[[Ang Diyos] Naghatag].

1. Usa ka kaliwat ni Juda. Ang anak nga lalaki ni Atai ug amahan ni Zabad. Ang apohan ni Natan maoy usa ka Ehiptohanong alagad nga ginganlag Jarha.​—1Cr 2:​3, 34-36.

2. Usa ka manalagna ni Jehova panahon sa paghari ni David; lagmit sa tribo ni Levi. Sa dihang gibutyag sa hari kang Natan ang iyang tinguha sa pagtukod ug usa ka templo alang sa pagsimba kang Jehova, ang manalagna mitubag: “Ang tanan nga anaa sa imong kasingkasing​—lakaw, buhata.” (2Sa 7:1-3; 1Cr 17:​1, 2) Apan nianang gabhiona gipahibalo ni Jehova si Natan nga inay nga si David ang magtukod ug usa ka templo, si Jehova magtukod alang kang David ug usa ka malungtarong balay, ug nga sa ulahi ang kaliwat ni David mao ang magtukod sa balay ni Jehova. Busa pinaagi kang Natan gipahibalo ni Jehova kang David ang usa ka pakigsaad alang sa usa ka gingharian “hangtod sa panahong walay tino” diha sa linya ni David.​—2Sa 7:4-17; 1Cr 17:3-15.

Sa ulahi gisugo ni Jehova si Natan aron ipaamgo ang gibug-aton sa sala nga nahimo ni David batok kang Urias nga Hitihanon maylabot kang Bat-seba ug isulti kaniya ang silot sa Diyos nga ipahamtang tungod niini. Gihimo niya kini sa mataktikanhon apan sa puwersado nga paagi, nga migamit ug ilustrasyon. Busa si David natukmod sa pagpahayag, nga walay kasayoran ug walay pagpihigpihig, sa iyang kaugalingong paghukom bahin sa maong buhat. Dayon gibutyag ni Natan kaniya: “Ikaw mismo ang maong tawo!” ug gipahayag ang paghukom ni Jehova kang David ug sa iyang balay.​—2Sa 12:1-18; tan-awa usab ang Sal 51:Sup.

Sa ulahi ang ikaduhang anak nga lalaki nga ginganlag Solomon natawo kang David pinaagi kang Bat-seba. Kini nga anak gihigugma ni Jehova; busa gipadala niya ang iyang manalagnang si Natan, kinsa, “tungod kang Jehova,” nagngalan sa batang lalaki nga Jedidias, nga nagkahulogang “Hinigugma ni Jah.” (2Sa 12:​24, 25) Sa naghinapos na ang mga adlaw sa kinabuhi ni David, sa dihang si Adonias misulay sa pag-ilog sa trono, si Natan mihimog nahiangayng mga lakang aron ipahibalo kini kang David. Unya lakip si Natan sa pagdihog ug sa pagpalingkod kang Solomon ingong hari.​—1Ha 1:5-40.

Mopatim-aw nga si Natan, duyog kang Gad, nagtambag kang David bahin sa nahiangayng kahikayan sa mga tulonggon maylabot sa sangtuwaryo. (2Cr 29:25) Dayag nga si Natan ug Gad ang gisugo sa pagrekord sa impormasyon nga nahisulat sa paniklop nga mga kapitulo sa Unang Samuel ug sa tibuok Ikaduhang Samuel. (1Cr 29:29) “Lakip sa mga pulong ni Natan nga manalagna” girekord usab ang “mga kalihokan ni Solomon.”​—2Cr 9:29.

Kini nga Natan lagmit mao ang amahan ni Azarias ug Zabud, nga parehong naghupot ug hinungdanong mga katungdanan panahon sa paghari ni Solomon. Si Azarias mao ang pangulo sa mga luyoluyo sa hari, samtang si Zabud nag-alagad ingong usa ka saserdote ug suod nga higala ug magtatambag sa hari.​—1Ha 4:​1, 5.

3. Ang amahan ni Igal ug igsoon ni Joel, duha sa gamhanang mga manggugubat ni David.​—2Sa 23:​8, 36; 1Cr 11:​26, 38.

4. Usa ka anak nga lalaki ni David pinaagi sa iyang asawa nga si Bat-seba, nga natawo kaniya didto sa Jerusalem. (2Sa 5:​13, 14; 1Cr 3:5) Ang kinaiyanhong linya sa kagikan sa Mesiyas masubay gikan kang David pinaagi kang Natan ug sa iyang mga kaliwat hangtod kang Jesus, dayag nga pinaagi sa inahan ni Jesus nga si Maria. (Luc 3:​23, 31) Mahitungod sa panahon sa dihang ‘sila molantaw sa Usa nga ilang gidughang,’ ang tagna ni Zacarias  nag-ingon nga aduna unyay hilabihang pagminatay ug pagbalata sa tibuok yuta, sa tanang kabanayan, ug ilabina sa mga banay ni David, Levi, sa mga Simeihanon, ug sa “banay sa balay ni Natan.” (Zac 12:10-14) Kon ang banay sa balay ni Natan nga gihisgotan dinhi naggikan sa anak ni David, kini magpasabot nga kini nga banay maoy usa sa mga banay ni David. Busa ang pagminatay makaapektar sa mga banay sulod sa mga banay.

5. Usa sa siyam ka pangulo sa mga destiyero nga nagkampo sa suba sa Ahava, kinsa gisugo ni Esdras sa paglista sa mga alagad nga mag-alagad sa balay sa Diyos didto sa Jerusalem.​—Esd 8:15-17.

6. Usa ka kanhing destiyero sa Babilonya, ug usa sa 13 ka anak nga lalaki ni Binui nga nagsalikway sa ilang langyawng mga asawa agig pagtuman sa mga instruksiyon ni Esdras.​—Esd 10:​10, 11, 38-42, 44.