Ubos sa Balaod, ang usa ka mamumuhat ug daotan nga takos sa silot nga kamatayon kasagarang batoon hangtod mamatay. (Lev 20:2) Kini maoy aron sa ‘pagkuha sa daotan gikan sa ilang taliwala.’ Ang tibuok Israel makadungog sa silot, ug ang pagkahadlok sa maong daotan nga buhat matisok sa ilang mga kasingkasing. (Deu 13:​5, 10, 11; 22:​22-24) Sa pagbato sa usa ka mamumuhat ug daotan, ilang gipakita nga sila masiboton alang sa matuod nga pagsimba, mabalak-on nga walay kaulawan nga modangat sa ngalan sa Diyos, ug matinguhaon sa paghupot sa usa ka hinlo nga kongregasyon.

Una pa batoon ang usa ka mamumuhat ug daotan, labing menos duha ka saksi ang mohatag ug magkauyon nga testimonya batok kaniya, ug human niana sila ang unang mobato. (Lev 24:14; Deu 17:​6, 7) Tungod sa posibilidad nga mahimong tigpahamtang ug silot, ang usa ka tawo mag-amping gayod sa paghatag ug pamatuod ug kini usab magpugong kaniya sa paghatag ug bakak nga testimonya, kay kon siya masakpan, siya usab patyon ingong bakakon nga saksi.​—Deu 19:18-20.

Ang pagbato sagad himoon sa gawas sa siyudad. (Num 15:​35, 36; 1Ha 21:13; itandi ang Deu 22:21.) Human niana, ingong pasidaan, ang patayng lawas lagmit ilansang sa usa ka estaka, apan dili pasalopan sa adlaw. Kini ilubong sa samang adlaw.​—Deu 21:21-23.

Gihisgotan ni Jesus ang Jerusalem ingong “ang nagapatay sa mga manalagna ug ang nagabato niadtong mga gipadala kaniya.” (Mat 23:37; itandi ang Heb 11:37.) Si Kristo mismo gihulga nga batoon. (Ju 8:59; 10:31-39; 11:8) Si Esteban gipatay niining paagiha. (Buh 7:58-60) Didto sa Listra ang panatikong mga Hudiyo ‘nagbato kang Pablo ug nagguyod kaniya gawas sa siyudad, nga naghunahunang siya patay na.’​—Buh 14:19; itandi ang 2Co 11:25.

Alang sa mga salaod nga may silot nga pagbato, tan-awa ang KRIMEN UG SILOT.