Usa ka pundok sa mga langyaw (mga estranyo) nga mibiya sa Ehipto uban sa nasod sa Israel. (Ex 12:​37, 38, ftn sa Rbi8; itandi ang Ex 12:43-49.) Ang pipila niini nga mga tawo lagmit mga Ehiptohanon o ubang mga langyaw nga mipili sa pagsunod sa matuod nga Diyos ug sa nasod sa Israel human makasaksi sa ubay-ubayng mga hampak ni Jehova batok sa Ehipto. Ang uban niini nga pundok lagmit mga Ehiptohanon nga nangaminyo sa mga Israelinhon maingon man sa mga anak sa maong panagtiayon. Pananglitan, ang babayeng Israelinhon nga si Selomit sa tribo ni Dan adunay Ehiptohanong bana ug may usa lamang ka anak nga lalaki pinaagi kaniya.​—Lev 24:​10, 11.

Kini nga ekspresyon makita usab sa Numeros 11:4, nga nagkahulogan usab nga usa ka “hugpong [sa katawhan]” o “masa sa katawhan.” Walay duhaduha nga ang ilang dili-Israelinhon nga kagikan ug ang grabeng kalisdanan sa pagpanaw sa kamingawan maoy nakaingon sa ilang pagkareklamador nga nahimong usa ka hinungdan sa panagbangi. Ang ilang gipamulong nga nagpabanaag sa ilang hakog nga pangandoy mikaylap sa mga Israelinhon, mao nga sila usab nanghilak ug miingon: “Nahinumdom gayod kami sa mga isda nga among gikaon sa Ehipto nga walay bayad, sa mga pepino ug sa mga sandiya ug sa mga puerro ug sa mga sibuyas ug sa mga ahos! Apan karon ang among kalag nag-uga. Wala nay laing nakita sa among mga mata kondili ang mana.”​—Num 11:4-6.

Ang ekspresyong “nagkasagol nga panon” diha sa Nehemias 13:3 ug Jeremias 25:20 nagtumong sa mga dili-Israelinhon. Ang gihisgotan sa Nehemias maoy mga langyaw sama sa mga Moabihanon ug mga Ammonhanon. (Neh 13:1) Ang mga anak niini nga mga langyaw (mestisong Israelinhon) lagmit nahilakip usab tungod kay una pa niana ang mga Israelinhon nagpapahawa sa ilang langyaw nga mga asawa ug mga anak.​—Esd 10:44.