Usa ka Babilonyanhong bathala nga ilabinang gisimba didto sa Cuta, usa ka siyudad nga sumala sa kasaysayan gipahinungod kang Nergal. Ang katawhan sa Cut (Cuta), nga gipapuyo sa hari sa Asirya sa teritoryo sa Samaria, nagpadayon sa pagsimba niini nga bathala. (2Ha 17:​24, 30, 33) Ang pipila ka eskolar nagtuo nga si Nergal sa sinugdan gilangkit sa kalayo ug sa kainit sa adlaw ug nga sa ulahi siya giisip nga usa ka diyos sa gubat ug sa pagpangayam ingon man usa ka tigdalag kamatay. Ang mga ngalan nga gigamit alang kang Nergal diha sa relihiyosong mga sinulat nagpakita nga siya pangunang giisip ingong usa ka tiglaglag. Siya gitawag nga “ang mangtas nga hari,” “ang mapintas,” ug “ang tigsunog.” Si Nergal giisip usab ingong diyos sa kalibotan sa mga patay ug ang bana ni Eresh-Kigal. Ang pak-an nga leyon nga may ulo sa tawo giisip nga mao ang simbolo ni Nergal.

Si Nergal-sarezer nga Rabmag, usa sa mga prinsipe ni Haring Nabucodonosor, dayag nga ginganlan sumala sa ngalan niini nga diyos.​—Jer 39:​3, 13.