Usa ka yunit sa timbang ug sa bili sa salapi. (1Ha 10:17; Esd 2:69; Neh 7:71) Sumala sa Hebreohanong teksto sa Ezequiel 45:​12, ang usa ka mina (maneh) katumbas sa 60 ka siklo. Apan, sumala sa hubad sa Gregong Septuagint niini nga teksto ang bili sa usa ka mina maoy 50 ka siklo. (Tan-awa ang RS, Mo.) Sanglit ang dakong gidaghanon sa siklo nga gihisgotan sa Bibliya mahimong bahinon sa tag-50, kini nagpakitang sa unang kapanahonan ang usa ka mina maoy 50 ka siklo.​—Gen 23:15; Ex 30:24; 38:29; Num 31:52; 1Sa 17:5.

Adunay arkeolohikanhong ebidensiya nga ang usa ka mina maoy 50 ka siklo. Ang usa ka bato sa timbangan nga wala sulati ug tinong gibug-aton nga motimbang ug mga 4,565 g nga nakaplagan didto sa Tell Beit Mirsim, kon bahinon sa walo ka mina nga tag-50 ka siklo magpakita nga ang usa ka siklo maoy 11.4 gramos. Kini nga bili popareho ra sa aberids nga bili sa mga 45 ka bato sa timbangan alang sa siklo nga gisulatan ug tinong gibug-aton nga nakaplagan didto sa Palestina. Busa, niini nga publikasyon ang mina sa Hebreohanong Kasulatan gibanabana nga 50 ka siklo o ¹⁄60 ka talanton, sa ato pa, 570 g. Nan, sa kantidad karong adlawa, ang plata nga mina maoy katumbas sa $110.10 ug ang bulawan nga mina maoy $6,422.50.

May posibilidad usab nga, sama sa maniko, adunay duha ka kantidad nga katumbas sa mina, ang usa lagmit alang sa harianong mina (itandi ang 2Sa 14:26) ug ang usa alang sa komon nga mina.​—Itandi ang Eze 40:5.

Ang mina (mna) sa Kristohanon Gregong Kasulatan (Luc 19:13-25) giisip nga nagkantidad ug 100 ka drakma, sanglit kini ang kantidad nga gipasukad sa karaang Grego nga mga magsusulat. Ang kantidad sa drakma halos katumbas sa usa ka denario. Busa dakog kantidad ang mina. Ang presenteng-adlaw nga kantidad maoy $65.40; sa unang siglo K.P., kini mokabat ug halos un-kuwarto sa tinuig nga suhol sa usa ka mamumuo sa uma.