[gikan sa lintunganayng pulong nga nagkahulogang “magmahigalaon”].

1. Usa ka apong lalaki ni Benjamin pinaagi sa iyang panganayng si Bela. (1Cr 8:1-4, 7) Sanglit nakatukod ug usa ka banay, ang mga Naamanhon sa tribo ni Benjamin (Num 26:40), si Naaman gitala sa ubang teksto ingong usa sa “mga anak nga lalaki” ni Benjamin.​—Gen 46:21.

2. Usa ka Siryanhong pangulo sa kasundalohan sa ikanapulong siglo W.K.P., sa panahon nga naghari si Jehoram sa Israel ug Ben-hadad II sa Sirya. Si Naaman, nga ‘usa ka bantogan, maisog, tinamod nga tawong gamhanan,’ mao ang gigamit ‘ni Jehova sa paghatag ug kaluwasan sa Sirya.’ (2Ha 5:1) Wala maghatag ang Bibliya ug impormasyon kon sa unsang paagi o kon nganong gigamit si Naaman sa paghatag niini nga kaluwasan sa Sirya. Ang usa ka posibilidad mao nga gipangulohan ni Naaman ang Siryanhong kasundalohan nga malamposong nakapakgang sa mga paningkamot sa Asiryanhon nga si Haring Salmaneser III sa pag-ilog sa Sirya. Sanglit, pinaagi sa pagpabiling gawasnon, ang Sirya nahimong usa ka neyutral nga estado tali sa Israel ug Asirya, lagmit kini nakapalangan sa agresibong pag-asdang sa mga Asiryanhon sa K  hangtod sa tinudlong panahon ni Jehova nga tugotang madestiyero ang amihanang gingharian.

Naayo sa Sanla. Si Naaman maoy usa ka sanlahon, ug bisan tuod nga wala ibaod sa mga Siryanhon nga siya ikuwarentinas sama sa gisugo sa balaod ni Jehova bahin sa mga sanlahon sa Israel, usa gayod ka makapalipayng balita nga masayod kon sa unsang paagi siya mamaayo gikan niining makaluod nga sakit. Ang maong balita midangat kaniya pinaagi sa Israelinhon nga batang babaye nga ulipon sa iyang asawa kinsa misulti bahin sa usa ka manalagna sa Samaria nga makaayo ug sanla. Dihadiha si Naaman migikan paingon sa Samaria nga dala ang usa ka sulat sa pagpailaila gikan kang Ben-hadad II. Apan, ang Israelinhon nga si Haring Jehoram, human siya dawata uban ang kataphaw ug katahap, nagpadala kaniya ngadto kang Eliseo. Si Eliseo wala mismo makigkita kang Naaman apan nagsugo sa iyang alagad nga sultihan si Naaman nga pakaligoon sa makapito sa Suba sa Jordan. Natandog ang iyang garbo, ug dayag nga mibating siya giyanoyano lang ug walay-kapuslanang gipaadto sa lainlaing mga dapit, si Naaman mapungtanong mibiya. Kon wala pa mangatarongan ug ipatin-aw kaniya sa iyang mga tig-alagad ang pagkamakataronganon sa maong mga instruksiyon, mipauli na unta si Naaman sa iyang yuta nga usa pa gihapon ka sanlahon. Ingong resulta, siya naligo sa makapito sa Jordan ug nahinlo sa milagrosong paagi, ang bugtong sanlahon nga naayo ni Eliseo.​—2Ha 5:1-14; Luc 4:27.

Nahimong Magsisimba ni Jehova. Tugob karon sa pagpasalamat ug sa mapainubsanong pagpabili, ang Siryanhong pangulo sa kasundalohan mibalik kang Eliseo, tingali sa gilay-ong 50 km (30 mi), ug mitanyag kaniya ug daghan kaayong gasa, nga gibalibaran pag-ayo sa manalagna. Unya si Naaman nangayog yuta sa Israel, ang “luwan sa usa ka paris nga mula,” aron dad-on sa ilaha, aron nga sa ibabaw niini nga yuta gikan sa Israel siya makatanyag ug mga halad ngadto kang Jehova, ug nanumpa nga sukad niadto dili na siya mosimba pa ug laing diyos. Lagmit diha sa hunahuna ni Naaman ang pagtanyag ug mga halad kang Jehova sa ibabaw sa usa ka halaran nga yuta.​—2Ha 5:15-17; itandi ang Ex 20:​24, 25.

Unya mihangyo si Naaman nga pasayloon siya ni Jehova sa dihang, sa pagbuhat sa iyang sibil nga mga katungdanan, siya moyukbo sa atubangan sa diyos nga si Rimon uban sa hari, kinsa dayag nga tigulang na ug masakiton ug nagpaagak kang Naaman. Kon mao kana ang kahimtang, nan ang iyang pagyukbo dili kinabubut-on, gituman lamang niya ang iyang katungdanan sa pag-agak sa lawas sa hari ug dili alang sa personal nga pagsimba. Mituo si Eliseo sa tim-os nga hangyo ni Naaman, nga mitubag, “Lakaw nga malinawon.”​—2Ha 5:​18, 19.

Human makabiya, giagpas si Naaman sa hakog nga alagad ni Eliseo nga si Gehazi, kinsa namakak nga kunohay nausab ang hunahuna ni Eliseo ug sa kapulihay modawat ra sa pipila ka gasa. Si Naaman malipayong naghatag kaniya ug mga gasa nga plata ug mga besti. Apan tungod sa iyang kadalo ug pagpamakak aron makapahimulos gikan sa butang nga nalampos sa espiritu ni Jehova pinaagi sa pag-abuso sa iyang katungdanan ingong tig-alagad ni Eliseo, gisilotan siya ni Jehova pinaagi sa pagpahamtang kaniyag sanla ug ingon man sa iyang mga kaliwat hangtod sa panahong walay tino.​—2Ha 5:20-27.