagad ang mga adunahan lamang ang nakabaton sa mga linukot nga basahon o mga libro sa nagkalainlaing matang. Sa paganong kayutaan walay kahibalo bahin sa Bibliya o sa Diyos sa Bibliya, si Jehova. Halos ang tanan kinahanglang ipaabot nga binaba. Walay mga komentaryo, mga konkordansiya, ug mga ensiklopedia sa Bibliya nga daling mabatonan. Busa ang milagrosong mga gasa sa linaing kahibalo, kaalam, pagsultig lainlaing mga pinulongan, ug katakos sa pag-ila sa inspiradong mga pulong hinungdanon alang sa kongregasyon niadtong panahona. (1Co 12:4-11, 27-31) Apan, ingon sa gisulat ni apostol Pablo, sa dihang kining mga butanga wala na kinahanglana, kini mahanaw ra.

Usa ka Lahi nga Kahimtang Karong Adlawa. Dili nato makita nga gihimo sa Diyos ang maong mga milagro pinaagi sa mga kamot sa iyang Kristohanong mga alagad karong adlawa, tungod kay ang tanang gikinahanglang mga butang anaa na ug mabatonan na sa makamaong mobasa ug mosulat nga katawhan sa kalibotan, ug aron sa pagtabang niadtong dili makamaong mobasa apan buot mamati, adunay hamtong nga mga Kristohanon nga nakabaton ug kahibalo ug kaalam pinaagi sa pagtuon ug sa kasinatian. Dili na kinahanglan alang sa Diyos nga himoon pa ang maong mga milagro niining panahona aron pamatud-an si Jesu-Kristo ingong tinudlo sa Diyos nga manluluwas, o aron sa pagtaganag pamatuod nga Siya nagpaluyo sa Iyang mga alagad. Bisan pag padayong hatagan sa Diyos ang iyang mga alagad sa katakos sa paghimog mga milagro, kini dili makapakombinsir sa tanan, kay wala gani mapalihok sa pagdawat sa iyang mga pagtulon-an ang tanang saksing-nakakita sa mga milagro ni Jesus. (Ju 12:9-11) Sa laing bahin, ang mga tigyagayaga gipasidan-an sa Bibliya nga aduna pay umaabot nga talagsaong mga buhat sa Diyos nga himoon sa panahon sa paglaglag sa presenteng sistema sa mga butang.​—2Pe 3:1-10; Pin kap 18, 19.

Ingong konklusyon, ikaingon nga kadtong mosalikway sa paglungtad sa mga milagro wala motuo nga adunay usa ka dili-makitang Diyos ug Maglalalang o kaha sila nagtuo nga siya wala mogamit sa iyang gahom diha sa bisan unsang labaw-tawhanong paagi sukad sa paglalang. Apan ang ilang kawalay-pagtuo dili magpawalay-pulos sa Pulong sa Diyos. (Rom 3:​3, 4) Ang mga asoy sa Bibliya bahin sa mga milagro sa Diyos ug sa maayong katuyoan nga napalampos niini, nga kanunayng nahiuyon sa mga kamatuoran ug mga prinsipyo nga makaplagan sa iyang Pulong, nagpasilsil ug pagsalig sa Diyos. Kini naghatag ug kusganong pasalig nga ang Diyos nahingawa sa katawhan ug nga siya makahimo sa pagpanalipod ug buot gayong manalipod niadtong moalagad kaniya. Ang mga milagro  nagtaganag tipikal nga mga sumbanan, ug ang pagrekord niini nagpalig-on sa pagtuo nga ang Diyos, sa umaabot nga panahon, mangilabot sa milagrosong paagi, nga magaayo ug magapanalangin sa matinumanong katawhan.​—Pin 21:4.