Ang bahin ibabaw sa bitiis nga nagsukad sa balat-ang hangtod sa tuhod. Sanglit anaa kini sa kiliran sa usa ka tawo, ang Hebreohanong pulong niini mahimong magtumong usab sa kiliran sa usa ka butang, sama sa “kiliran” sa tabernakulo, o sa usa ka halaran.​—Ex 40:24; 2Ha 16:14.

Ang espada itakin diha sa kiliran, diha sa paa. (Ex 32:27; Huk 3:​16, 21; Aw 3:8; Sal 45:3) Sa Pinadayag 19:11-21, si Kristo Jesus gihulagway nga nagsakay sa usa ka puting kabayo nga iggugubat aron makiggubat sa “mapintas nga mananap” ug sa mga hari sa yuta kauban sa ilang mga sundalo. Ang iyang titulo nga “Hari sa mga hari ug Ginoo sa mga ginoo” tin-awng gipahibalo pinaagi sa pagsulat niini diha sa iyang panggawas nga besti dapit sa iyang paa, diin sagad nga itakin ang espada sa awtoridad.

Ang mga purol sa mga saserdote sa Israel maoy gikan sa balat-ang hangtod sa paa, sa ato pa, hangtod sa may tuhod, aron ang ilang pagkahubo matakpan pag-ayo sa dihang mag-alagad sa sangtuwaryo ug sa halaran ni Jehova. Kay kondili, sila mamatay.​—Ex 28:​42, 43.

Sa dihang manumpa, ang usa ka batasan nga usahay ginasunod mao nga ang nanumpa magbutang sa iyang kamot ilalom sa paa sa tawo nga gipanumpaan. (Gen 24:2-4, 9; 47:29-31) Mahitungod sa kahulogan niini, tan-awa ang POSTURA UG MGA LIHOK (Pagpanumpa). Ang batasan sa pagdagpal sa paa nagpasabot ug kaguol, kasubo, o pagbasol.​—Jer 31:19; Eze 21:12.

Mga Sangkap sa Pagsanay. Sanglit ang ibabawng bahin sa paa mao ang dapit sa lawas diin nahimutang ang mga sangkap sa pagsanay, ang mga anak giingon nga ‘migula gikan sa balat-ang [sa orihinal nga Hebreohanon, ibabawng bahin sa paa].’ (Gen 46:26; Ex 1:5; Huk 8:30) Kini naghatag ug katin-awan sa matang sa silot nga maagoman sa usa ka babaye nga makaplagang sad-an sa tinagong pagpanapaw.

Kon ang bana nagduda nga nagluib ang iyang asawa, iyang dad-on siya ngadto sa saserdote. Pabarogon sa saserdote ang babaye sa atubangan ni Jehova, magkuha ug balaang tubig (lagmit lunsay, tab-ang nga tubig), sabwagan kini ug abog gikan sa salog sa tabernakulo, ug hugasan o palaon nganha sa tubig ang mga tunglo nga iyang gisulat. Human manumpa sa iyang pagkadili-sad-an, kinahanglan nga iyang imnon ang tubig. Kon siya sad-an, ang iyang ‘balat-ang [o, ibabawng bahin sa paa] mokuyos’ ug ang iyang tiyan modako. Kon siya dili sad-an, walay kadaot nga modangat kaniya.​—Num 5:12-31.

Unsa ang kahulogan sa ‘pagkuyos sa balat-ang’ sa mananapawng babaye?

Lagmit niini nga teksto ang balat-ang gigamit ingong dili-hilas nga kapuli sa pagtumong sa kinatawo. (Itandi ang Gen 46:26.) Busa ang silot makaapekto sa mga sangkap nga nalangkit sa pagpakasala. (Itandi ang Mar 9:43-47.) Ang ekspresyon nga ‘mikuyos’ gisabot nga nagkahulogang “miniwang” (The Holy Bible, gihubad sa Catholic Biblical Association of America), “miuk-ok” (Da) o “mikupos” (Mo), ug nagsugyot nga ang kinatawo mikuyos ug nawala ang pertilidad ug ang katakos sa pagpanamkon. Apan tungod kay pamabdosan man sa bana ang iyang dili-sad-ang asawa, kini nagpakita nga ihikaw ang umaabot nga pagmabdos ngadto sa mananapawng babaye. (Num 5:28) Dugang pa, ang tiyan sa sad-ang asawa modako tungod sa tunglo, dili tungod sa panalangin sa pagmabdos.

Dili kini usa ka pagsulay pinaagig grabeng pagsakit nga usahay nanginahanglag milagro aron maluwas, sama niadtong gihimo panahon sa Mangiob nga Katuigan. Walay bisan unsa diha sa tubig nga makapahinabog kasakit. Apan, kini maoy balaang tubig ug gibutang diha niini ang balaang yuta o abog ug ang gisulat nga mga tunglo gipala pinaagi niini. Busa, kini adunay makahuloganong mga simbolismo, ug kini giinom sa atubangan ni Jehova ug uban ang solemneng panaad ngadto kaniya. Tino gayod ang mga sangpotanan niini. Kon sad-an ang babaye, ipahinabo ni Jehova nga ang iyang giinom milagrosong magpatungha sa nahiangayng mga sangpotanan. Ang pagpanapaw may silot nga kamatayon, apan niini nga kaso wala ang gikinahanglang duha ka saksi. (Num 35:30; Deu 19:15) Dugang pa, sagad nga niini nga kaso ang ngalan sa sad-ang lalaki, nga takos usab sa kamatayon, wala pa mabutyag.

Paa sa Laking Karnero. Maylabot sa pagpahiluna-sa-katungdanan sa mga saserdote, ang tuo nga paa sa “laking karnero alang sa pagpahiluna-sa-katungdanan” maoy bahin sa “halad-nga-tinabyog.” (Lev 8:​22, 25-27) Sa pipila ka halad, ang pangulahing tuo nga paa, dayag nga ang dapidapi niini, gihatag usab ingong sagradong bahin ngadto  sa nagdumalang saserdote. (Lev 7:32-34; 10:​12, 14, 15) Diha sa Numeros 6:19 ug Deuteronomio 18:3 ang paa sa atubangan, ang “abaga” (sa literal, ang “bukton”), gihisgotan usab ingong bahin nga ihatag ngadto sa mga saserdote.

“Igluluksong mga Paa.” Ang mga insekto nga adunay “igluluksong mga paa” (Heb., kera·ʽaʹyim) mao lamang ang pak-an ug tigpanon nga mga linalang nga giingong mahinlo nga pagkaon sumala sa Balaod. (Lev 11:21) Sa ubang mga teksto, ang samang Hebreohanong termino nagtumong sa “tiil” sa mga hayop.​—Tan-awa ang TIIL.