[Makaayo].

Usa ka kagiw nga ulipon kinsa gitabangan ni Pablo nga mahimong usa ka Kristohanon. Si Onesimo nahimong sulugoon ni Filemon, usa ka Kristohanon sa Colosas, apan mikalagiw gikan sa Colosas ug miadto sa Roma. Siya tingali nangawat pa gani sa iyang agalon aron makahimo sa maong panaw. (Col 4:9; Flm 18) Lagmit gayod nga siya nakahimamat na o tingali nakadungog na kang Pablo pinaagi kang Filemon; kay bisan tuod wala hisgoti nga espesipiko nga si Pablo miduaw sa Colosas panahon sa iyang misyonaryong mga panaw, si Pablo nakapanaw sa tibuok dapit ug nakaila kang Filemon. (Buh 18:​22, 23; Flm 5, 19, 22) Bisan unsa man ang kahimtang, sa wala isulti nga mga hinungdan, si Onesimo nakauban ni Pablo sa Roma, ug wala madugay siya nahimong Kristohanon. (Flm 10) Sukwahi kaayo sa iyang pagkawalay-pulos kanhi kang Filemon ingong usa ka ulipon, siya niining tungora nahimong labing mapuslanon kang Pablo ingong usa ka ministro, usa ka “matinumanon ug hinigugmang igsoon” nga gitawag ni Pablo nga “ang akong malumong pagmahal.”​—Col 4:9; Flm 11, 12.

Bisan pa niana, si Onesimo usa gihapon ka kagiw nga ulipon, ug ang kahikayan sa katilingban niadtong adlawa nag-obligar kang Pablo sa pagpadala kaniya balik sa iyang tag-iya, bisan tuod nagpanuko tungod kay siya nahimong usa ka maayong kauban. Apan wala gayod pugsa sa apostol si Onesimo nga mobalik sa iyang agalon, busa kini nag-agad kang Onesimo ug sa iyang pagkaandam nga mobalik. Sa pagpadala kang Onesimo, gihikay ni Pablo nga ubanan siya ni Tiquico ug dad-on nilang duha ang usa ka sulat ug usa ka taho ngadto sa Colosas. (Col 4:7-9) Dugang pa, gihatag ni Pablo kang Onesimo ang iyang sulat kang Filemon, bisan pag niadtong tungora hapit nang makagawas si Pablo sa pagkabilanggo ug naglaom nga personal nga makaduaw kang Filemon. (Flm 22) Kining ulahing sulat mahimong isipon nga usa ka sulat sa pagpailaila pag-usab ug pagrekomendar kang Onesimo, nga niana gipasaligan ni Pablo si Filemon sa maayong Kristohanong ministeryo ug bag-ong personalidad ni Onesimo, ug nga niana siya nangamuyo nga ang ilang panagkitaay pag-usab mahisama unta nianang sa duha ka Kristohanon kay sa nianang sa usa ka ulipon ug sa iyang agalon. Si Pablo naghangyo nga ang bisan unsang utang nga wala mabayri ni Onesimo kang Filemon iya na lang ipahamtang sa apostol ingong bayranan. (Flm 12-22) Makaiikag usab, diha sa iyang sulat ngadto sa mga taga-Colosas nga gidala ni Onesimo ug Tiquico, si Pablo naghisgot sa Kristohanong mga prinsipyo nga naglagda sa relasyon sa ulipon ug sa agalon.​—Col 3:22–​4:1.