Usa ka kutay sa linginong anapog nga kabungtoran nga nahimutang sa sidlakang kiliran sa Jerusalem, nga ang gilay-on maoy “usa ka adlawng igpapahulay nga panaw,” ug kini giulang sa Walog sa Kidron gikan sa siyudad sa Jerusalem. (Eze 11:23; Zac 14:4; Buh 1:12) Kini nga kutay naglakip sa tulo ka dagkong mga bukid. Ang Bukid sa Scopus nga nahimutang sa amihanan mao ang kinahabogan ug mituybo ug mga 820 m (2,700 p), ug busa mas habog pa kay sa Jerusalem. Ang gitawag nga Bukid sa Paglapas o Bukid sa Kagun-oban nahimutang sa habagatan ug may gihabogon nga mga 740 m (2,430 p). Ang bukid sa tunga nga atbang sa Patukoranan sa Templo maoy mga 812 m (2,664 p) sa kinatayuktokan niini ug sagad mao ang gihisgotan sa Bibliya nga Bukid sa mga Olibo. Ang tagaytay niini kanhi napuno sa mga kahoyng palma, mirto, oleifero, ug ilabina, sa mga kahoyng olibo. (Neh 8:15) Ang ngalan niini nga kabukiran gipasukad sa mga kahoyng olibo nga nanubo niini. Apan, sa dihang gilikosan sa mga Romano ang Jerusalem niadtong 70 K.P., ang Bukid sa mga Olibo gipurilan sa mga kahoy niini.​—The Jewish War, V, 523 (xii, 4).

Ang Bukid sa mga Olibo nalangkit sa talagsaong mga hitabo sa kasaysayan sa Bibliya. Si Haring David, nga nagtiniil ug naghilak, mitungas sa Bukid sa mga Olibo samtang siya mikalagiw gikan sa iyang rebelyosong anak nga lalaki nga si Absalom. (2Sa 15:​14, 30, 32) Si Haring Solomon nagtukod ug hatag-as nga mga dapit alang sa  idolatrosong pagsimba didto “dapit sa tuo [habagatan] sa Bukid sa Kagun-oban,” apan sa ulahi si Haring Josias naghimo niini nga dili angay sa pagsimba. (1Ha 11:7; 2Ha 23:​13, ftn sa Rbi8) Sa unang siglo K.P., si Jesu-Kristo sagad nakigtagbo sa iyang mga tinun-an didto sa tanaman sa Getsemane, nga nahimutang diha sa o kasikbit sa Bukid sa mga Olibo. (Mat 26:​30, 36; Ju 18:​1, 2) Sa dihang didto sa Jerusalem, nabatasan ni Jesus ug sa iyang mga tinun-an nga magpalabay sa kagabhion sa Betania diha sa S nga bakilid sa Bukid sa mga Olibo, dayag nga sa pinuy-anan ni Marta, Maria, ug Lazaro. (Mat 21:17; Mar 11:11; Luc 21:37; Ju 11:1) Lagmit gikan sa Betfage nga duol sa Betania, si Jesus, nga nagsakay sa nati sa usa ka asno, misugod sa iyang madaogong pagsakay agi sa Bukid sa mga Olibo paingon sa Jerusalem. (Mat 21:​1, 2; Mar 11:1; Luc 19:29) Ug didto sa Bukid sa mga Olibo nga iyang gipatin-aw sa iyang mga tinun-an kon unsa unyay ‘ilhanan sa iyang presensiya.’ (Mat 24:3; Mar 13:3) Sa kataposan, human sa iyang pagkabanhaw, si Jesus mikayab gikan didto paingon sa langit.​—Buh 1:9-12.