Ang pagpahimuot sa usa ka tawo pinaagig dili-tiunay nga komendasyon; pagpalapala; bakak, dili-tim-os, o hingapin nga pagdayeg. Sagad nga himoon kini aron tagbawon ang paghigugma sa kaugalingon o ang garbo sa usa ka tawong giulog-ulogan ug busa makadaot kaniya. Ang tumong niini maoy aron makabaton ug pabor o materyal nga mga kaayohan gikan sa giulog-ulogan, aron siya mobatig obligasyon ngadto sa nag-ulog-ulog o aron siya makabaton ug himaya. Sagad nga gihimo kini aron ang giulog-ulogan malit-ag. (Pr 29:5) Ang pag-ulog-ulog dili pamatuod sa kaalam nga naggikan sa itaas; kini maoy kaalam gikan niining kalibotana sanglit nabanaag niini ang kahakog, pagpihigpihig, ug pagkasalingkapaw. (San 3:17) Ang pagkadili-tim-os, pagpamakak, pagpalapala o paghimaya sa mga tawo, ug ang pagpahimulos sa garbo sa uban dili makapahimuot sa Diyos.​—2Co 1:12; Gal 1:10; Efe 4:25; Col 3:9; Pin 21:8.

Kasukwahi sa pag-ulog-ulog mao ang Kristohanong dalan nga makaplagan sa mga pulong sa apostol diha sa 1 Tesalonica 2:3-6: “Kay ang tambag nga among gihatag wala maggikan sa sayop o sa kahugawan o pinaagig limbong, apan, ingon nga kami napamatud-an sa Diyos nga angayang piyalan sa maayong balita, busa nagsulti kami, ingon nga nagpahimuot, dili sa mga tawo, kondili sa Diyos, kinsa nagpamatuod sa among mga kasingkasing. Sa pagkatinuod, wala kami sukad makaplagi nga nag-ulog-ulog, (ingon sa inyong nahibaloan) o nagminaot alang sa hakog nga pangibog, saksi ang Diyos! Ni kami nagtinguhag himaya gikan sa mga tawo, wala, ni gikan kaninyo o gikan sa uban pa, bisan tuod kami mahimo untang gastosong pabug-at ingon nga mga apostoles ni Kristo.”

Bisan tuod ang pag-ulog-ulog daw mapuslanon, ang Bibliya nagpasiugda nga “siya nga nagabadlong sa usa ka tawo makakaplag ug labawng kaluoy sa ulahi kay kaniya nga nagaulog-ulog pinaagi sa iyang dila.” (Pr 28:23) Sa dihang ang usa ka tawo mang-ulog-ulog aron makabentaha sa ubang tawo, kini maoy kasukwahi sa gugma. Ang usa ka madumtanon lagmit mang-ulog-ulog apan sa ulahi ang iyang pagkamalimbongon mosumbalik kaniya sama sa usa ka bato.​—Pr 26:24-28.

Ang usa nga nag-ulog-ulog mogamit ug hinobrang sinultihan aron malimbongan ang biktima niini. Ang mga ekspresyon nga “ulog-ulog,” “maulog-ulogon nga dila (ngabil, o mga pulong)” (Sal 5:9; 12:​2, 3; Dan 11:32), “pag-ulog-ulog” o “pag-ulo-ulo” (Pr 7:21; Dan 11:​34, ftn sa Rbi8), ug “salingkapaw” (Eze 12:​24, ftn sa Rbi8) maoy mga hubad sa Hebreohanong lintunganayng pulong nga cha·laqʹ o sa kaamgid nga mga pulong niini. Sa matag teksto sa Bibliya nga gisitar, ang tumong sa maulog-ulogong tawo maoy daotan.

Ang usa ka pananglitan sa makadaot nga sangpotanan sa pagdawat ug pag-ulog-ulog ug pagdayeg gikan sa mga tawo mao si Herodes Agripa I, kinsa gihatagan ug hingaping pagdayeg sa panon sa katawhan ingong namulong sa “tingog sa usa ka diyos.” Tungod kay iyang gidawat ang hingaping pagdayeg ug wala maghimaya sa Diyos, siya gihampak sa manulonda sa Diyos ug namatay. (Buh 12:21-23) Sa laing bahin, gisanta dayon ni Bernabe ug Pablo ang panon sa katawhan kinsa nagpakadiyos kanila. (Buh 14:11-15) Lain pa, sa dihang ang usa ka Hudiyong magmamando misulay sa paggamit sa madayegong titulo nga “Maayong Magtutudlo” ngadto kang Jesu-Kristo, dihadiha si Jesus nagtul-id kaniya, nga nag-ingon: “Nganong gitawag mo ako nga maayo? Walay bisan kinsa nga maayo, gawas sa usa, ang Diyos.”​—Luc 18:​18, 19; itandi ang Job 32:​21, 22.