[Siyudad sa Pagpangdaog].

Usa ka siyudad diin si apostol Pablo nakahukom nga magpalabay sa tingtugnaw sa panahon sa usa sa iyang mga panaw ug nga ngadto niini iyang giawhag si Tito nga moadto. (Tit 3:12) Ang nota sa kataposan sa sulat ni Pablo ngadto kang Tito diha sa King James Version, nga nagpakitang kini gisulat “didto sa Nicopolis sa Macedonia,” dili makaplagan sa labing karaan nga mga manuskrito. Dayag nga si Pablo wala magsulat sa iyang sulat didto sa Nicopolis, sanglit ang Tito 3:12 nagpakita nga siya wala pa didto apan naglaraw pa lang nga magpalabay sa tingtugnaw didto.

Sa lainlaing karaang mga siyudad nga ginganlag Nicopolis, ang Nicopolis sa Epirus nga nahimutang sa usa ka peninsula sa AK sa Gresya ug mga 10 km (6 mi) sa A sa Preveza, daw mohaom kaayo sa gihisgotan sa Bibliya. Kay usa ka prominenteng siyudad, kini maoy usa ka maayong dapit alang sa pagwali ni Pablo sa maayong balita, ug kini nahimutang  nga daling maadto ni Pablo (nga lagmit niadtong higayona didto sa Macedonia) ug ni Tito (nga didto sa Creta). Lagmit nga didto sa Nicopolis giaresto si Pablo ug unya gidala ngadto sa Roma aron ibilanggo sa kataposang higayon ug patyon.

Gitukod ni Octavian (Agusto) ang Nicopolis aron sa paghandom sa iyang kadaogan sa gubat diha sa kadagatan (niadtong 31 W.K.P.) batok kang Antony ug Cleopatra didto sa kanait nga Actium. Ang Actianhong mga Dula nga iyang gimugna ingong pasidungog sa diyos nga si Apolo naghandom usab niini nga hitabo. Ang siyudad mismo nag-okupar sa dapit sa Romanhong kampo, ug sa dapit diin nahimutang kanhi ang iyang tolda, si Octavian nagtukod ug templo alang sa diyos nga si Neptune. Ang kadaghanan sa mga edipisyong pangpubliko sa siyudad, sumala sa historyador nga si Josephus, gitukod tungod sa interes ug sa pinansiyal nga tabang ni Herodes nga Bantogan.​—Jewish Antiquities, XVI, 147 (v, 3).