USA ka gatos ug kawhaan ka tuig lamang human si Saul nahimong unang hari sa Israel, ang nasod nasip-ak sa duha. Ngano? Tungod sa pag-apostata ni Haring Solomon. Sa tinguhang mapahimut-an ang iyang langyawng mga asawa, gitugotan ni Solomon nga makasulod sa nasod ang grabeng idolatriya, nga nagtukod ug ‘hatag-as nga mga dapit’ alang sa bakak nga mga diyos. Kini nga panagtapo sa pagtuo gikasilagan ni Jehova. Apan, kay maunongon sa iyang pakigsaad kang David, wala pamub-a sa Diyos ang Davidnong dinastiya. Hinunoa, iyang gimando nga langkaton ang usa ka bahin sa nasod.​—1Ha 11:7-13.

Kini nahitabo niadtong 997 W.K.P. sa dihang ang mga gibuhat sa gahig-ulo nga anak ni Solomon nga si Rehoboam nakaaghat sa napulo ka tribo sa pagrebelde ug sa pagporma ug usa ka gingharian nga sa kinadak-an naglakip sa amihanang bahin sa yuta ug usab sa sakop nga mga siyudad sa mga Simeonhon nga nahimutang sa lainlaing dapit sa tibuok Juda. Ang mga tribo lamang ni Benjamin ug Levi ang nagpabiling maunongon sa habagatang gingharian sa Juda.

Si Jeroboam, ang unang hari sa amihanang gingharian, nahadlok nga mawala kaniya ang pag-unong sa iyang katawhan kon sila magpadayon sa pagsimba didto sa Jerusalem, busa siya nagtukod ug kaugalingong relihiyon. Nagbutang siya ug bulawang mga nating baka didto sa Dan sa halayong amihanan ug sa Bethel nga 17 km (11 mi) lamang sa amihanan sa Jerusalem. Siya nagtudlo usab ug kaugalingong mga saserdote ug naghimog iyang kaugalingong ‘balaan nga mga adlaw.’​—1Ha 12:26-33.

Busa ang Israel nahimong usa ka yuta nga nabahin sa politikanhon ug relihiyoso nga paagi, usa ka yuta nga nameligro sa pagsulong sa ubang nasod ug gigusbat sa sibil nga gubat. Kay nahimulag gikan sa putling pagsimba kang Jehova, ang napulo-ka-tribo nga gingharian nahitumpawak sa moral ug espirituwal nga pagkadunot. Apan, si Jehova nagpadayon sa pagpadala sa iyang mga manalagna aron sa pag-awhag kanila sa paghinulsol.