[[Ang Diyos] Naghatag ug Kahupayan].

1. Amahan ni manalagnang Azarias. (2Cr 15:1) Ang 2 Cronicas 15:8 naghubit kang Oded ingong usa ka manalagna: “Sa pagkadungog gayod ni Asa niining mga pulonga ug sa panagna ni Oded nga manalagna.” Kay ang pipila ka eskolar nagtuo nga nasayop ang magkokopya, ilang gitangtang ang mga pulong nga “ni Oded nga manalagna.” Apan ang pagtangtang niini dili makapatin-aw kon nganong ang magsusulat nag-ingon nga si Asa nakadungog “niining mga pulonga ug sa panagna.”  Gidugangan kini sa uban aron mabasa nga, “Si Asa nakadungog niining mga pulonga ug sa panagna ni Azarias nga anak nga lalaki ni Oded,” para mahiuyon sa Gregong Septuagint (Alexandrine Codex), Syriac nga Peshitta, ug Latin nga Vulgate (makuting rebisyon ni Clementino), apan dili gihapon kini makasulbad sa suliran nga gihisgotan sa itaas. Ang ikatulong solusyon mao ang pagdawat sa kon unsay nasulat diha sa Masoretikong teksto, nga masabtan nga si Oded mismo ang mihatag sa panagna bisan tuod wala kini hisgoti diha asoy. Si Asa nagpatalinghog sa mga pulong ni Azarias (2Cr 15:2-7) ug sa mga pulong sa iyang amahan nga si Oded.

2. Usa ka manalagna sa Samaria sa panahong si Peka naghari sa Israel ug si Ahaz naghari sa Juda (762-​mga 759 W.K.P.). Human maparot sa Israel ug Sirya ang Juda, 200,000 ka binihag gikan sa habagatang gingharian ang gidala ngadto sa Samaria. Apan gisugat ni Oded ang madaogong kasundalohan ug gipasidan-an sila nga kon ilang uliponon ang ilang mga igsoon, ang Diyos masuko kanila. ‘Kay sa pagkatinuod,’ siya nagpatin-aw, ‘maoy tungod sa pagkadaotan sa Juda nga si Jehova nagtugot kaninyo sa pagpildi kanila. Karon ayaw sila himoang mga sulugoon aron si Jehova dili masuko kaninyo; ibalik ang mga binihag!’ Upat ka pangulong Epraimnon ang mipaluyo kang Oded, ug ang mga binihag giatiman ug gipapauli.​—2Cr 28:5-15.