[gikan sa Heb., nga nagkahulogang “Ang Diyos Naghatag”].

Lagmit mao ang ngalan ni Bartolome, busa usa sa 12 ka apostoles ni Jesus. Ang Bartolome, nga nagkahulogang “Anak nga Lalaki ni Tolmai,” maoy usa ka termino nga patronymic (buot ingnon, usa ka ngalan nga gipasukad sa ngalan sa iyang amahan). Si apostol Juan naggamit sa iyang ngalang Natanael, samtang si Mateo, Marcos, ug Lucas nagtawag kaniya nga Bartolome. Sa dihang naggamit nianang ngalana, gilangkit nila si Felipe kang Bartolome, sa samang paagi nga gilangkit ni Juan si Felipe kang Natanael. (Mat 10:3; Mar 3:18; Luc 6:14; Ju 1:​45, 46) Ang mga tawo kaniadto sagad adunay kapin sa usa ka ngalan. Pananglitan, “si Simon nga anak ni Juan” nailhan usab ingong Cefas ug Pedro. (Ju 1:42) Busa dili gayod ikatingala kon si Natanael tawgong Bartolome, o ang “Anak nga lalaki ni Tolmai,” sama sa laing tawo nga gitawag lamang ug Bartimeo, o “Anak nga lalaki ni Timeo.” (Mar 10:46) Ang duha ka ngalan, Natanael ug Bartolome, gigamit nga baylobaylo sa Kristohanong mga magsusulat sa misunod nga mga siglo.

Si Natanael maoy taga-Cana sa Galilea. (Ju 21:2) Siya nahimong sumusunod ni Jesus sa sayong bahin sa ministeryo sa iyang Agalon. Si Felipe, human mosanong sa pagdapit ni Jesus nga “Mahimong akong sumusunod,” dihadiha nangita sa iyang higala nga si Natanael ug nagdapit kaniya sa ‘pag-adto ug pagtan-aw’ sa Mesiyas. Si Natanael nangutana, “Aduna bay maayo nga gikan sa Nasaret?” apan bisan pa niana siya misanong sa pagdapit. Si Jesus, sa pagkakita kaniya nga nagkaduol, miingon: “Tan-awa, tino nga usa ka Israelinhon, nga kaniya walay limbong.” Alang kang Jesus, si Natanael maoy usa gayod ka talagsaon nga tawo mao nga siya nakapahayag nianang mga pulonga. Tungod kay gisulti kini ni Jesus ug miingon nga siya nakakita kang Natanael ilalom sa usa ka kahoyng igos sa wala pa siya tawga ni Felipe, si Natanael nakaingon nga si Jesus mao gayod “ang Anak sa Diyos, . . . nga Hari sa Israel.” Si Jesus nagpasalig kaniya nga siya ‘makakita ug mga butang nga labaw pa niini.’​—Ju 1:43-51.

Ingong usa sa 12, si Natanael kauban kanunay sa tibuok ministeryo ni Jesus, nga gibansay alang sa umaabot nga pag-alagad. (Mat 11:1; 19:25-28; 20:17-19, 24-28; Mar 4:10; 11:11; Ju 6:48-67) Human sa kamatayon ug pagkabanhaw ni Jesus, si Natanael ug ang uban sa mga apostoles namalik sa ilang pagpangisda, ug samtang sila nagkaduol sa baybayon sakay sa ilang sakayan usa ka buntag niana nga si Jesus nagtawag kanila. Si Natanael, dili sama kang Pedro, nagpabilin sa sakayan hangtod nga kini nakadunggo sa baybayon, ug dayon, nga miduyog sa uban sa pagpamahaw, siya nakapamati sa makahuloganong panagsultihanay ni Jesus ug Pedro. (Ju 21:1-23) Siya duyog usab sa ubang mga apostoles sa dihang sila nagtigom alang sa pag-ampo ug didto pod siya sa adlaw sa Pentekostes.​—Buh 1:​13, 14; 2:42.