Usa ka lakang nga himoon aron ipaamgo sa uban nga sila nakasala, sa ingon sila matukmod sa pag-ila sa ilang mga sayop ug tul-iron kini. Ang Hebreohanong berbo nga ya·khachʹ (pagbadlong) maoy usa ka legal nga  termino nga gihubad usab nga “papanubagon” (Isa 37:4) ug ‘tul-iron ang mga butang’ (Isa 1:18; 2:4). Ang katumbas nga Gregong termino mao ang e·legʹkho. Kining duha ka termino sagad naghatag sa ideya sa paghukom sa usa ka tawo ingong sad-an ug sa pag-aghat niining tawhana sa paghinulsol. Bahin sa paggamit sa e·legʹkho diha sa Gregong Septuagint ingong hubad sa pulong nga ya·khachʹ sa daghang higayon nga makita kini, ang Theological Dictionary of the New Testament nag-ingon: “Kini nagtumong sa pagdisiplina ug pag-edukar sa tawo nga pagahimoon sa Diyos ingong resulta sa Iyang hudisyal nga kalihokan. Kini naglakip sa tanang matang sa pag-edukar gikan sa paghukom sa makasasala ngadto sa pagkastigo ug pagsilot, gikan sa pagtudlo sa tawong matarong pinaagig grabeng mga pagsulay ngadto sa paggiya kaniya pinaagig pagtudlo ug pagpahimangno.”​—Giedit ni G. Kittel, 1964, Tomo II, p. 473.

Kon Kanus-a Gikinahanglan. Sa balaod sa Diyos ngadto sa Israel, ang mga tawo nga nabuhatan ug sala giawhag: “Dili ka magdumot sa imong igsoon diha sa imong kasingkasing. Magbadlong ka sa imong isigkatawo, aron dili ka magpas-an sa sala uban kaniya.” (Lev 19:17) Ang mga pagbati sa kayugot batok sa igsoon nga nakasala dili tugotang mosamot. Siya kinahanglang badlongon aron siya mapasig-uli gikan sa sala. Ang pagkapakyas sa paghimo niining moral nga responsibilidad makaamot sa dugang pa nga pagpakasala, ug ang tawo nga nagdumili sa pagbadlong sa iyang isigkatawo makaambit sa maong sala.​—Itandi ang Mat 18:15.

Usahay, ang mga ansiyano ingong hawas sa kongregasyon kinahanglang magbadlong sa seryosong mga mamumuhat ug daotan, nga gani magbuhat niana atubangan sa uban nga nakahibalo sa sala nga nabuhat. Ang maong pagbadlong dili lamang ihatag ngadto niadtong andam modawat niini. Ang mga ansiyano gisugo usab sa “pagbadlong niadtong mosumpaki” ug sa ‘pagbadlong nga mapig-oton’ niadtong “masupilon” ug “mga tigsultig walay pulos.”​—1Ti 5:20; Tit 1:​9, 10, 13.

Bisan tuod ang pagbadlong makaayo niadtong modawat niini, ang mga paningkamot sa magbabadlong dili kanunayng gipabilhan. Busa ang Proverbio 9:​7, 8 nagpasidaan: “Siya nga nagatul-id sa mabiaybiayon makadawat ug kaulawan, ug siya nga nagabadlong sa usa ka tawong daotan​—ang kasaypanan anaa kaniya. Ayaw badlonga ang usa ka mabiaybiayon, aron dili siya magdumot kanimo. Badlonga ang usa ka tawong maalamon ug mahigugma siya kanimo.”

Hustong Tinamdan. Sanglit ang Kasulatan inspirado sa Diyos, ang tanang pagbadlong nga bug-os gipasukad niini sa pagkatinuod maoy pagbadlong gikan kaniya. (2Ti 3:16) Ang pagbadlong ni Jehova maoy usa ka kapahayagan sa gugma, dili angayng pagaayran o isalikway. (Pr 3:​11, 12) Ingong ulo sa Kristohanong kongregasyon ug tungod sa iyang pagmahal sa mga membro niini, gitino ni Jesu-Kristo nga ang gikinahanglang pagbadlong ikahatag pinaagi sa mga lalaki nga may katakos sa espirituwal. (Pin 3:​14, 19) Ang mga maalamon nakasabot nga “ang mga pagbadlong sa disiplina maoy dalan sa kinabuhi.”​—Pr 6:23.

Tendensiya sa makasasalang tawo nga mayugot sa pagbadlong ug sa tawo nga gisugo sa pagbadlong kaniya. Apan kon ang usa magpadaog niini nga tendensiya, mahisama siya sa usa ka mananap nga walay kabuot nga walay katakos sa pag-ila sa maayo ug daotan; ingon sa gipahayag sa inspiradong proverbio: “Ang nagadumot sa pagbadlong walay kabuot.” (Pr 12:1) Sa kasukwahi, ang salmistang si David, kinsa mismo sublisubli nga gibadlong, misulat: “Kon hampakon ako sa matarong, kana maoy mahigugmaong-kalulot; ug kon badlongon niya ako, kana maoy lana sa ibabaw sa akong ulo, nga dili dumilian sa akong ulo.”​—Sal 141:5.

