Ang naipon nga sinawon, puting yelo nga daw pormag dagom nga direktang nanibuok tungod sa bugnaw kaayong temperatura. Kining mga kristal nga yelo maoy tag-as ug pormag dagom; sagad nga motuybo diha sa mga butang nga gitaptan niini ug ang kadaghanan maglaray sa kiliran niini. Ang umog diha sa atmospera mobagtok nga dili moagi sa pagkalikido, manibuok diha sa mga kahoy, tanom, ug ubang mga butang, sagad sa magabii. Kini sagad nga makaplagan diha sa mga bentana.

Gihisgotan ni Jehova ngadto kang Job ang bahin sa “nanibuok nga tun-og sa langit,” sa walay duhaduha tungod kay napatungha kini nga nanibuok diha sa atmospera. (Job 38:29) Bahin kang Jehova, ang salmista miingon: “Siya nagsaliyab sa nanibuok nga tun-og sama gayod sa abo.” (Sal 147:16) Sayon ra kaayong gipatungha ni Jehova ang nanibuok nga tun-og sama sa pagsaliyab sa tawo sa abo nga anaa sa iyang kamot. Kini motabon o motaklap sa mga butang sama sa mga kahoy, balili, ug mga balay, daw samag abog nga gisaliyab sa dili-makitang kamot ni Jehova ibabaw niining mga butanga.

Ang mana nga gitagana ni Jehova alang sa mga Israelinhon panahon sa ilang 40 ka tuig nga paglatagaw sa kamingawan gihubit diha sa Exodo 16:14 niining paagiha: “Ang yamog nga mitabon nahanaw ug sa ibabaw sa nawong sa kamingawan dihay nipis ug sihagon nga butang, nipis sama sa nanibuok nga tun-og diha sa yuta.”