Usa ka siyudad nga dayag nga gitukod sa Benjaminhon nga si Semed nga “anak nga lalaki” ni Elpaal. (1Cr 8:​1, 12) Human madestiyero sa Babilonya, ang Ono gipuy-an pag-usab sa mga Benjaminhon. (Esd 2:​1, 33; Neh 7:​6, 37; 11:​31, 35) Ang Kafr ʽAna (Ono), mga 11 km (7 mi) sa SHS sa Jope, gituohan nga mao ang karaang dapit. Kini nga dapit maoy pipila lamang ka kilometro gikan sa gituohang nahimutangan sa karaang Lod ug Hadid. Ang “patag sa walog sa Ono” (Neh 6:2) lagmit nagtumong sa halapad nga walog nga nahimutangan sa Kafr ʽAna. Kining “patag sa walog” gituohan usab nga mao ang “walog sa mga artesano [geh ha·chara·shimʹ].” (Neh 11:35) Apan gisabot sa pipila ka eskolar ang Hebreohanong geh ha·chara·shimʹ nga nagtumong sa laing lokasyon ug kini gihatagag katumbas nga espeling nga “Ge-harasim,” ingong usa ka ngalan sa dapit.​—JP; itandi ang 1Cr 4:14.