Ingong Pagpakita sa Dili Pag-uyon. Ang Hebreohanong berbo nga ga·ʽarʹ adunay ideya sa pagpahayag ug hilabihang dili pag-uyon o sa pagbadlong pinaagig mga pulong o mga lihok. (Gen 37:10) Ang laing Hebreohanong berbo nga gihubad nga “pagbadlong” sa literal nagkahulogang “pagpakaulaw” (Job 11:3); ang usa ka Hebreohanong nombre nga gihubad nga “pagbadlong” sa literal nagkahulogang “usa ka pagtul-id.” (2Ha 19:3) Sa Grego, ang diwa sa “pagbadlong” gipahayag sa pulong nga e·pi·ti·maʹo, nga lagmit nagkahulogan usab ug ‘higpit nga pagpina,’ “pagsaway.”​—Mat 12:16; 2Ti 4:2.

Ang usa ka diwa sa pagbadlong nga gigamit dili lamang ngadto sa mga tawo mao ang “pagpugong,” “pagpahunong sa usa ka butang.” Ang pagbadlong ni Jehova sa gipugas nga binhi nagpasabot sa iyang pagpugong sa usa ka maayong ani. (Mal 2:3) Ang iyang pagbadlong sa nagalamoy nga mga insekto nagkahulogan nga iyang gipahunong kini sa pagdaot sa mga pananom. (Mal 3:11) Ang salmista, nga mahulagwayong naghubit sa mga kaaway sa katawhan sa Diyos ingong mga hayop, nangamuyo sa Labing Hataas nga pugngan ang ilang gahom sa pagdaot: “Badlonga ang ihalas nga mananap sa mga tangbo, ang panon sa mga torong baka.” (Sal 68:30) Gibadlong ni Jesu-Kristo ang hangin ug ang hilanat.​—Mar 4:39; Luc 4:39.

Usahay ang “pagbadlong” adunay ideya sa “paghulga.” Busa, ang mga pulong nga “pagbadlong sa imong nawong” mahimong magpasabot nga ang paghulga makita sa panagway sa usa.​—Sal 80:16.

 Ang epekto sa pagbadlong mahimong magpatagad sa dakong gahom ni Jehova. Ang usa ka talagsaong pananglitan mao ang pagbahin sa Pulang Dagat.​—Sal 106:9.

Makataronganon o Dili-Makataronganon. Ang usa ka pagbadlong mahimong makataronganon o dili-makataronganon. Tungod kay ang usa ka damgo nga giasoy ni Jose naundan ug mga ideya nga daw supak sa kinaiyanhong relasyon sa ginikanan ug anak, ang iyang amahang si Jacob nagbadlong kaniya. (Gen 37:10) Sa dihang gisultihan ni Jesu-Kristo ang iyang mga tinun-an nga ang pag-antos ug ang kamatayon nagpaabot kaniya, gibadlong siya ni Pedro pinaagi sa pag-ingon: “Magmaluloton ka sa imong kaugalingon, Ginoo; dili gayod mahitabo kanimo kini nga dulnganan.” (Mat 16:22) Sanglit nasayop si Pedro, si Jesus sa hustong paagi nagbadlong kaniya pinaagi sa kusganon kaayong mga pulong: “Magpalikod ka kanako, Satanas, tungod kay ikaw naghunahuna, dili sa mga hunahuna sa Diyos, kondili nianang sa mga tawo.”​—Mar 8:33.

Mapuslanon. Bisan tuod ang pagbadlong gikan sa usa ka maalamong tawo tingali makapasakit, ang inspiradong tambag mao: “Mas maayo pa ang pagpamati sa pagbadlong sa usa nga maalamon kay sa tawong nagapamati sa awit sa mga hungog.” (Ecc 7:5) Ang pagbadlong gikan sa maalamong tawo, kon dawaton uban ang hustong tinamdan ug tumanon, makapauswag sa panggawi sa usa ka tawo. Ang tawong may salabotan mas daling mosanong sa usa ka yanong pagbadlong kay sa usa ka tawong walay salabotan bisan pag nakadawat ug 100 ka pagbunal tungod sa sayop nga buhat. (Pr 17:10) Diha sa kongregasyon, ang pagbadlong pinaagig pagpalagpot mahimong magpaamgo sa usa ka tawong mamumuhat ug daotan, sama sa gihimo ngadto sa usa ka lalaki nga nakasala ug insesto didto sa Corinto.​—2Co 2:​6, 7; 1Co 5:1-5.