1. Usa ka kaliwat ni Sem pinaagi kang Arpaksad, Sela, Eber, ug Joktan; ang ika-11 sa 13 ka anak nga lalaki ni Joktan. (Gen 10:22-29; 1Cr 1:17-23) Si Opir lagmit natawo 200 ka tuig sa wala pa matawo si Abraham, kinsa usa ka kaliwat sa iyang uyoan nga si Peleg. (Gen 10:25; 11:18-26) Sama sa iyang mga igsoon, mopatim-aw nga si Opir nangulo usab sa usa sa mga tribo nga Semihanon nga giisip nga lakip sa mga kaliwat ni Noe “sumala sa ilang mga banay, sumala sa ilang mga pinulongan, diha sa ilang mga yuta, sumala sa ilang mga nasod.” (Gen 10:​31, 32) Tan-awa ang Num. 2 alang sa posibleng mga nahimutangan sa yuta sa Opir diin sa kataposan kini nga tribo namuyo.

2. Usa ka dapit nga iladong gigikanan sa daghang bulawan nga kinamaayohag klase. Kana ang hinungdan nga bisan sa panahon ni Job (mga 1600 W.K.P.) ang “bililhong bato diha sa yuta” ug ang “lunsayng bulawan” gihisgotan nga katumbas sa “bulawan sa Opir.” (Job 22:24; 28:​15, 16) Ang Salmo 45:9 naghubit sa rayna nga gidayandayanan sa bililhong bulawan sa Opir, ug sa Isaias 13:​11, 12, sa kapahayagan batok sa Babilonya, ang kanihit sa bulawan sa Opir gigamit aron ilarawan ang diyutayng gidaghanon sa malupigong mga tawo sa Babilonya human kini mapukan.

Si David miamot ug 3,000 ka talanton nga bulawan gikan sa Opir alang sa pagtukod sa templo, ug kini nga bulawan mokantidad ug $1,156,050,000. (1Cr 29:​1, 2, 4) Sa ulahi, ang tiglawig nga panon sa mga magpapatigayon ni Solomon nga anak ni David kanunayng nagdala ug 420 ka talanton nga bulawan gikan sa Opir. (1Ha 9:26-28) Ang samang asoy sa 2 Cronicas 8:18 mabasa nga 450 ka talanton. Ang pipila ka eskolar nagtuo nga kini nga kalainan nahitabo sa dihang ang mga letra sa alpabeto  gigamit ingong mga numero​—nga nasaypan sa usa ka karaang magkokopya ang Hebreohanong numero nga letrang nun (נ), nga katumbas sa 50, ingong letrang kaph (כ), nga katumbas sa 20, o ang kaph ingong nun. Hinunoa, gipakita sa ebidensiya nga ang tanang numero diha sa Hebreohanong Kasulatan gisulat ingong mga pulong, inay nga hawasan ug mga letra. Busa, ang mas makataronganong pagpatin-aw mao nga ang duha ka numero husto ug nga ang bug-os nga gidaghanong gidala maoy 450 ka talanton, nga 420 niini maoy aktuwal nga ganansiya.

Niadtong 1946, ingong pamatuod niining mga asoy sa Bibliya mahitungod sa pag-importar ug bulawan gikan sa Opir, usa ka bika ang nakalotan sa AS sa Tel Aviv-Yafo. Diha niana may inskripsiyon nga nag-ingong “Bulawan sa Opir ngadto sa bet horon, katloan ka siklo.”​—Journal of Near Eastern Studies, 1951, Tomo X, pp. 265, 266.

Gawas pa nga kini maoy gigikanan sa daghang bulawan, ang yuta sa Opir maoy gigikanan usab sa mga kahoyng “algum” ug sa bililhong mga bato nga giimportar ni Solomon. (1Ha 10:11; 2Cr 9:10) Apan sa dihang si Haring Jehosapat, usa ka gatos ka tuig sa ulahi, misulay sa pagpanaw paingon sa maong yuta, kini misangpot sa katalagman, ang iyang “mga barkong Tarsis” nangaguba didto sa Ezion-geber sa ulohan sa Gulpo sa ʽAqaba.​—1Ha 22:48; tan-awa ang TARSIS Num. 4.

Nahimutangan. Ang eksaktong nahimutangan sa Opir dili matino karong adlawa. Sa daghang mga dapit nga gituohang nahimutangan niini, tulo ang mas gipaboran: India, Arabia, ug AS sa Aprika​—kining tulo maabot pinaagig mga barko nga molawig gikan sa Ezion-geber sa ulohan sa sidlakang sanga sa Pulang Dagat. Maylabot sa India, ang tanang manggad nga gidala sa mga barko ni Solomon ug Hiram sa pagpauli niini makita nianang dapita. Si Josephus, Jerome, ug ang Septuagint nagpaluyo usab nga ang Opir nahimutang sa India. Sa laing bahin, kadtong nagtuo nga ang Opir nahimutang sa rehiyon sa AS sa Aprika duol sa Somalia, sa ubos nga tumoy sa Pulang Dagat, nag-ingon nga mas duol kini nga dapit nga kakuhaan sa tanang giimportar nga mga butang kay sa India.

Hinunoa, mas bug-at ang opinyon nga ang Opir maoy usa ka rehiyon sa HK sa Arabia duol sa Yemen. Ang mga ebidensiya nga gihatag alang niini gipasukad sa pagtuo nga ang mga kaliwat ni Opir nga anak nga lalaki ni Joktan nanimuyo sa Peninsula sa Arabia uban sa igsoon niini nga mga tribo sama sa mga kaliwat ni Sheba ug Havila. (Gen 10:​28, 29) Ang asoy bahin sa pagduaw sa rayna sa Sheba (lagmit gikan sa habagatang Arabia) nataliwad-an sa duha ka asoy nga naghisgot sa pagpakignegosyo ni Solomon sa Opir.​—1Ha 9:26–​10:11.