[Andam; Hamili; Mahinatagon].

1. Ang panganay nga anak nga lalaki ni Aaron ug Eliseba. (Ex 6:23; 1Cr 6:3) Si Nadab natawo sa Ehipto ug miuban sa dakong Pagpanggula sa Israel gikan sa Ehipto. Siya ug ang iyang sunod nga manghod nga lalaki nga si Abihu ug ang 70 ka uban pang mga Israelinhon gipatawag uban ni Aaron ug Moises ngadto sa Sinai, diin sila nakakita ug usa ka panan-awon ni Jehova. (Ex 24:​1, 9-11) Si Nadab ug ang iyang tulo ka igsoong lalaki gipahiluna sa katungdanan sa pagkasaserdote uban sa ilang amahan. (Ex 28:1; 40:12-16) Dayag nga sa wala pa matapos ang usa ka adlaw, si Nadab ug Abihu miabuso sa ilang katungdanan pinaagi sa paghalad ug ginadili nga kalayo. Wala iasoy kon nganong gidili kining maong kalayo, apan lagmit nga labaw pa kini sa pagkahubog (nga gipakita sa dihadihang pagdili sa mga saserdote sa pag-inom ug bino o makahubog nga ilimnon sa dihang mag-atiman sa ilang buluhaton). Hinunoa, ang pagkahubog lagmit nga nakaamot sa ilang buhat nga daotan. Tungod sa ilang kalapasan, gipatay sila pinaagi sa kalayo gikan kang Jehova ug ang ilang lawas gidala sa gawas sa kampo. (Lev 10:1-11; Num 26:​60, 61) Si Nadab ug Abihu namatay nga walay mga anak, nga nagbilin sa ilang mga igsoong lalaki nga si Eleasar ug Itamar nga maoy magpundar sa duha ka saserdotehanong banay.​—Num 3:​2, 4; 1Cr 24:​1, 2.

2. Usa ka kaliwat ni Juda sa linya ni Jerameel; anak nga lalaki ni Samai ug amahan ni Seled ug Apaim.​—1Cr 2:​3, 25, 26, 28, 30.

3. Anak nga lalaki ni Jeiel sa tribo ni Benjamin.​—1Cr 8:​1, 29, 30; 9:​35, 36.

4. Anak nga lalaki ni Jeroboam ug ikaduha nga hari sa amihanang napulo-ka-tribo nga gingharian sa Israel. Si Nadab nagmando sa mga duha ka tuig, nagsugod sa mga 976 W.K.P., nga sulod nianang panahona iyang gipadayon ang pagsimba sa nating baka nga gisugdan sa iyang amahan. Samtang gilikosan ang Gibeton, usa ka Levihanong siyudad kanhi (Jos 21:​20, 23) nga nailog sa mga Filistehanon, si Nadab gipatay ni Baasa, kinsa nagpatay usab sa tanang nahibilin nga membro sa balay ni Jeroboam aron mahuptan niya ang trono.​—1Ha 14:20; 15:25-31.